ಜಲಂಧರ್‌ನ ಮಾಜಿ ಬಿಷಪ್‌ ವಿರುದ್ಧ ಪ್ರತಿಭಟಿಸಿದ್ದಕ್ಕಾಗಿ ಸಿಸ್ಟರ್‌ ಲೂಸಿ ಉಚ್ಚಾಟನೆ

ಕೊಚ್ಚಿ: ಜಲಂಧರ್‌ನ ಮಾಜಿ ಬಿಷಪ್‌ ಆರೋಪಿಯಾಗಿರುವ ಅತ್ಯಾಚಾರ ಪ್ರಕರಣವನ್ನು ಖಂಡಿಸಿ ನಡೆಸಲಾಗುತ್ತಿದ್ದ ಪ್ರತಿಭಟನೆಯಲ್ಲಿ ಭಾಗಿಯಾಗಿದ್ದ ಕ್ರೈಸ್ತ ಸನ್ಯಾಸಿನಿಯೊಬ್ಬರನ್ನು ಫ್ರಾನ್ಸಿಸ್ಕನ್‌ ಕ್ಲಾರಿಸ್ಟ್‌ ಸಭೆಯಿಂದ (ಎಫ್‌ಸಿಸಿ) ಉಚ್ಚಾಟಿಸಲಾಗಿದೆ. ''ನಾವು ಹಲವು ಬಾರಿ ಎಚ್ಚರಿಕೆಯನ್ನು ನೀಡಿದ್ದರೂ ಕೂಡ ಸಿಸ್ಟರ್‌ ಲೂಸಿ ಕಲಪ್ಪುರ ತಮ್ಮ ನಡವಳಿಕೆ ಬದಲಾಯಿಸಿಕೊಳ್ಳಲಿಲ್ಲ. ಎಫ್‌ಸಿಸಿ ಕಾನೂನು ಉಲ್ಲಂಘಿಸುತ್ತಲೇ ಹೋದರು,'' ಎಂದು ಸಭೆ ಸಮರ್ಥನೆ ನೀಡಿದೆ. ರೋಮನ್‌ ಕ್ಯಾಥೊಲಿಕ್‌ ಚರ್ಚ್‌ ಅಡಿಯಲ್ಲಿ ಎಫ್‌ಸಿಸಿ ಕಾರ್ಯನಿರ್ವಹಿಸುತ್ತದೆ. ಆಗಸ್ಟ್‌ 5ರಂದು ಅಳುವಾ ಮೂಲದ ಸಭೆಯ ಮುಖ್ಯಸ್ಥ ಅನ್‌ ಜೋಸೆಫ್‌ ಸಿಸ್ಟರ್‌ ಲೂಸಿ ಅವರನ್ನು ಉಚ್ಚಾಟಿಸಿ ಆದೇಶ ಹೊರಡಿಸಿದ್ದಾರೆ.

ಸಭೆ ಆದೇಶವನ್ನು ಶೇ.100ರಷ್ಟು ತಪ್ಪು ಗ್ರಹಿಕೆ ಎಂದು ಖಂಡಿಸಿರುವ ಸಿಸ್ಟರ್‌ ಲೂಸಿ, ತಮ್ಮ ವಿರುದ್ಧ ಹೊರಿಸಲಾಗಿರುವ 14 ಆರೋಪಗಳು ಕೇವಲ ತಮ್ಮನ್ನು ಕೆಟ್ಟದಾಗಿ ಚಿತ್ರಿಸುವುದಕ್ಕಾಗಿ ಮಾತ್ರ ಎಂದಿದ್ದಾರೆ. ಕಾನೂನು ಹೋರಾಟಕ್ಕೆ ಕಾನೂನು ತಜ್ಞರು ನೆರವಾಗುವಂತೆ ಕೋರಿದ್ದಾರೆ.

ಜಲಂಧರ್‌ನ ಮಾಜಿ ಬಿಶಪ್‌ ಮುಳಕ್ಕಲ್‌ ವಿರುದ್ಧ ಮಿಷನರೀಸ್‌ ಆಫ್‌ ಜೀಸಸ್‌ನ ಐವರು ನನ್‌ಗಳು ಕಳೆದ ವರ್ಷ ಕೊಚ್ಚಿಯಲ್ಲಿ ರಸ್ತೆಗಿಳಿದು ಪ್ರತಿಭಟನೆ ನಡೆಸಿದ್ದರು. ಇದರಲ್ಲಿ ಸಿಸ್ಟರ್‌ ಲೂಸಿ ಭಾಗಿಯಾಗಿದ್ದರು ಎನ್ನಲಾಗಿದೆ.