ಬೆಂಗಳೂರು: ಕಡಿಮೆ ದರದ ವಿಮಾನ ಹಾರಾಟ ಸೇವೆ ಒದಗಿಸುವ ಗೋ ಏರ್‌ ದೋಷಪೂರಿತ ವಿಮಾನಗಳ ಎಂಜಿನ್‌ಗಳನ್ನು ನಿಗದಿತ ಅವಧಿಯಲ್ಲಿ ಬದಲಾಯಸಲಾಗದ ಕಾರಣ ಮತ್ತು ಹೊಸ ವಿಮಾನಗಳ ಅಲಭ್ಯತೆಯಿಂದಾಗಿ ಮುಂದಿನ ದಿನಗಳಲ್ಲಿ ವಿಮಾನಗಳ ಹಾರಾಟದ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರುವ ಸಾಧ್ಯತೆಯಿದೆ.

‘‘ಕಳೆದ 3 ವರ್ಷಗಳಿಂದ ಗೋ ಏರ್‌ ವಾರ್ಷಿಕ ಶೇ. 30ರ ದರದಲ್ಲಿ ಬೆಳವಣಿಗೆ ಸಾಧಿಸುತ್ತಿದೆ. ಬೆಳವಣಿಗೆ ಮತ್ತು ಬೇಡಿಕೆ ಗಮನದಲ್ಲಿಟ್ಟುಕೊಂಡು ಏರ್‌ಬಸ್‌ ಕಂಪನಿಯಿಂದ 144 ವಿಮಾನಗಳಿಗೆ ಆರ್ಡರ್‌ ನೀಡಿದ್ದು, 2025ರ ವೇಳೆಗೆ ಎಲ್ಲಾ ವಿಮಾನಗಳ ಸೇರ್ಪಡೆಯಾಗಬೇಕಾಗಿತ್ತು. ಆದರೆ, ಕಳೆದ ಕೆಲವು ವಾರಗಳಿಂದ ನಮ್ಮ ಹಲವು ವಿಮಾನಗಳು ಹಾರಾಟ ನಿಲ್ಲಿಸಿವೆ. ಇದರ ಪರಿಣಾಮ ವಿಮಾನಗಳ ಕಾರ್ಯಾಚರಣೆ ಮೇಲೆ ಬಿದ್ದಿದೆ. ಈ ನಡುವೆ ವಿಮಾನ ಒದಗಿಸುವ ಏರ್‌ಬಸ್‌ ಹಾಗೂ ಎಂಜಿನ್‌ ಪೂರೈಸುವ ಪ್ರ್ಯಾಟ್‌ ಆ್ಯಂಡ್‌ ವೀಟ್ನಿ ನಿಗದಿತ ಅವಧಿಯಲ್ಲಿ (2020ರ ಮಾ.9) ಭರವಸೆ ನೀಡಿದಷ್ಟು ವಿಮಾನ ಮತ್ತು ಎಂಜಿನ್‌ ಪೂರೈಸಲು ಆಗುವುದಿಲ್ಲ ಎಂದು ತಿಳಿಸಿವೆ. ಇದರಿಂದ ಬೇಡಿಕೆ, ಬೆಳವಣಿಗೆಗೆ ತಕ್ಕಂತೆ ಕಾರ್ಯಾಚರಣೆ ನಡೆಸಲು ಆಗುವುದಿಲ್ಲ. ಈ ಕಾರಣಕ್ಕಾಗಿ ಹಲವು ವಿಮಾನಗಳ ಹಾರಾಟ ಸ್ಥಗಿತಗೊಳಿಸಲಾಗುತ್ತಿದೆ. ಪ್ರಯಾಣಿಕರಿಗೆ ಆಗುವ ತೊಂದರೆಗೆ ವಿಷಾದ ವ್ಯಕ್ತಪಡಿಸುತ್ತೇವೆ,’’ ಎಂದು ಗೋ ಏರ್‌ ಪ್ರಕಟಣೆಯಲ್ಲಿ ತಿಳಿಸಿದೆ.

ಬೆಂಗಳೂರು: ಗೋ ಏರ್ ಏರ್ಲೈನ್ಸ್ ವಿರುದ್ಧ ನಿಲ್ದಾಣದಲ್ಲೇ ಪ್ರತಿಭಟನೆ ನಡೆಸಿದ ಪ್ರಯಾಣಿಕರು


‘‘ಗೋ ಏರ್‌ ಹೊಂದಿರುವ ಏರ್‌ಬಸ್‌ ಎ - 320 ನಿಯೋ ವಿಮಾನದ ಎಂಜಿನ್‌ಗಳು ದೋಷಪೂರಿತವಾಗಿರುವ ಕಾರಣ ಅವುಗಳನ್ನು ಬದಲಿಸಿ ಹೊಸ ಎಂಜಿನ್‌ ಅಳವಡಿಸಿಕೊಳ್ಳಲು ಕೇಂದ್ರ ನಾಗರಿಕ ವಿಮಾನಯಾನ ನಿರ್ದೇಶನಾಲಯ (ಡಿಜಿಸಿಎ) ಗಡುವು ನೀಡಿದೆ. ಒಂದು ವೇಳೆ ಗಡುವಿನ ಒಳಗೆ ಎಂಜಿನ್‌ ಬದಲಾವಣೆ ಮಾಡಿಕೊಳ್ಳದಿದ್ದರೆ ವಿಮಾನ ಹಾರಾಟ ಸ್ಥಗಿತಗೊಳಿಸುವುದು ಅನಿವಾರ್ಯ,’’ ಎಂದು ಡಿಜಿಸಿಎ ತಿಳಿಸಿದೆ.