ಓಲಾ,ಊಬರ್ ಬಳಕೆಯಿಂದ ಅಟೋಮೊಬೈಲ್ ಉದ್ಯಮ ಕುಸಿತ- ನಿರ್ಮಲಾ ಸೀತಾರಾಮನ್ ವ್ಯಾಖ್ಯಾನ ಟ್ವಿಟರಲ್ಲಿ ಸಿಕ್ಕಾಪಟ್ಟೆ ಟ್ರೋಲ್

ಹೊಸದೆಹಲಿ- ದೇಶದಲ್ಲಿ ಆಟೋಮೊಬೈಲ್ ಉದ್ಯಮ ಕುಸಿತಕ್ಕೆ ಯುವ ಪೀಳಿಗೆಯ ಜನರು ಓಲಾ, ಊಬರ್ ನಂತಹಾ ಟಾಕ್ಸಿ ಸರ್ವಿಸ್ ಹಾಗೂ ಮೆಟ್ರೋ ಬಳಕೆ ಮಾಡುತ್ತಿರುವುದು ಕಾರಣ ಎಂದು ಕೇಂದ್ರ ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್ ಹೇಳಿಕೆ ಟ್ವಿಟರ್ ಸೇರಿದಂತೆ ಸಾಮಾಜಿಕ ಜಾಲತಾಣಗಳಲ್ಲಿ ಸಿಕ್ಕಾ ಪಟ್ಟೆ ಸದ್ದು ಮಾಡುತ್ತಿದೆ.

ವಹಿವಾಟು ಪ್ರಮಾಣದಲ್ಲಿ ತೀವೃ ಕುಸಿತ ಕಂಡ ಪರಿಣಾಮ ಅಟೋಮೊಬೈಲ್ ಉದ್ಯಮ ನೆಲಕಚ್ಚಿದ್ದು ಹಲವಾರು ಉದ್ಯೋಗಿಗಳು ಕೆಲಸ ಕಳೆದುಕೊಂಡಿದ್ದಾರೆ. ಖರೀದಿದಾರರಿಗೆ ಆಕರ್ಷಕ ಕೊಡುಗೆ ನೀಡಿದರೂ ಕೊಳ್ಳುವವರ ಸಂಖ್ಯೆ ಮಾತ್ರ ಗಣನೀಯವಾಗಿ ಇಳಿಕೆಯಾಗುತ್ತಿದೆ. ಈ ಕುರಿತಾಗಿ ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಪ್ರತಿಕ್ರಿಯೆ ನೀಡಿ, ಇಂದಿನ ಯುವ ಪೀಳಿಗೆ ಸ್ವಂತ ಕಾರು ಖರೀದಿ ಮಾಡಿ ಇಎಂಐಗೆ ಸಿಕ್ಕಿಹಾಕಿಕೊಳ್ಳಲು ಇಷ್ಟಪಡದೆ ಓಲಾ, ಊಬರ್ ಟಾಕ್ಸಿ ಹಾಗೂ ಮೆಟ್ರೋ ಬಳಕೆ ಮಾಡುತ್ತಿದ್ದಾರೆ. ಇದರ ಪರಿಣಾಮ ಅಟೋಮೊಬೈಲ್ ಉದ್ಯಮದಲ್ಲಿ ಭಾರೀ ಕುಸಿತಕ್ಕೆ ಕಾರಣ ಎಂದಿದ್ದರು.

ನಿರ್ಮಲಾ ಸೀತಾರಾಮನ್ ವ್ಯಾಖ್ಯಾನ ಸಾಮಾಜಿಕ ಜಾಲತಾಣಗಳಲ್ಲಿ ಸಿಕ್ಕಾಪಟ್ಟೆ ಟ್ರೋಲ್ ಆಗುತ್ತಿದೆ. ಟ್ವಿಟರಿಗರು #BoycottMillenialls ಹಾಗೂ #SayItLikeNirmalaTai ಎಂಬ ಹ್ಯಾಶ್ ಟ್ಯಾಗ್ ಮೂಲಕ ಸ್ಟೇಟಸ್, ಕಾಮೆಂಟ್ ಮಾಡುತ್ತಿದ್ದಾರೆ. ಕೇಂದ್ರ ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್ ಹೇಳಿಕೆಯನ್ನು ಹಲವು ಟ್ವಿಟರಿಗರು ಭಿನ್ನವಾಗಿ ವ್ಯಂಗ್ಯದ ಮೂಲಕ ತರಾಟೆಗೆ ತೆಗೆದುಕೊಂಡರೆ, ಇನ್ನು ಕೆಲವರು ಸಮರ್ಥನೆ ಮಾಡಿದ್ದಾರೆ.

ಸುಖಾದಾ ಎಂಬ ಟ್ವಿಟರ್ ಬಳಕೆದಾರರೊಬ್ಬರು ಹೀಗೆ ಟ್ರೋಲ್ ಮಾಡಿದ್ದು "ಜನರು ಹೆಚ್ಚಾಗಿ ಆನ್ ಲೈನ್‌ನಲ್ಲಿರುವುದೇ ರಿಯಲ್ ಎಸ್ಟೇಟ್ ಉದ್ಯಮ ಕುಸಿತಕ್ಕೆ ಕಾರಣವಾಗಿದೆ "ಎಂದಿದ್ದಾರೆ.



ವಿದ್ವತ್ ಎಂಬುವವರು ಇಂಟರ್‌ನೆಟ್‌ನಲ್ಲಿ ಜನರು ಪ್ರವಾಸಿ ತಾಣಗಳ ಪೋಟೋಗಳನ್ನು ನೋಡುತ್ತಿರುವುದರಿಂದ ಪ್ರವಾಸೋದ್ಯಮ ಕುಸಿತಕ್ಕೆ ಕಾರಣವಾಗಿದೆ ಎಂದಿದ್ದಾರೆ.



ಕಾಶ್ಮೀರದಲ್ಲಿ ನಿರ್ಬಂಧದಿಂದಾಗಿ ಆಪಲ್ ಸಾಗಾಟಕ್ಕೆ ಸಮಸ್ಯೆ ಆಗುತ್ತಿರುವುದರಿಂದ ಆಪಲ್ 11 ಪೋನ್ ದುಬಾರಿಯಾಗಿದೆ ಎಂದು ಟ್ವೀಟ್ ಮಾಡುವ ಮೂಲಕ ಕಾಂಗ್ರೆಸ್ ವಕ್ತಾರ ಸಂಜಯ್ ಝಾ ನಿರ್ಮಲಾ ಸೀತಾರಾಮನ್ ಕಾಲೆಳೆದಿದ್ದಾರೆ.


ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್ ಹೇಳಿಕೆಯನ್ನು ಹೀಗೆ ವ್ಯಂಗವಾಗಿ ಟ್ವಟರಿಗರು ಟ್ರೋಲ್ ಮಾಡುವ ಮೂಲಕ ವಿರೋಧಿಸಿದರೆ ಕೆಲವರು ಬೆಂಬಲಿಸಿದ್ದಾರೆ. ಆರ್ಥಿಕ ಹಿಂಜರಿತದ ಪರಿಣಾಮ ಪ್ರಸ್ತುತ ವರ್ಷದಲ್ಲಿ ವಾಹನ ಮಾರಾಟ ಪ್ರಮಾಣದಲ್ಲಿ ಶೇ. 30.9 ರಷ್ಟು ಕುಸಿತ ಕಂಡಿದೆ. ಆಗಸ್ಟ್ ತಿಂಗಳಲ್ಲಿ 1,95,558 ಯೂನಿಟ್‌ಗಳ ಉತ್ಪಾದನೆಯಾಗಿದ್ದರೆ ಕಳೆದ ವರ್ಷ ಈ ಅವಧಿಯಲ್ಲಿ 2,82,809 ಯೂನಿಟ್‌ಗಳಷ್ಟು ಉತ್ಪಾದನೆಯಾಗಿತ್ತು.