ಮೋದಿ ಫಿಟ್‌ನೆಸ್ ವೀಡಿಯೋಗೆ ಹಣ ವೆಚ್ಚ ಮಾಡಿಲ್ಲ; ರಾಥೋಡ್

ಹೊಸದಿಲ್ಲಿ: ಪ್ರಧಾನಿ ನರೇಂದ್ರ ಮೋದಿ ಫಿಟ್‌ನೆಸ್ ವೀಡಿಯೋ ಚಿತ್ರೀಕರಣ ಮತ್ತು ಪ್ರಸಾರಕ್ಕೆ 35 ಲಕ್ಷ ರೂ. ವೆಚ್ಚ ಮಾಡಲಾಗಿದೆ ಎಂಬ ಆರೋಪವನ್ನು ಕೇಂದ್ರ ಮಾಹಿತಿ ಮತ್ತು ಪ್ರಸಾರ ಖಾತೆ ಸಚಿವ ರಾಜ್ಯವರ್ಧನ್ ರಾಥೋಡ್ ನಿರಾಕರಿಸಿದ್ದು, ಯಾವುದೇ ಹಣ ವೆಚ್ಚ ಮಾಡಿಲ್ಲ ಎಂದಿದ್ದಾರೆ.


ಕಾಂಗ್ರೆಸ್ ನಾಯಕ ಶಶಿ ತರೂರ್ ಮಾಡಿರುವ ಆರೋಪ ನಿರಾಧಾರವಾಗಿದ್ದು, ಮೋದಿ ವಿಡಿಯೋಗೆ ಯಾವುದೇ ಖರ್ಚು ಮಾಡಿಲ್ಲ. ಅದನ್ನು ಪ್ರಧಾನಿ ಕಾರ್ಯಾಲಯದ ವೀಡಿಯೋಗ್ರಾಫರ್ ಚಿತ್ರೀಕರಿಸಿದ್ದಾರೆ. ಶಶಿ ತರೂರ್ ಹೇಳಿರುವಂತೆ 35 ಲಕ್ಷ ರೂ. ವೆಚ್ಚ ಮಾಡಿರುವುದು ಶುದ್ಧ ಸುಳ್ಳು ಎಂದು ಸಚಿವ ರಾಥೋರ್ ತಿಳಿಸಿದ್ದಾರೆ.


ಯೋಗ ದಿನಾಚರಣೆಗೆ ಮೋದಿ ನೇತೃತ್ವದ ಸರಕಾರ ಜಾಹೀರಾತಿಗೆ 20 ಕೋಟಿ ರೂ. ಮತ್ತು ಪ್ರಧಾನಿ ಫಿಟ್‌ನೆಸ್ ವೀಡಿಯೋಗೆ 35 ಲಕ್ಷ ರೂ. ವೆಚ್ಚಮಾಡಲಾಗಿದೆ ಎಂಬ ವರದಿಯೊಂದನ್ನು ಆಧರಿಸಿ ಶಶಿ ತರೂರ್ ಟ್ವೀಟ್ ಮಾಡಿ ಟೀಕಿಸಿದ್ದರು.


ಅದರ ಬೆನ್ನಲ್ಲೇ ಸಚಿವ ರಾಥೋರ್ ಸ್ಪಷ್ಟನೆ ನೀಡಿ ಟ್ವೀಟ್ ಮಾಡಿದ್ದು, ತರೂರ್‌ ಸದಾ ತಪ್ಪು ಮಾಹಿತಿಯನ್ನೇ ನೀಡುತ್ತಿರುತ್ತಾರೆ ಎಂದಿದ್ದಾರೆ.