ತೆಲಂಗಾಣದಲ್ಲಿ ಅಗಸರಿಗೆ ವಾಷಿಂಗ್‌ ಮಷೀನ್‌

ಹೈದರಾಬಾದ್‌: ಕುಲಕಸುಬನ್ನೇ ನೆಚ್ಚಿಕೊಂಡಿರುವ ಜನರ ಜೀವನ ಮಟ್ಟ ಸುಧಾರಣೆಗೆ ಮುಂದಾಗಿರುವ ತೆಲಂಗಾಣ ಸರಕಾರ ಅಗಸಗರಿಗೆ ವಾಷಿಂಗ್‌ ಮಷೀನ್‌ ಹಾಗೂ ಇಸ್ತ್ರಿ ಪೆಟ್ಟಿಗೆ ನೀಡಲು ಮುಂದಾಗಿದೆ.

ಕುಲಕಸುಬಿಗೆ ಪೂರಕ ಸಲಕರಣೆ ನೀಡುವ ಮೂಲಕ ಅವುಗಳಿಗೆ ಆಧುನಿಕ ಸ್ಪರ್ಶ ನೀಡಲು ಮುಂದಾಗಿದೆ. ರಾಜ್ಯದಲ್ಲಿ ಅತ್ಯಾಧುನಿಕ ಸಲೂನ್‌ ಸ್ಥಾಪಿಸಲು ಕ್ಷೌರಿಕರಿಗೆ ಸರಕಾರ ಹಣಕಾಸು ನೆರವು ನೀಡಲಿದೆ.

ಈ ಹಿಂದೆ ತೆಲಂಗಾಣ ಸರಕಾರ ಯಾದವ ಸಮುದಾಯಕ್ಕೆ 4000 ಕೋಟಿ ರೂ. ವೆಚ್ಚದಲ್ಲಿ 1.5 ಲಕ್ಷ ಕುರಿಗಳನ್ನು ವಿತರಿಸಿತ್ತು.

'ಸಾಂಪ್ರಾದಾಯಿಕ ಉದ್ಯೋಗಿಗಳಿಗೆ ಆಧುನಿಕ ಸ್ಪರ್ಶ ನೀಡಲು ನಿರ್ಧರಿಸಿ ಅಗಸರಿಗೆ ವಾಷಿಂಗ್‌ ಮಷೀನ್‌ ಹಾಗೂ ಇಸ್ತ್ರಿ ಪೆಟ್ಟಿಗೆ ನೀಡುತ್ತಿದ್ದೇವೆ. ಇಂಥ ಯೋಜನೆಗಳಿಗೆ ಬಜೆಟ್‌ನಲ್ಲಿ 500 ಕೋಟಿ ರೂ. ನಿಗದಿ ಪಡಿಸಲಾಗಿದೆ. ಈ ಯೋಜನೆಗಳಿಗೆ ಮುಖ್ಯಮಂತ್ರಿ ಕೆ. ಚಂದ್ರಶೇಖರ್‌ ರಾವ್‌ ಜುಲೈನಲ್ಲಿ ಚಾಲನೆ ನೀಡಲಿದ್ದಾರೆ,' ಎಂದು ವಿತ್ತ ಸಚಿವ ಇ. ರಾಜೇಂದ್ರ ತಿಳಿಸಿದ್ದಾರೆ.