ಅಕ್ರಮ ವಲಸಿಗರ ಪತ್ತೆಗೆ ಇರುವ ಅಸ್ತ್ರವೇ ಎನ್‌ಆರ್‌ಸಿ: ರಾಜನಾಥ್‌ ಸಿಂಗ್

ಹೊಸದಿಲ್ಲಿ: ಎನ್‌ಆರ್‌ಸಿ ವರದಿಯ ಕುರಿತು ಸಲ್ಲದ ಆರೋಪ ಹೊರಿಸುವ ಮೂಲಕ ಕೆಲವರು ಸಾಮಾಜಿಕ ತಾಣಗಳಲ್ಲಿ ಸುದ್ದಿ ಹರಿಯಬಿಟ್ಟು ಶಾಂತಿ ಕದಡುತ್ತಿದ್ದಾರೆ ಎಂದು ಗೃಹ ಸಚಿವ ರಾಜನಾಥ್ ಸಿಂಗ್ ಹೇಳಿದ್ದಾರೆ.

ರಾಷ್ಟ್ರೀಯ ನಾಗರಿಕ ನೋಂದಣಿಯ ಕರಡು ವರದಿ ಜು. 31ರಂದು ಪ್ರಕಟವಾಗಿತ್ತು. ಅದರ ಬೆನ್ನಲ್ಲೇ ವರದಿಯಲ್ಲಿ ಸುಮಾರು 40 ಲಕ್ಷ ಮಂದಿ ಪಟ್ಟಿಯಿಂದ ಹೊರಗುಳಿದಿದ್ದಾರೆ ಎನ್ನಲಾಗಿತ್ತು. ಆದರೆ ಅಸ್ಸಾಂನಲ್ಲಿ ಪತ್ತೆಯಾಗಿದ್ದ ಬಾಂಗ್ಲಾ ಅಕ್ರಮ ನಿವಾಸಿಗಳ ಕುರಿತು ಟಿಎಂಸಿ ಮತ್ತು ಇತರ ಕೆಲ ವಿಪಕ್ಷಗಳು ಎನ್ಆರ್‌ಸಿ ವರದಿ ಸರಿಯಾಗಿಲ್ಲ ಎಂದು ಆರೋಪಿಸಿ, ಅದನ್ನು ವಿರೋಧಿಸಿದ್ದವು. ಅಲ್ಲದೆ ಬಿಜೆಪಿ ಮತ್ತು ಪ್ರತಿಪಕ್ಷಗಳ ಮಧ್ಯೆ ವಾಕ್ಸಮರಕ್ಕೂ ವರದಿ ಕಾರಣವಾಗಿತ್ತು.

ಎನ್‌ಆರ್‌ಸಿ ವರದಿ ಯಾವುದೇ ಪೂವಾಗ್ರಹದಿಂದ ಕೂಡಿಲ್ಲ, ಅದರಲ್ಲಿ ಯಾವುದೇ ದುರುದ್ದೇಶವಿಲ್ಲ. ದೇಶದ ಎಲ್ಲ ನಾಗರಿಕರು ಕೂಡ ಪಟ್ಟಿಯಲ್ಲಿ ನೋಂದಣಿಯಾಗಲಿದ್ದಾರೆ. ಅದರ ಹೊರತು ಅಕ್ರಮ ವಾಸಿಗಳು ಮಾತ್ರ ಪಟ್ಟಿಯಿಂದ ಹೊರಗುಳಿಯುತ್ತಾರೆ. ಹೀಗಾಗಿ ವರದಿ ಬಗ್ಗೆ ಯಾವುದೇ ಸಂಶಯ ಬೇಡ. ವಿಪಕ್ಷಗಳು ಮಾಡುತ್ತಿರುವ ಆರೋಪದಲ್ಲಿ ಹುರುಳಿಲ್ಲ ಎಂದು ಸಿಂಗ್ ತಿಳಿಸಿದ್ದಾರೆ.

ದೇಶದಲ್ಲಿ ಅಕ್ರಮವಾಗಿ ವಾಸಿಸುತ್ತಿರುವ ವಲಸಿಗರ ವಿರುದ್ಧ ಕ್ರಮ ಕೈಗೊಳ್ಳಲು ಎನ್‌ಆರ್‌ಸಿ ಸಹಕಾರಿಯಾಗಲಿದೆ ಎಂದು ರಾಜ್‌ನಾಥ್‌ ಸಿಂಗ್‌ ಹೇಳಿದ್ದಾರೆ.