ಈ ಕೋರ್ಟಿನಲ್ಲಿ ಒಂದೇ ದಿನಕ್ಕೆ ನ್ಯಾಯ ಸಿಗುತ್ತೆ!

ಕೊಹಿಮಾ: ನ್ಯಾಯಾಲಯದಲ್ಲಿ ಇತ್ಯರ್ಥವಾಗದ ಪ್ರಕರಣದ ಪಟ್ಟಿ ತೆಗೆದರೆ, ಎಲ್ಲ ದೇಶದ ಎಲ್ಲ ಕೋರ್ಟ್‌ಗಳಲ್ಲೂ ಪಟ್ಟಿ ಮಾರುದ್ದಕ್ಕೆ ಬೆಳೆಯಬಹುದು. ವಿವಿಧ ಕಾರಣಗಳಿಂದ ನ್ಯಾಯಾಲಯಗಳು ಪ್ರಕರಣದ ವಿಚಾರಣೆಯನ್ನು ಮುಂದೂಡುತ್ತವೆ.

ಆದರೆ, ನಾಗಾಲ್ಯಾಂಡ್‌ನ ಕೋಹಿಮಾದಲ್ಲಿ ಒಂದು ನ್ಯಾಯಾಲಯವಿದೆ. ಅಲ್ಲಿ ಇತ್ಯರ್ಥವಾಗದೇ ಉಳಿದ ಪ್ರಕರಣಗಳೇ ಇಲ್ಲ. ಎಲ್ಲ ಪ್ರಕರಣಗಳನ್ನು ಆಗಿಂದಾಗಲೇ ಇತ್ಯರ್ಥ ಮಾಡಿಕೊಂಡು ಬಂದಿದೆ. ಕೋರ್ಟ್‌ ಕೇಸುಗಳೆಂದರೆ, ಎಷ್ಟು ವರ್ಷವಾದರೂ ಮುಗಿಯದ ಅಧ್ಯಾಯ ಎಂಬ ಮಾತಿಗೆ ಈಶಾನ್ಯ ರಾಜ್ಯದ ಕೊಹಿಮಾ ಒಂದು ಅಪವಾದವಾಗಿ ಹೆಸರು ಮಾಡಿದೆ.

ಕೊಹಿಮಾ ಜಿಲ್ಲೆಯ ಸಾಂಪ್ರದಾಯಿಕ ನ್ಯಾಯಾಲಯದಲ್ಲಿ ಒಂದೇ ಒಂದು ಪ್ರಕರಣ ಇತ್ಯರ್ಥಕ್ಕೆವಾಗದೆ ಮತ್ತೊಂದು ಪ್ರಕರಣವನ್ನು ಕೈಗೆತ್ತಿಕೊಳ್ಳುವುದಿಲ್ಲವಂತೆ. ಅಲ್ಲದೆ ಯಾರು ಅರ್ಜಿದಾರರೋ ಅವರೇ ವಾದ ಮಾಡುವಂತಹ ಪದ್ದತಿಯೂ ಇಲ್ಲಿದೆ. ಬುಡಕಟ್ಟು ಜನಾಂಗದ ಸಮಸ್ಯೆಗಳು, ಭೂ ವಿವಾದ ಸೇರಿದಂತೆ ಇನ್ನಿತರ ವಿಚಾರಗಳ ಕುರಿತು ಸಾಂಪ್ರದಾಯಿಕ ನ್ಯಾಯಾಲಯ ಕಾರ್ಯನಿರ್ವಹಿಸುತ್ತದೆ. ಒಂದು ಪ್ರಕರಣಕ್ಕೆ ಕೇವಲ 200 ರೂ. ಶುಲ್ಕದಲ್ಲಿ ಕೇಸು ಮುಕ್ತಾಯವಾಗುತ್ತದೆ.

ಪ್ರತಿದಿನ ಹತ್ತಾರು ಕೇಸುಗಳು ದಾಖಲಾಗುತ್ತದೆ. ಕೆಲ ಕೇಸುಗಳಿಗೆ ಹೆಚ್ಚಿನ ವಿಚಾರಣೆ ಅಥವಾ ತನಿಖೆಗಳು ಅವಶ್ಯವಾದರೆ, ಗರಿಷ್ಠ 1 ವಾರದಲ್ಲಿ ಇತ್ಯರ್ಥ ಪಡಿಸಲಾಗುತ್ತದೆ. ನಮ್ಮಲ್ಲಿ ಯಾವುದೇ ಕೇಸುಗಳು ಇತ್ಯರ್ಥವಾಗಲು ಬಾಕಿ ಉಳಿಯುವುದಿಲ್ಲ ಎಂದು ಮುಖ್ಯಸ್ಥ (ಡೊಬಶಿ) ಕೆನೆಲಿಜೊ ತಿಳಿಸಿದ್ದಾರೆ.

ಶೇ.80ರಷ್ಟು ಪ್ರಕರಣದಲ್ಲಿನ ತೀರ್ಪುಗಳನ್ನು ಜನರು ಸಹಮತಿ ಸೂಚಿಸುತ್ತಾರೆ. ಮೇಲ್ಮನವಿ ಸಲ್ಲಿಸುವುದು ತೀರಾ ವಿರಳ. ನ್ಯಾಯಾಲಯದಲ್ಲಿ 20 ಮಂದಿ ಮುಖ್ಯಸ್ಥೆರಿದ್ದು, ಪ್ರತಿ ಕೇಸಿನ ಸಂಬಂಧ ಎಲ್ಲರೂ ಚರ್ಚಿಸಿ, ತೀರ್ಪು ನೀಡುತ್ತಿದ್ದಾರೆ. ಪ್ರತಿ ವರ್ಷ 100-250 ಕೇಸುಗಳನ್ನು ಇತ್ಯರ್ಥ ಮಾಡುತ್ತಿದ್ದಾರೆ. 1924ರಿಂದ ಸಾಂಪ್ರದಾಯಿಕ ಕೋರ್ಟ್‌ ಅಸ್ಥಿತ್ವದಲ್ಲಿದೆ.

ವಿವಿಧ ಬುಡಕಟ್ಟು ಜನಾಂಗದವರ ಸಮಸ್ಯೆಗಳ ಪರಿಹಾರಕ್ಕೆ ಇದುವೇ ಪ್ರಮುಖ ಕೋರ್ಟ್‌. ಇಲ್ಲಿ ಕಾನೂನು ಪುಸ್ತಕಗಳ ಜತೆ ಪ್ರಕರಣ ಇತ್ಯರ್ಥ ಮಾಡಲಾಗುವುದಿಲ್ಲ. ಬುಡಕಟ್ಟು ಜನಾಂಗದವರ ನಿಯಮಗಳಿಗೆ ಅನುಸಾರ ಮುಖ್ಯಸ್ಥರು ಪರಾಮರ್ಶಿಸಿ ತೀರ್ಪು ನೀಡುತ್ತಾರೆ.