ರಾಮ್‌ಲೀಲಾ ಮೈದಾನ ಹೆಸರು ಬದಲಿಲ್ಲ: ಸ್ಪಷ್ಟನೆ

[ಮೂಲ ಸುದ್ದಿ: ಟೈಮ್ಸ್‌ ಆಫ್‌ ಇಂಡಿಯಾ, 25,ಆಗಸ್ಟ್‌ 2018]

ಹೊಸದಿಲ್ಲಿ: ರಾಮ್‌ಲೀಲಾ ಮೈದಾನಕ್ಕೆ ಮಾಜಿ ಪ್ರಧಾನಿ ಅಟಲ್‌ ಬಿಹಾರಿ ವಾಜಲೇಯಿ ಅವರ ಹೆಸರಿಡುವ ಯಾವುದೇ ಪ್ರಸ್ತಾವನೆ ಇಲ್ಲ ಎಂದು ಉತ್ತರ ದಿಲ್ಲಿ ಮುನ್ಸಿಪಲ್‌ ಕಾರ್ಪೊರೇಷನ್‌ ಸ್ಪಷ್ಟಪಡಿಸಿದೆ.

ಉತ್ತರ ದಿಲ್ಲಿ ಮೇಯರ್‌ ಆದೇಶ್‌ ಗುಪ್ತಾ, ಇದು ಗಾಳಿ ಸುದ್ದಿ, ಪ್ರಸ್ತಾವನೆಯೇ ಬಂದಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ.

ರಾಮ್‌ಲೀಲಾ ಮೈದಾನದ ಹೆಸರು ಬದಲಾಯಿಸಲು ಬಿಜೆಪಿ ಪ್ರಸ್ತಾವನೆ ಸಲ್ಲಿಸಿದೆ ಎಂದು ಸುಳ್ಳು ಸುದ್ದಿ ಹಬ್ಬಿಸಲಾಗುತ್ತಿದೆ. ಇಂತಹ ಪ್ರಸ್ತಾವನೆ ಬಿಜೆಪಿಯೂ ಸಲ್ಲಿಸಿಲ್ಲ ಎಂದು ದಿಲ್ಲಿ ಬಿಜೆಪಿ ಅಧ್ಯಕ್ಷ ಮನೋಜ್‌ ತಿವಾರಿ ಸ್ಪಷ್ಟನೆ ನೀಡಿದ್ದಾರೆ.

ಈ ವಿಚಾರದಲ್ಲಿ ಉಂಟಾಗುತ್ತಿರುವ ಗೊಂದಲಕ್ಕೆ ದಿಲ್ಲಿ ಸಿಎಂ ಅರವಿಂದ್‌ ಕೇಜ್ರಿವಾಲ್‌ ಟ್ವಿಟರ್‌ನಲ್ಲಿ ಪ್ರತಿಕ್ರಿಯಿಸಿದ್ದಾರೆ. ಮೈದಾನಕ್ಕೆ ಅಟಲ್‌ ಹೆಸರಿಡುವುದರಿಂದ ಚುನಾವಣೆಯಲ್ಲಿ ಬಿಜೆಪಿ ಹೆಚ್ಚು ಮತ ಗಿಟ್ಟಿಸಿಕೊಳ್ಳುವುದು ಅಸಾಧ್ಯ. ಬಿಜೆಪಿಗೆ ಮತ ಗಳಿಕೆಯ ಆಸೆ ಇದ್ದರೆ, ಪ್ರಧಾನ ಮಂತ್ರಿ ಅಭ್ಯರ್ಥಿಯ ಹೆಸರು ಬದಲಾಯಿಸಬೇಕು. ಈ ಬಾರಿ ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ಜನ ಮತ ನೀಡುವುದಿಲ್ಲ ಎಂದಿದ್ದಾರೆ.
ರಾಜಕೀಯ ಬಹಿರಂಗ ಸಮಾವೇಶಗಳು, ಇನ್ನಿತರ ಕಾರ್ಯಕ್ರಮಗಳಿಗೆ ರಾಮ್‌ಲೀಲಾ ಮೈದಾನ ಪ್ರಸಿದ್ಧಿ ಪಡೆದಿದೆ.