ಮೊಲವನ್ನು ಹಿಮ್ಮೆಟ್ಟುವ ಆಮೆ !

ಚೆನ್ನೈ: ವಂಡಲೂರ್ ಮೃಗಾಲಯದಲ್ಲಿರುವ 2 ವರ್ಷಗಳ ಆಮೆ ಓಟದಲ್ಲಿ ಮೊಲವನ್ನು ಹಿಮ್ಮೆಟ್ಟಿದ್ದರೆ ಆಶ್ಚರ್ಯ ಪಡಬೇಕಿಲ್ಲ.

ಪೆಟ್ಟು ಬಿದ್ದ ಕಾಲನ್ನು ಕತ್ತರಿಸಬೇಕಾದಾಗ, ಇನ್ನು ಈ ಆಮೆ ಇತರ ಆಮೆಗಳಿಗಿಂತಲೂ ನಿಧಾನವಾಗಿ ಚಲಿಸಬಹುದೆಂದು ಮೃಗಾಲಯದ ಅಧಿಕಾರಿಗಳು ಭಾವಿಸಿದ್ದರು. ಆದರೆ, ಈಗ ಕಾಲಿನ ಬದಲು ಚಕ್ರವನ್ನು ಜೋಡಿಸಿರುವುದರಿಂದ ವೇಗದಲ್ಲಿ ಇದು ಮೊಲವನ್ನು ಹಿಮ್ಮೆಟ್ಟಬಹುದು ಎನ್ನುತ್ತಿದ್ದಾರೆ.

'ದೊಡ್ಡ ಆಮೆ ಈ ಚಿಕ್ಕ ಆಮೆ ಮೇಲೆ ದಾಳಿ ನಡೆಸಿದಾಗ ಅದರ ಕಾಲಿಗೆ ಪೆಟ್ಟಾಯಿತು. ನಂತರ ಇತರ ಆಮೆಗಳು ಅದೇ ಕಾಲಿಗೆ ಪೆಟ್ಟು ಮಾಡಿದ್ದವು,'ಎಂದು ಮೃಗಾಲಯದ ನಿರ್ದೇಶಕ ಕೆಎಸ್‌ಎಸ್‌ವಿಪಿ ರೆಡ್ಡಿ ಹೇಳಿದ್ದಾರೆ.

ತನ್ನ ಪಾಲಿನ ಆಹಾರವನ್ನು ತೆಗೆದುಕೊಳ್ಳಲು ಬಟ್ಟಲ ಬಳಿಗೆ ಕ್ರಮಿಸಲಾಗದೆ ಒದ್ದಾಡುತ್ತಿದ್ದ ಆಮೆಯನ್ನು ಗಮನಿಸಿದ ಪಾಲಕರು, ಪಶುವೈದ್ಯರಿಗೆ ವಿಷಯ ತಿಳಿಸಿದ್ದರು.

2 ಚಕ್ರ :

ಆಮೆಯನ್ನು ಪರೀಕ್ಷಿಸಿದ ವೈದ್ಯರು ಊನಗೊಂಡಿದ್ದ ಕಾಲನ್ನು ತೆಗೆದು, ಪುಟ್ಟ ಚಕ್ರ ಅಳವಡಿಸಲು ನಿರ್ಧರಿಸಿದರು. 30 ನಿಮಿಷಗಳ ಶಸ್ತ್ರಚಿಕಿತ್ಸೆಯಲ್ಲಿ ಎರಡು ಚಕ್ರಗಳನ್ನು ಅಳವಡಿಸಿದ್ದಾರೆ. ಒಂದು ಎಡಗಾಲಿನ ಮುಂದೆ ಹಾಗೂ ಮತ್ತೊಂದನ್ನು ಹಿಂಭಾಗದಲ್ಲಿ ಅಳವಡಿಸಲಾಗಿದೆ. ಸಣ್ಣ, ಹಗುರವಾದ ರಾಡ್‌ನಿಂದ ಎರಡರ ನಡುವೆ ಸಂಕರ್ಪ ಕಲ್ಪಿಸಲಾಗಿದೆ.

'ಶಸ್ತ್ರಚಿಕಿತ್ಸೆಯಾದ ಕೆಲವೇ ನಿಮಿಷಗಳಲ್ಲಿ ಆಮೆ ಸಲೀಸಾಗಿ ಓಡಾಡಲು ಆರಂಭಿಸಿದೆ. ಉಳಿದೆಲ್ಲ ಆಮೆಗಳಿಗಿಂತ ವೇಗವಾಗಿ ಅದು ಆಹಾರ ಬಟ್ಟಲಿರುವ ಸ್ಥಳ ತಲುಪುತ್ತಿದೆ,'ಎಂದು ರೆಡ್ಡಿ ಹೇಳಿದ್ದಾರೆ.