ಮಗನಷ್ಟು ಮೋಸ ಮತ್ಯಾರು ಮಾಡಿಲ್ಲ: ಮುಲಾಯಂ ಸಿಂಗ್‌

ಲಖನೌ: ಸಮಾಜವಾದಿ ಪಕ್ಷದ ಮುಖಂಡ ಮುಲಾಯಂ ಸಿಂಗ್ ಯಾದವ್ ಹಾಗೂ ಅವರ ಮಗ ಅಖಿಲೇಶ್ ಯಾದವ್ ನಡುವಿನ ಭಿನ್ನಾಭಿಪ್ರಾಯ ಮತ್ತೆ ಬೀದಿಗೆ ಬಂದಿದ್ದು, ಅಖಿಲೇಶ್‌ ತನಗೆ ಮಾಡಿದ ಅವಮಾನ ಮತ್ತು ದ್ರೋಹ ಎಂದೂ ಮರೆಯಲು ಸಾಧ್ಯವಿಲ್ಲ ಎಂದಿದ್ದಾರೆ.

'ನಾನು ಮೂರು ಬಾರಿ ಸತತ ಮುಖ್ಯಮಂತ್ರಿಯಾಗಿದ್ದೆ, ಅಲ್ಲದೇ ರಾಜಕೀಯದಲ್ಲಿ ಸಕ್ರಿಯವಾಗಿದ್ದುಕೊಂಡೇ ತನ್ನ ಮಗನಿಗೆ ಮುಖ್ಯಮಂತ್ರಿ ಸ್ಥಾನ ಬಿಟ್ಟುಕೊಟ್ಟ ಇತಿಹಾಸವಿಲ್ಲ.ಆದರೆ ಅಖಿಲೇಶ್ ಯಾದವ್ ನನಗೆ ಯಾರೂ ಮಾಡದ ರೀತಿಯಲ್ಲಿ ಅವಮಾನ ಮಾಡಿದ್ದಾರೆ' ಎಂದು ಮುಲಾಯಂ ತಮಗಾದ ಅವಮಾನವನ್ನು ಜನರ ಮುಂದೆ ಹೇಳಿಕೊಂಡಿದ್ದಾರೆ.

'ನನಗೆ ಅಖಿಲೇಶ್ ಯಾದವ್ ಮಾಡಿರುವಷ್ಟು ಅವಮಾನವನ್ನು ಬೇರೆ ಯಾರೂ ಮಾಡಿಲ್ಲ. ಇದನ್ನೇ ಅಸ್ತ್ರವನ್ನಾಗಿಸಿಕೊಂಡಿದ್ದ ಪ್ರಧಾನಿ ನರೇಂದ್ರ ಮೋದಿ, ಉ.ಪ್ರದೇಶ ಚುನಾವಣೆ ಸಮಯದಲ್ಲಿ ತಂದೆಗೆ ಅವಮಾನ ಮಾಡಿದವರು ರಾಜ್ಯದ ಜನತೆಗೆ ಹೇಗೆ ನಿಷ್ಠರಾಗಿರುತ್ತಾರೆ, ಎಂದು ಪ್ರಶ್ನಿಸಿದ್ದರು. ಹೀಗಾಗಿ ಜನರೂ ಕೂಡಾ ಇದನ್ನೇ ಒಪ್ಪಿಕೊಂಡು ಬಿಜೆಪಿಯನ್ನು ಗೆಲ್ಲಿಸಿದ್ದಾರೆ' ಎಂದು ಸಿಂಗ್‌ ಹೇಳಿದರು.

ಮೋದಿಯ ಪ್ರಶ್ನೆಯನ್ನೇ ಮರು ಪ್ರಶ್ನಿಸಿದ ಮುಲಾಯಾಂ, 'ಮೋದಿ ಹೇಳಿರುವುದು ಸರಿಯಾಗಿದೆ. ತಂದೆಗೇ ಅವಮಾನ ಮಾಡಿದವರು ಉಳಿದವರಿಗೆ ನಿಷ್ಠರಾಗಿರುವುದಕ್ಕೆ ಹೇಗೆ ಸಾಧ್ಯ? ಎಂದು ಕೇಳಿದ್ದಾರೆ.