ಚೆನ್ನೈ: ಶಶಿಕಲಾ ಅವರು ಶಾಸಕರನ್ನು ಬಲವಂತವಾಗಿ ಕೂಡಿಟ್ಟುಕೊಂಡಿದ್ದಾರೆ ಎಂಬ ಆರೋಪಕ್ಕೆ ಪುಷ್ಠಿ ನೀಡುವಂತೆ ಮಧುರೈ ಶಾಸಕ ಶರವಣಂ ಅವರು ಶಶಿ ಕ್ಯಾಂಪ್‌ನಿಂದ ತಪ್ಪಿಸಿಕೊಂಡು ಸಿಎಂ ಪನ್ನೀರ ಸೆಲ್ವಂ ಬಣ ಸೇರಿದ್ದಾರೆ.
ಇದರೊಂದಿಗೆ ಸೆಲ್ವಂರನ್ನು ಬೆಂಬಲಿಸುತ್ತಿರುವ ಶಾಸಕರ ಬಲ 9ಕ್ಕೇರಿದೆ. ಶಶಿಕಲಾ ಅವರು ಶಾಸಕರನ್ನು ಇರಿಸಿರುವ ಗೋಲ್ಡನ್‌ ಬೇ ರೆಸಾರ್ಟ್‌ನಿಂದ ಸೋಮವಾರ ರಾತ್ರಿ ತಪ್ಪಿಸಿಕೊಂಡು ಮದುರೈ ಸಂಸದ ಆರ್‌ ಗೋಪಾಲಕೃಷ್ಣನ್‌ ಅವರೊಂದಿಗೆ ಸೆಲ್ವಂ ನಿವಾಸಕ್ಕೆ ದೌಡಾಯಿಸಿದ ಶರವಣಂ, ತನ್ನಂತೆಯೇ ಹಲವು ಶಾಸಕರು ಅಣ್ಣ ಪನ್ನೀರಸೆಲ್ವಂ ಅವರ ಬೆಂಬಲಕ್ಕಿದ್ದು, ದಿನಗಳೆದಂತೆ ಅವರೆಲ್ಲರೂ ಬಣ ಬದಲಿಸಲಿದ್ದಾರೆ. ಅಣ್ಣ ಸೆಲ್ವಂ ಅವರೇ ಬಹುಮತ ಸಾಬೀತುಪಡಿಸಲಿದ್ದಾರೆ ಎಂದು ಘೋಷಿಸಿದರು. ಸಂಸದ ಗೋಪಾಲಕೃಷ್ಣನ್‌ ಕೂಡ ಸೆಲ್ವಂ ಬಣ ಸೇರುವುದರೊಂದಿಗೆ ಅವರಿಗಿರುವ ಸಂಸದರ ಬೆಂಬಲ 12ಕ್ಕೇರಿದೆ.