ಅನಾಥ ಮಕ್ಕಳಿಗೆ ಸಿಕ್ಕಿದೆ ತಾಯಿ ಕೂಡಿಟ್ಟ 96 ಸಾವಿರ ಹಳೆ ನೋಟು, ಬದಲಾಯಿಸಿಕೊಡಲು ಪ್ರಧಾನಿಗೆ ಪತ್ರ

ಕೋಟಾ (ರಾಜಸ್ಥಾನ್): ಅನಾಥ ಮಕ್ಕಳಿಗೆ ತಾಯಿ ಕೂಡಿಟ್ಟಿದ್ದ ಅಮಾನ್ಯಗೊಂಡ 96,500 ರೂ. ಮೌಲ್ಯದ ನೋಟುಗಳು ಸಿಕ್ಕಿದ್ದು, ಏನು ಮಾಡುವುದೆಂದು ತೋಚದೆ ಕಳವಳಗೊಂಡಿದ್ದಾರೆ.

ಅಮಾನ್ಯಗೊಂಡ ಈ ನೋಟುಗಳನ್ನು ಬದಲಾಯಿಸಲು ಯಾವುದೇ ದಾರಿ ತೋಚದ ಈ ಅಣ್ಣ-ತಂಗಿ ಕಂಗಾಲಾಗಿದ್ದು, ರದ್ದಾದ 500 ರೂ. ಹಾಗೂ 1000 ರೂ. ನೋಟುಗಳನ್ನು ಬದಲಾಯಿಸಿಕೊಡಲು ಆರ್‌ಬಿಐ ನಿರಾಕರಿಸಿದ ಹಿನ್ನೆಲೆಯಲ್ಲಿ ಈ ಮಕ್ಕಳು ಪ್ರಧಾನಿ ಮಧ್ಯಸ್ಥಿಕೆ ವಹಿಸಬೇಕೆಂದು ಪತ್ರ ಬರೆದಿದ್ದಾರೆ.

'ತಾಯಿಯ ಜೀವನದ ಉಳಿತಾಯದ ಹಣವಿದಾಗಿದ್ದು, ಮಕ್ಕಳ ಭವಿಷ್ಯಕ್ಕೆ ಇದು ನೆರವಾಗಲಿದೆ. ತಂಗಿಯ ಹೆಸರಲ್ಲಿ ಈ ಹಣವನ್ನು ಸ್ಥಿರ ಠೇವಣಿ ಇಡಲು ಅಣ್ಣ ಬಯಸುತ್ತಿದ್ದಾನೆ,' ಎಂದು ಮಕ್ಕಳ ಕಲ್ಯಾಣ ಸಮಿತಿ ಮುಖ್ಯಸ್ಥೆ ಹರೀಶ್ ಗುರುಬಾಕ್ಸಾನಿ ಹೇಳಿದ್ದಾರೆ.

ಈ ಮಕ್ಕಳ ತಂದೆ ರಾಜು ಬಂಜಾರ ಮೊದಲೇ ಮೃತಪಟ್ಟಿದ್ದು, ದಿನಗೂಲಿ ಮಾಡುತ್ತಿದ್ದ ತಾಯಿ ಪೂಜಾ ಬಂಜಾರ 2013ರಲ್ಲಿ ಕೊಲೆಯಾಗಿದ್ದಾಳೆ. ಪೋಷಕರನ್ನು ಕಳಕೊಂಡ ಮಕ್ಕಳು ಸಣ್ಣ ಗುಡಿಸಲಿನಲ್ಲಿ ವಾಸಿಸುತ್ತಿದ್ದು, ಸಾರಾವಾಡದಲ್ಲಿ ಮನೆ ಇದೆ ಎಂದು ಆಪ್ತ ಸಲಹೆ ನೀಡುವಾಗ ತಿಳಿಸಿದ್ದರು. ಈ ಹಿನ್ನೆಲೆಯಲ್ಲಿ ಮನೆಯನ್ನು ಪೋಲೀಸರು ಪರಿಶೋಧಿಸಿದಾಗ ಈ ಹಣ ಸಿಕ್ಕಿದೆ.