ವಾರದೊಳಗೆ ಎನ್ನಾರೈ ಮದುವೆ ನೋಂದಣಿ ಕಡ್ಡಾಯ

ಹೊಸದಿಲ್ಲಿ: ಎನ್ನಾರೈ (ಅನಿವಾಸಿ ಭಾರತೀಯರು) ಜೋಡಿಗಳು ವಿವಾಹವಾದ ಒಂದು ವಾರದೊಳಗೆ ಮದುವೆ ನೋಂದಣಿ ಮಾಡಿಸಿಕೊಳ್ಳುವುದು ಕಡ್ಡಾಯವಾಗಲಿದೆ. ಒಂದೊಮ್ಮೆ ಈ ಅವಧಿಯಲ್ಲಿ ನೋಂದಣಿಯಾಗದಿದ್ದಲ್ಲಿ ಅಂತಹ ಎನ್ನಾರೈಗಳಿಗೆ ಪಾಸ್‌ಪೋರ್ಟ್‌ ಮತ್ತು ವೀಸಾ ನೀಡಲಾಗುವುದಿಲ್ಲ ಎಂದು ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಸಚಿವಾಲಯ ಹೇಳಿದೆ. ಈ ಸಂಬಂಧ ಗುರುವಾರ ಅಧಿಕೃತ ಅಧಿಸೂಚನೆಯನ್ನೂ ಹೊರಡಿಸಲಾಗಿದೆ.

ಕಳೆದ ವಾರವಷ್ಟೇ ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಸಚಿವೆ ಮೇನಕಾ ಗಾಂಧಿ ಅವರು ಇನ್ಮುಂದೆ ಎನ್ನಾರೈ ಜೋಡಿಗಳು ಮದುವೆಯಾದ 48 ಗಂಟೆಯೊಳಗೆ ಅದನ್ನು ನೋಂದಣಿ ಮಾಡಿಸಿಕೊಳ್ಳುವುದು ಕಡ್ಡಾಯ ಎಂಬ ಹೇಳಿಕೆ ನೀಡಿದ್ದರು. ಆದರೆ ಇಂತಹ ಮದುವೆಗಳಲ್ಲಿ ಮಹಿಳೆ ಅನುಭವಿಸುವ ನಾನಾ ಬಗೆಯ ಸಮಸ್ಯೆಗಳ ಕುರಿತು ಬುಧವಾರ ಮೇನಕಾ ಗಾಂಧಿ, ಗೃಹ ಸಚಿವ ರಾಜನಾಥ್‌ ಸಿಂಗ್‌, ವಿದೇಶಾಂಗ ವ್ಯವಹಾರಗಳ ಸಚಿವೆ ಸುಷ್ಮಾ ಸ್ವರಾಜ್‌ ಮತ್ತು ಕಾನೂನು ಸಚಿವ ರವಿಶಂಕರ್‌ ಪ್ರಸಾದ್‌ ನೇತೃತ್ವದಲ್ಲಿ ನಡೆದ ಉನ್ನತ ಸಭೆಯು ನೋಂದಣಿ ಪ್ರಕ್ರಿಯೆಗೆ ಒಂದು ವಾರದ ಕಾಲಾವಕಾಶ ನೀಡುವ ನಿರ್ಧಾರ ಕೈಗೊಂಡಿದೆ.

ಇದುವರೆಗೂ ಭಾರತದಲ್ಲಿ ನಡೆಯುವ ಎನ್ನಾರೈ ಮದುವೆಗಳ ನೋಂದಣಿಗೆ ಯಾವುದೇ ಸಮಯಮಿತಿ ಇರಲಿಲ್ಲ. ಕೆಲವು ದಿನಗಳ ಹಿಂದಷ್ಟೇ ಕಾನೂನು ಆಯೋಗವು, ಎನ್ನಾರೈ ಮದುವೆಗಳು 30 ದಿನದೊಳಗೆ ನೋಂದಣಿಯಾಗಬೇಕು. ಈ ಗಡುವು ದಾಟಿದಲ್ಲಿ ದಿನಕ್ಕೆ 5 ರೂ.ನಂತೆ ದಂಡ ವಿಧಿಸಬೇಕೆಂದು ವರದಿಯಲ್ಲಿ ಶಿಫಾರಸು ಮಾಡಿತ್ತು.