ದೀದಿ ಸೂಚನೆಯಿಂದ ಪೇಚಿಗೆ ಸಿಲುಕಿದ ಟಿಎಂಸಿ ಕಾರ‍್ಯಕರ್ತರು

ಕೋಲ್ಕೊತಾ: ಸರಕಾರಿ ಯೋಜನೆಗಳನ್ನು ಜನರಿಗೆ ತಲುಪಿಸಲು ಅವರಿಂದ ಪಡೆದ 'ಕಟ್‌ ಹಣ'ವನ್ನು (ಲಂಚದ ರೂಪದಲ್ಲಿ ಪಡೆದ ಹಣ) ಮರಳಿಸುವಂತೆ ಪಶ್ಚಿಮ ಬಂಗಾಳ ಸಿಎಂ ಮಮತಾ ಬ್ಯಾನರ್ಜಿ ನೀಡಿದ ಸೂಚನೆಯಿಂದ ಕಾರ‍್ಯಕರ್ತರು ಪೇಚಿಗೆ ಸಿಲುಕಿದ್ದಾರೆ. ಒಂದೊಮ್ಮೆ ಹಣ ವಾಪಸ್‌ ನೀಡಿದರೆ ನಾವು ಭ್ರಷ್ಟರು ಎಂಬುದನ್ನು ಒಪ್ಪಿಕೊಂಡಂತಾಗುವುದಲ್ಲದೇ ಇದು ಜನರಲ್ಲಿ ತಪ್ಪು ಭಾವನೆ ಮೂಡಿಸುತ್ತದೆ ಎಂಬುದು ಕಾರ‍್ಯಕರ್ತರ ಅಳಲಾಗಿದೆ. ಆದರೆ 'ದೀದಿ' ಲಂಚದ ಹಣ ವಾಪಸ್‌ ನೀಡಿದರೆ ತಪ್ಪೇನೂ ಆಗದು. ಇದು ಪಕ್ಷದಲ್ಲಿ ಶಿಸ್ತು ಇದೆ ಎಂಬ ಸಂದೇಶವನ್ನೂ ರವಾನಿಸಿದಂತಾಗುತ್ತದೆ ಎಂದು ಹೇಳುವ ಮೂಲಕ ತಮ್ಮ ನಡೆಯನ್ನು ಸಮರ್ಥಿಸಿಕೊಂಡಿದ್ದಾರೆ.

ವಿವಿಧ ಸ್ಥಳೀಯ ಸಂಸ್ಥೆಗಳ ಟಿಎಂಸಿ ಸದಸ್ಯರ ಸಭೆಯನ್ನು 'ದೀದಿ' ಜೂನ್‌ 18ರಂದು ಆಯೋಜಿಸಿದ್ದರು. ಅಲ್ಲಿ ಅವರು ಈ ಸೂಚನೆ ನೀಡಿದ್ದರು. ಪಕ್ಷ ದೊಳಗಿನಿಂದ ಭ್ರಷ್ಟಾಚಾರ ಕಿತ್ತೊಗೆಯುವುದು ಇದರ ಉದ್ದೇಶವಾಗಿತ್ತು. ಆದರೆ ಈ ಸೂಚನೆ ಬೆನ್ನಲ್ಲೇ ಜನಪ್ರತಿನಿಧಿಗಳು ಲಂಚ ಪಡೆದೇ ಸೌಲಭ್ಯಗಳನ್ನು ಒದಗಿಸುತ್ತಾರೆ ಎಂಬುದು ಸಾಬೀತಾದಂತಾಗಿದೆ ಎಂದು ಆರೋಪಿಸಿ ಅಲ್ಲಲ್ಲಿ ಪ್ರತಿಭಟನೆಗಳು ಆರಂಭವಾಗಿವೆ.

ಮಮತಾ ಬ್ಯಾನರ್ಜಿ ಅವರು, ''ಪುರಾವೆಗಳಿಲ್ಲದೇ ಯಾರ ಮೇಲೂ ದೂರುವುದು ಸರಿಯಲ್ಲ. ಹಾಗಾಗಿ ಪಕ್ಷದ ಆಂತರಿಕ ಸಭೆಯಲ್ಲಿ ಕಾರ‍್ಯಕರ್ತರಿಗೆ ಹೀಗೆ ಸೂಚನೆ ನೀಡಿದ್ದೇನೆ ಅಷ್ಟೆ. ಲಂಚ ಪಡೆದಿದ್ದೇ ಆದಲ್ಲಿ ಕಾರ‍್ಯಕರ್ತರು ಅದನ್ನು ಹಿಂದಿರುಗಿಸಬೇಕು. ಇದರಲ್ಲಿ ತಪ್ಪೇನೂ ಇಲ್ಲ,'' ಎಂದು ಹೇಳಿದ್ದಾರೆ.