ಮ.ಪ್ರದೇಶದಲ್ಲೂ ಆ್ಯಂಟಿ ರೋಮಿಯೋ ಪಡೆ

ಬೋಪಾಲ್‌: ಉತ್ತರ ಪ್ರದೇಶದ ಮಾದರಿಯಲ್ಲೇ ಮಧ್ಯಪ್ರದೇಶದಲ್ಲೂ ಆ್ಯಂಟಿ ರೋಮಿಯೋ ಪಡೆ ಅಸ್ತಿತ್ವಕ್ಕೆ ಬರಲಿದೆ.

ಉತ್ತರ ಪ್ರದೇಶದಲ್ಲಿ ರೋಡ್‌ ರೋಮಿಯೋಗಳ ಮೇಲೆ ಹತೋಟಿ ತರಲು ಆ್ಯಂಟಿ ರೋಮಿಯೋ ಪಡೆಯನ್ನು ರಚಿಸಿರುವ ಬೆನ್ನಲ್ಲೇ ಮಧ್ಯ ಪ್ರದೇಶದಲ್ಲೂ ಇದೇ ಮಾದರಿಯ ಪಡೆಯನ್ನು ರಚಿಸುವುದಾಗಿ ಮುಖ್ಯಮಂತ್ರಿ ಶಿವರಾಜ್‌ ಸಿಂಗ್‌ ಚೌಹಾಣ್‌ ತಿಳಿಸಿದ್ದಾರೆ.

ಸಬ್‌ ಇನ್ಸ್‌ಪೆಕ್ಟರ್‌ಗಳ ಸಭೆಯಲ್ಲಿ ಪಾಲ್ಗೊಂಡು ಬಳಿಕ ಮಾತನಾಡಿದ ಚೌಹಾಣ್‌, ಮಹಿಳೆಯರ ಮೇಲಿನ ಅತ್ಯಾಚಾರ ತಡೆಯಲು ನೂತನ ಕಾಯ್ದೆ ತರುವುದಾಗಿ ಹೇಳಿದ್ದಾರೆ. ಅದಕ್ಕೂ ಮೊದಲು ಬದಿ ಕಾಮಣ್ಣರನ್ನು ಮಟ್ಟಹಾಕಲು ನೂತನ ಪಡೆಯನ್ನು ರಚಿಸುವುದಾಗಿ ಹೇಳಿದ್ದಾರೆ.

2015ರಲ್ಲಿ ಮಧ್ಯ ಪ್ರದೇಶವೊಂದರಲ್ಲೇ 4,391 ಅತ್ಯಾಚಾರ ಪ್ರಕರಣಗಳು ದಾಖಲಾಗಿದ್ದವು. ಅಲ್ಲದೇ ಆತ್ಯಾಚಾರಿಗಳ ರಾಜಧಾನಿ ಎಂದೇ ಕುಖ್ಯಾತಿ ಪಡೆದಿತ್ತು. ಹೀಗಾಗಿ ಇದನ್ನು ತಪ್ಪಿಸಲು ಕಳೆದ ಬಾರಿ ಚೌಹಾಣ್‌, ಅತ್ಯಾಚಾರಿಗಳನ್ನು ನಿಯಂತ್ರಿಸಲು ಮರಣ ದಂಡನೆ ಕಾಯಿದೆ ತರುವುದಾಗಿ ಹೇಳಿದ್ದರು. ಆದರೆ ಇದಾದ ಬಳಿಕ ಈ ಕಾಯಿದೆ ಕುರಿತು ಹೆಚ್ಚಿನ ಹೇಳಿಕೆಗಳು ಕೇಳಿ ಬಂದಿರಲಿಲ್ಲ.

ಆದರೆ, ಇತ್ತೀಚಿನ ಕಾರ್ಯಕ್ರಮದಲ್ಲಿ ಮತ್ತೆ ಈ ಕಾಯಿದೆ ಕುರಿತು ಪ್ರಸ್ತಾಪಿಸಿರುವ ಚೌಹಾಣ್‌, ಮುಂಬರುವ ಮುಂಗಾರು ಅಧಿವೇಶನಲ್ಲಿ ಈ ಕಾಯಿದೆ ಕುರಿತು ಚರ್ಚಿಸಿ ವಿದೇಯಕ ಮಂಡಿಸುವುದಾಗಿ ಹೇಳಿದ್ದಾರೆ.