ಅಧಿಕ ಶುಲ್ಕ ಪಾವತಿಸದ ಪೋಷಕರನ್ನು ನಂಬಿಕೆ ದ್ರೋಹಿಗಳೆಂದ ಶಾಲೆ !

ಮುಂಬಯಿ: ಕಂಡಿವಲಿಯ ಶಾಲೆಯೊಂದು ಮಕ್ಕಳ ಶಾಲಾ ಶುಲ್ಕ ಪಾವತಿಸದ 48 ಪೋಷಕರನ್ನು 'ಪೋಷಕ ಶಿಕ್ಷಕರ ಸಂಘ'ದಿಂದ ಹೊರ ಹಾಕಿದ್ದು, ಇವರನ್ನು ನಂಬಿಕೆಗೆ ಅರ್ಹ ವ್ಯಕ್ತಿಗಳಲ್ಲ ಎಂದು ಹೇಳಿ ವಿವಾದ ಸೃಷ್ಟಿಸಿದೆ.

ಠಾಕೂರ್‌ ಅಂತಾರಾಷ್ಟ್ರೀಯ ಶಾಲೆ ಕೆಲದಿನಗಳ ಹಿಂದೆ ಮಕ್ಕಳ ಟ್ಯೂಷನ್‌ ಶುಲ್ಕವನ್ನು ಹೆಚ್ಚಿಸಿದೆ. ಇನ್ನು ಪ್ರಶ್ನಿಸಿದ 48 ಮಕ್ಕಳ ಪೋಷಕರು ರಾಜ್ಯ ಶಿಕ್ಷಣ ಇಲಾಖೆಯ ಗಮನಕ್ಕೆ ತಂದಿದ್ದಾರೆ. ಅಲ್ಲದೇ ಶಾಲೆ ಕೇಳಿರುವ ಹಣವನ್ನು ಪಾವತಿಸಲು ನಿರಾಕರಿಸಿದ್ದಾರೆ.

ಇದೀಗ ಪೋಷಕರಿಗೆ ಉಲ್ಟಾ ಹೊಡೆದಿರುವ ಠಾಕೂರ್‌ ಶಾಲೆ 48 ಮಕ್ಕಳ ಪೋಷಕರನ್ನು, ಪೋಷಕರು ಮತ್ತು ಶಿಕ್ಷಕರ ಸಂಘದಿಂದ ನಡೆಯುವ ವಾರ್ಷಿಕ ಚುನಾವಣೆಯಲ್ಲಿ ಪಾಲ್ಗೊಳ್ಳದಂತೆ ನಿರ್ಬಂಧಿಸಿ ಶಾಲೆಯಲ್ಲಿ ನಡೆಯುವ ಚುನಾವಣೆ ವೇಳೆ ಅವರನ್ನು ಗೇಟ್‌ನಿಂದಲೇ ಹೊರ ನಿಲ್ಲಿಸಿದೆ. ಪೋಷಕರನ್ನು ನಂಬಿಕೆ ದ್ರೋಹಿಗಳು ಎಂದು ಕರೆದಿರುವ ಶಾಲಾ ಮಂಡಳಿಯು ಸಂಘಟನೆಗೆ ಸೇರಬೇಕಾದರೆ ಹಣವನ್ನು ಪಾವತಿಸಿ ಎಂದು ತಾಕೀತು ಮಾಡಿದೆ.

'ಕಳೆದ ಶನಿವಾರದಂದು ನಾವು ಶಾಲಾ ಆವರಣ ಪ್ರವೇಶಿಸದಂತೆ ಆಡಳಿತ ಮಂಡಳಿ ಅಧಿಕಾರಿಗಳು ನಿರ್ಬಂಧಿಸಿದ್ದಾರೆ, ಅಲ್ಲದೆ ನಮಗೆ ನಂಬಿಕೆ ದ್ರೋಹಿಗಳು ಎಂದು ಹೇಳಿದ್ದಾರೆ. ಇದು ಶಾಲೆಯಲ್ಲಿ ನಡೆಸಲಾಗುತ್ತಿರುವ ತಾರತಮ್ಯವನ್ನು ಎತ್ತಿ ತೋರಿಸುತ್ತದೆ' ಎಂದು ಪೋಷಕರೊಬ್ಬರು ಹೇಳಿದ್ದಾರೆ.

ನಿಯಮದ ಪ್ರಕಾರ ಟ್ಯೂಷನ್‌ ಶುಲ್ಕ ಎಂದು 16,000ರೂ. ನಿಗದಿ ಪಡಿಸುವಂತೆ ಮಹಾರಾಷ್ಟ್ರ ಶೈಕ್ಷಣಿಕ ಸಂಸ್ಥೆಗಳ (ಶುಲ್ಕ ನಿಯಂತ್ರಣ) ಕಾಯಿದೆ ಹೇಳುತ್ತದೆ. ಆದರೆ ಈ ನಿಯಮವನ್ನು ಗಾಳಿಗೆ ತೂರಿರುವ ಶಾಲೆ 19,000ರೂ. ಪಾವತಿಸುವಂತೆ ಹೇಳಿದೆ. ಇದನ್ನು ಪ್ರಶ್ನಿಸಿರುವ ಮಕ್ಕಳ ಪೋಷಕರಿಗೆ ಇ-ಮೇಲ್‌ ಮಾಡಿರುವ ಶಾಲಾ ಮಂಡಳಿ ಕೂಡಲೇ ಬಾಕಿ ಹಣವನ್ನು ನೀಡುವಂತೆ ಕೇಳಿಕೊಂಡಿದೆ.

ಕೆಲವರು ಶಾಲೆಯ ಈ ನಿಯಮಕ್ಕ ತಲೆ ಬಾಗಿದ್ದು ಶಾಲೆ ಕೇಳಿರುವ ಮೊತ್ತವನ್ನು ಪಾವತಿಸಿದ್ದಾರೆ. 'ನಾವು ನಮ್ಮ ಮಕ್ಕಳ ಭವಿಷ್ಯದ ಚಿಂತನೆಯಿಂದ ಶಾಲೆ ಕಟ್ಟಲು ಹೇಳಿರುವ ಮೊತ್ತವನ್ನು ಪಾವತಿಸಿದ್ದೇವೆ. ಶಾಲೆಯ ಈ ನಡೆಯನ್ನು ಪ್ರಶ್ನಿಸಿದ್ದು, ಈ ವಿಚಾರವನ್ನು ರಾಜ್ಯ ಶಿಕ್ಷಣ ಮಂಡಳಿಯ ಗಮನಕ್ಕೂ ತಂದಿದ್ದೇವೆ' ಎಂದು ಪೋಷಕರೊಬ್ಬರು ತಿಳಿಸಿದ್ದಾರೆ,