ಸಲಿಂಗ ಸಂಗಕ್ಕೊಂದು ವೈವಾಹಿಕ ಕೇಂದ್ರ

ವಡೋದರಾ: ಸಲಿಂಗಕಾಮಿಗಳ ಬಗೆಗಿನ ಅಸಡ್ಡೆ ಭಾರತದಂಥ ಮಡಿವಂತಿಕೆಯ ದೇಶಗಳಲ್ಲಿಯೂ ಕಡಿಮೆಯಾಗುತ್ತಿದೆ. ಅವರಿಗೂ ಒಂದು ಮನಸ್ಸಿದೆ, ಅವರ ಭಾವನೆಗಳಿಗೂ ಬೆಲೆ ನೀಡುವ ನಿಟ್ಟಿನಲ್ಲಿ ಅನಿವಾಸಿ ಭಾರತೀಯರೊಬ್ಬರು ಭಾರತದಲ್ಲಿ ಮೊದಲ ವೈವಾಹಿಕ ನೋಂದಣಿ ಕೇಂದ್ರವನ್ನು ಆರಂಭಿಸಿದ್ದು, ದೇಶದೊಳಗೆ ಅಥವಾ ವಿದೇಶದಲ್ಲಿರುವ ಸೂಕ್ತ ಸಂಗಾತಿಯನ್ನು ಹುಡುಕಿಕೊಳ್ಳಲು ನೆರವಾಗುತ್ತಿದ್ದಾರೆ.

ಸಾಮಾನ್ಯವಾಗಿ ಸಲಿಂಗಕಾಮಿಗಳು ತಮ್ಮ ಸಂಗಾತಿಯನ್ನು ತಾವೇ ಹುಡುಕಿಕೊಂಡು, ಅವರೊಂದಿಗೆ ಜೀವಿಸುತ್ತಾರೆಂಬ ನಂಬಿಕೆ ಇದೆ. ಆದರೆ, 2013ರವರೆಗೆ ಸಲಿಂಗಕಾಮಿಗಳ ಹಕ್ಕುಗಳಿಗಾಗಿ ಹೋರಾಡಿದ್ದ ಬೆನ್ಹೂರ್ ಸ್ಯಾಮ್ಸನ್ ಅವರಿಗೆ ಸೂಕ್ತ ಸಂಗಾತಿ ಹುಡುಕಿಕೊಡುವಂತೆ ಆಗ್ರಹಿಸಿ ಬಂದ ಪತ್ರಗಳು ಇಂಥದ್ದೊಂದು ಕಾರ್ಯ ಆರಂಭಿಸಲು ಪ್ರೆರೇಪಿಸಿದವು.

ಸಲಿಂಗ ಸಂಗವನ್ನು ಹೊಂದಿರುವ ರಾಜ ರಾಜ್‌ಪಿಪ್ಲ ಮತ್ತು ಮಾನ್ವೇಂದ್ರ ಸಿಂಗ್ ಗೋಹಿಲ್ ಅವರ ನೆರವು ಪಡೆದು, ವಿದೇಶ ಸಂಗಾತಿಯಾದರೆ ವಲಸೆ ಮುಂತಾದ ಪ್ರಕ್ರಿಯೆಗಳನ್ನು ಮುಗಿಸಲು ವಕೀಲರ ಸಹಕಾರದಿಂದ ಸಲಹಾಕಾರರಾಗಿ ಕಾರ್ಯನಿರ್ವಹಿಸಲು ಆರಂಭಿಸಿದ್ದಾರೆ.

'ಅನೇಕರು ಭಾರತದವರನ್ನೇ ತಮ್ಮ ಸಂಗಾತಿಗಳನ್ನಾಗಿ ಬಯಸಲು ಇಚ್ಛಿಸುತ್ತಿದ್ದು, ಭಾರತದಲ್ಲಿ ಹಿರಿಯರು ನೋಡಿದ ಮದುವೆಯೇ ಸಾಮಾನ್ಯವಾಗಿದ್ದರಿಂದ ಈ ವರ್ಗದ ಜನರೂ ಅದನ್ನೇ ಬಯಸುತ್ತಾರೆ. ಅದೂ ಅಲ್ಲದೇ ಭಾರತೀಯರು ಬದ್ಧತೆ, ಸಂಗಾತಿಗಳಿಗೆ ಪ್ರಾಮಾಣಿಕವಾಗಿರುವುದು ಹಾಗೂ ಶ್ರಮ ಜೀವನಕ್ಕೆ ಹೆಚ್ಚು ಒತ್ತು ನೀಡುತ್ತಾರೆ,' ಎನ್ನುತ್ತಾರೆ ಸ್ಯಾಮ್ಸನ್.

'ಭಾರತೀಯರು ಹೆಚ್ಚು ಮಾದಕ ವ್ಯಸನಿಗಳಲ್ಲದ ಕಾರಣ ಇಲ್ಲಿನ ಸಂಗಾತಿಗಳನ್ನು ಪಡೆಯಲು ಇತರೆ ದೇಶದ ನಿವಾಸಿಗಳೂ ಬಯಸುತ್ತಾರೆ. ಕಳೆದ ಮೂರು ತಿಂಗಳಲ್ಲಿ ಸುಮಾರು 250 ವಿಚಾರಣೆಗಳು ಬಂದಿದ್ದು, 24 ಮಂದಿ ನೋಂದಣಿ ಮಾಡಿಸಿಕೊಂಡಿದ್ದಾರೆ,' ಎನ್ನುತ್ತಾರೆ ಸ್ಯಾಮುಯೆಲ್.