ಇಸ್ರೇಲ್‌ನಲ್ಲಿ ತೈಲ ಮತ್ತು ಅನಿಲ ಪರಿಶೋಧನಾ ಘಟಕ ನಿರ್ಮಾಣಕ್ಕೆ ಚಿಂತನೆ

ಹೊಸದಿಲ್ಲಿ: ತೈಲ ಮತ್ತು ನೈಸರ್ಗಿಕ ಅನಿಲ ನಿಗಮದ(ಒಎನ್‌ಜಿಸಿ) ಮೂಲಕ ಇಸ್ರೇಲ್‌ನಲ್ಲಿ ತೈಲ ಮತ್ತು ಅನಿಲ ಪರಿಶೋಧನಾ ಘಟಕಗಳ ನಿರ್ಮಾಣಕ್ಕೆ ಸರಕಾರ ಚಿಂತಿಸಿದೆ ಎಂದು ತೈಲ ಸಚಿವ ಧರ್ಮೇಂದ್ರ ಪ್ರಧಾನ್‌ ಹೇಳಿದ್ದಾರೆ.

ಇಸ್ರೆಲ್‌ ಮತ್ತು ಭಾರತದ ನಡುವೆ ರಕ್ಷಣಾ ವಿಚಾರದಲ್ಲಿ ಗಾಡವಾದ ಬಾಂಧವ್ಯವಿದೆ, ಆದರೆ ಇದನ್ನೂ ಮೀರಿ ಒಂದು ಹೆಜ್ಜೆ ಮುಂದೆ ಹೋಗಲು ಪ್ರಧಾನಿ ನರೇಂದ್ರ ಮೋದಿ ಚಿಂತನೆ ನಡೆಸಿದ್ದರು. ಇದಕ್ಕಾಗಿಯೇ ಕಳೆದ ಜುಲೈನಲ್ಲಿ ಮೋದಿ ಇಸ್ರೇಲ್‌ಗೆ ಭೇಟಿ ನೀಡಿದ್ದರು. ಈ ವೇಳೆ ಇಸ್ರೇಲ್‌ನ ಮೆಡಿಟರೇನಿಯನ್ ಸಮುದ್ರದಲ್ಲಿ ತೈಲ ಮತ್ತು ಅನಿಲ ಪರಿಶೋಧನಾ ಘಟಕಗಳ ಸ್ಥಾಪನೆಗೆ ಅವಕಾಶ ಕೋರಿದ್ದರು.

ಇದರ ಮುಂದುವರಿದ ಭಾಗವಾಗಿ ಸೋಮವಾರದಂದು ಧರ್ಮೇಂದ್ರ ಪ್ರಧಾನ್‌, ಒಎನ್‌ಜಿಸಿ ಇಸ್ರೇಲ್‌ನಲ್ಲಿ ಘಟಕಗಳ ನಿರ್ಮಾಣದ ಯೋಜನೆ ಮಾಡಿಕೊಂಡಿದೆ ಎಂದು ಹೇಳಿಕೆ ನೀಡಿರುವುದು ಎರಡೂ ದೇಶಗಳ ನಡುವಿನ ಬಾಂಧವ್ಯ ವೃದ್ಧಿಗೆ ಸಹಕಾರಿಯಾಗಿದೆ ಎನ್ನಬಹುದು.