ರೆಸ್ಟೊರೆಂಟ್‌ಗಳಲ್ಲಿ ನಾನ್‌ ವೆಜ್ ವಿಧ ಉಲ್ಲೇಖ ಕಡ್ಡಾಯ

ಹೊಸದಿಲ್ಲಿ: ದಿಲ್ಲಿಯ ಎಲ್ಲಾ ನಾನ್‌-ವೆಜ್‌ ರೆಸ್ಟೋರೆಂಟ್‌ಗಳಲ್ಲೂ ಇನ್ನು ಮುಂದೆ ಅಲ್ಲಿ ಸಿಗುವ ಮಾಂಸಾಹಾರದ ಬಗೆಯನ್ನು (ಹಲಾಲ್‌ ಅಥವಾ ಝಟ್ಕಾ ಮಾಂಸ) ಲಿಖಿತವಾಗಿ ಪ್ರದರ್ಶಿಸುವುದು ಕಡ್ಡಾಯವಾಗಲಿದೆ.

ಬಿಜೆಪಿ ಆಡಳಿತದ ಪೂವ ದಿಲ್ಲಿ ನಗರ ಪಾಲಿಕೆಯ ಸ್ಥಾಯಿ ಸಮಿತಿ ಈ ಕುರಿತು ನಿರ್ಣಯ ಕೈಗೊಂಡಿದ್ದು, ಆಯುಕ್ತರು ಅನುಮೋದನೆ ನೀಡಿದರೆ, ಈ ನಿಯಮ ಜಾರಿಯಾಗಲಿದೆ.

ಪಶ್ಚಿಮ ದಿಲ್ಲಿಯಲ್ಲಿ ಸಾಕಷ್ಟು ಹಿಂದೂ, ಸಿಖ್‌ ಸಮುದಾಯದವರಿದ್ದು, ಅಲ್ಲಿರುವ ಸಾಕಷ್ಟು ರೆಸ್ಟೊರೆಂಟ್‌ಗಳಲ್ಲಿ ಮಾಂಸಾಹಾರ ನೀಡಲಾಗುತ್ತಿದೆ. ಆದರೆ, ಹಿಂದೂ ಮತ್ತು ಸಿಖ್‌ ಸಮುದಾಯದಲ್ಲಿ 'ಹಲಾಲ್‌' ಸೇವನೆ ನಿಷಿದ್ಧವಾದ್ದರಿಂದ, ಮೆನುವಿನಲ್ಲೇ ಅದನ್ನು ಸ್ಪಷ್ಟವಾಗಿ ಉಲ್ಲೇಖಿಸಬೇಕೆಂದು ಸೂಚಿಸಲಾಗಿದೆ.