ಇಸ್ರೋ ಉಪಗ್ರಹ ವಿಫಲಕ್ಕೆ ಇಲ್ಲಿದೆ ಕಾರಣ

ಬೆಂಗಳೂರು: ಭಾರತೀಯ ಬಾಹ್ಯಾಕಾಶ ಸಂಸ್ಥೆಯ (ಇಸ್ರೊ) ಮಹತ್ವಾಕಾಂಕ್ಷೆಯ ಐಆರ್‌ಎನ್‌ಎಸ್‌ಎಸ್‌-1ಎಚ್‌ ದಿಕ್ಸೂಚಿ ಉಪಗ್ರಹ ಉಡಾವಣೆ ವಿಫಲತೆಗೆ ಹೀಟ್‌ ಶೀಲ್ಡ್‌ ಮೇಲಿದ್ದ ಹೆಚ್ಚುವರಿ ಒಂದು ಟನ್‌ಗಳ ತೂಕ ಕಾರಣ ಎಂದು ಹೇಳಲಾಗಿದೆ.

ಕಳೆದ ಗುರುವಾರದಂದು ಐಆರ್‌ಎನ್‌ಎಸ್‌ಎಸ್‌-1ಎಚ್‌ ದಿಕ್ಸೂಚಿ ಉಪಗ್ರಹ ಉಡಾವಣೆ ಬಳಿಕ ನಾಲ್ಕು ಹಂತದವರೆಗೆ ಎಲ್ಲವೂ ಲೆಕ್ಕಾಚಾರದಂತೆ ನಡೆಯಿತು. ಆದರೆ ಹೀಟ್‌ ಶೀಲ್ಡ್‌ ಮೇಲಿದ್ದ ಹೆಚ್ಚುವರಿ ತೂಕವು ಉಪಗ್ರಹದ ವೇಗವನ್ನು ಕುಗ್ಗಿಸಿತ್ತು. ಹೀಗಾಗಿ ಉಪಗ್ರಹವು ಇನ್ನೇನು ಕಕ್ಷೆ ಸೇರುವ ಹಂತದಲ್ಲಿದ್ದಾಗ ಹೀಟ್‌ ಶೀಲ್ಡ್‌ ಬೇರ್ಪಡಲಿಲ್ಲ. ಅಲ್ಲದೇ ಇದರ ವೇಗವು ಸೆಕೆಂಡ್‌ಗೆ ಒಂದು ಕಿ.ಮೀ.ನಷ್ಟು ಇಳಿದಿತ್ತು ಎಂದು ಈ ಯೋಜನೆಯ ವಿಜ್ಞಾನಿಗಳು ಅಭಿಪ್ರಾಯ ಪಟ್ಟಿದ್ದಾರೆ.

ರಾಕೆಟ್‌ನಿಂದ ಸ್ಯಾಟಲೈಟ್‌ ಅನ್ನು ಬೇರ್ಪಡಿಸುವ ಕಾರ್ಯವೂ ಸಮರ್ಪಕ ನಡೆಯಲಿಲ್ಲ. ಹಾಗಾಗಿ ಇದೊಂದು ವಿಫಲ ಯೋಜನೆ, ಯೋಜನೆ ಕೈಕೊಟ್ಟಿದ್ದಕ್ಕೆ ಬೇಸರವಾಗಿದೆ. ಎಲ್ಲಿ ಲೋಪವಾಗಿದೆ ಎಂಬುದನ್ನು ಪತ್ತೆ ಹಚ್ಚುತ್ತೇವೆ ಎಂದು ಇಸ್ರೊ ಅಧ್ಯಕ್ಷ ಕಿರಣ್‌ ಕುಮಾರ್‌ ಹೇಳಿದ್ದರು.

ಉಪಗ್ರಹ ಉಡಾವಣೆ ಸಂದರ್ಭದಲ್ಲಿ ವಾಯುಮಂಡಲದ ವಿರುದ್ಧ ಘರ್ಷಣೆಯಿಂದ ಉಂಟಾಗುವ ಶಾಖದಿಂದ ಉಪಗ್ರಹವನ್ನು ರಕ್ಷಿಸಲು ಬಳಸುವ ಹೊರಮೈ ಕವಚವನ್ನು ಹೀಟ್‌ ಶೀಲ್ಡ್‌ ಎನ್ನುತ್ತಾರೆ. ಈ ಹೀಟ್‌ ಶೀಲ್ಡ್‌ ಉಪಗ್ರಹವು ಕಕ್ಷೆ ಸೇರಿದ ಬಳಿಕ ಪ್ರತ್ಯೇಕಗೊಳ್ಳುತ್ತದೆ. ಆದರೆ ಐಆರ್‌ಎನ್‌ಎಸ್‌ಎಸ್‌-1ಎಚ್‌ ವಿಚಾರದಲ್ಲಿ ಈ ಶಿಲ್ಡ್‌ ಪ್ರತ್ಯೇಕಗೊಳ್ಳಲಿಲ್ಲ. ಹೀಗಾಗಿ ಉಪಗ್ರಹ ಕಕ್ಷೆಗೆ ಸೇರಿರಲಿಲ್ಲ.