ಪಿಂಚಣಿ ಫಾರ್ಮ್‌ಗೆ ಸೆಲ್ಫಿ ಪೋಟೊ ನಡೆಯದು

ಹೊಸದಿಲ್ಲಿ: 'ಇದು ಪಿಂಚಣಿ ಅರ್ಜಿ. ದಯವಿಟ್ಟು ಸೆಲ್ಫಿ ಫೋಟೊಗಳನ್ನು ಅಂಟಿಸಬೇಡಿ' - ಸಿಬ್ಬಂದಿ ಸಚಿವಾಲಯವು ಕೇಂದ್ರ ಸರಕಾರದ ಪಿಂಚಣಿದಾರರಿಗೆ ನೀಡಿರುವ ನೀಡಿರುವ ಸೂಚನೆ ಇದು! ಬಹುತೇಕ ಪಿಂಚಣಿದಾರರು ಪಿಂಚಣಿ ಅರ್ಜಿಗೆ ಸೆಲ್ಫಿ ಫೋಟೊಗಳನ್ನು ಅಂಟಿಸುತ್ತಿರುವುದರಿಂದ ಸಿಬ್ಬಂದಿ, ಸಾರ್ವಜನಿಕ ಅಹವಾಲು ಮತ್ತು ಪಿಂಚಣಿ ಸಚಿವಾಲಯವು ಭಾವಚಿತ್ರಕ್ಕೆ ಸಂಬಂಧಿಸಿ ಕೆಲವು ನಿರ್ದಿಷ್ಟ ಸೂಚನೆಗಳನ್ನು ನೀಡಿದೆ.

ಕೇಂದ್ರ ಸರಕಾರದ ಪಿಂಚಣಿದಾರರು ಪಿಂಚಣಿಗೆ ಅರ್ಜಿ ಸಲ್ಲಿಸುವಾಗ ತಮ್ಮ ಪತಿ/ಪತ್ನಿ ಜತೆಗಿರುವ ಮೂರು ಸೆಟ್‌ ಫೋಟೊಗಳನ್ನು ನೀಡಬೇಕಾಗುತ್ತದೆ. ಅದನ್ನು ಕಚೇರಿಯ ಹಿರಿಯ ಅಧಿಕಾರಿಯಿಂದ ದೃಢೀಕರಣ ಮಾಡಿಸಬೇಕು.

ಕಂಪ್ಯೂಟರ್‌ ಪ್ರಿಂಟೆಡ್‌ ಭಾವಚಿತ್ರಗಳೂ ನಡೆಯಲ್ಲ. ಪಿಂಚಣಿ ಅರ್ಜಿಗಳನ್ನು ತ್ವರಿತವಾಗಿ ವಿಲೇವಾರಿ ಮಾಡುವ ದೃಷ್ಟಿಯಿಂದ ಕೆಲವೊಂದು ಸುರಕ್ಷಿತ ಕ್ರಮಗಳನ್ನು ಕೈಗೊಳ್ಳಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ದೇಶದಲ್ಲಿ 48.61 ಲಕ್ಷ ಕೇಂದ್ರ ಸರಕಾರಿ ನೌಕರರಿದ್ದು, 61.17 ಲಕ್ಷ ಪಿಂಚಣಿದಾರರಿದ್ದಾರೆ.

ಏನೇನು ಮಾಡಬಾರದು?

* ಕಪ್ಪು-ಬಿಳುಪು ಭಾವಚಿತ್ರ ಸ್ವೀಕರಿಸುವುದಿಲ್ಲ.

* ನಿಗದಿತ ಜಾಗಕ್ಕಿಂತ ಸಣ್ಣ ಚಿತ್ರ ಹಾಕಬಾರದು.

*ಬಣ್ಣದ ಇಲ್ಲವೇ ಕಪ್ಪು ಕನ್ನಡಕ ಧರಿಸಿರಬಾರದು.

* ತಲೆಕೂದಲು ಕಣ್ಣನ್ನು ಮುಚ್ಚಿರಬಾರದು.

* ಸೆಲ್ಫಿ ಭಾವಚಿತ್ರಗಳಿಗೆ ಅವಕಾಶವಿಲ್ಲ.

* ತಲೆಯನ್ನು ಮೇಲೆ ಅಥವಾ ಕೆಳಗೆ ಬಾಗಿಸಿರಬಾರದು.

* ಭಾವಚಿತ್ರಗಳಲ್ಲಿ ಸಹಿ ಹಾಕಿರಬಾರದು.

* ಸಮವಸ್ತ್ರದಲ್ಲಿರುವ, ಗಾಢ ಹಿನ್ನೆಲೆ ಹೊಂದಿರುವ ಚಿತ್ರಗಳು ಬೇಡ.