ಅಮೃತ್‌ ಯೋಜನೆಯಡಿ ದೇಶದ 1159 ಉದ್ಯಾನಗಳ ಅಭಿವೃದ್ಧಿ

ಹೊಸದಿಲ್ಲಿ: ಅಮೃತ್‌ ಯೋಜನೆಯಡಿ ದೇಶಾದ್ಯಂತ 1,159 ಉದ್ಯಾನಗಳನ್ನು ಅಭಿವೃದ್ಧಿಪಡಿಸಲಾಗಿದೆ ಎಂದು ಕೇಂದ್ರ ವಸತಿ ಮತ್ತು ನಗರಾಭಿವೃದ್ಧಿ ಸಚಿವಾಲಯ ಭಾನುವಾರ ಪ್ರಕಟಿಸಿದೆ. ನಗರ ಪುನರುಜ್ಜೀವನ ಮತ್ತು ಪರಿವರ್ತನೆಗಾಗಿ ಅಟಲ್‌ ಮಿಷನ್‌(ಅಮೃತ್‌)ನಡಿ ಉದ್ಯಾನ ನಿರ್ಮಾಣದಿಂದ 4,288 ಎಕರೆ ಪ್ರದೇಶ ಹಸಿರು ಬನಸಿರಿಯಾಗಿ ಕಂಗೊಳಿಸುತ್ತಿದೆ ಎಂದು ಹೇಳಿರುವ ಇಲಾಖೆ, ಉದ್ಯಾನಗಳಲ್ಲಿ ಮಕ್ಕಳು ಮತ್ತು ದಿವ್ಯಾಂಗರಿಗೆ ಅನುಕೂಲವಾಗುವ ಹಲವು ಸವಲತ್ತುಗಳನ್ನು ಒದಗಿಸಲಾಗಿದೆ ಎಂದಿದೆ. ಪ್ರಧಾನಿ ನರೇಂದ್ರ ಮೋದಿ ಅವರು 2015ರಲ್ಲಿ 500 ನಗರಗಳಿಗೆ ಅಮೃತ್‌ ಯೋಜನೆಯನ್ನು ಪ್ರಕಟಿಸಿದ್ದು, ಇದು ದೇಶದ ನಗರಗಳ ಜನಸಂಖ್ಯೆಯ 60% ಭಾಗವನ್ನು ಆವರಿಸುತ್ತದೆ. ಈವರೆಗೆ 2,355 ಉದ್ಯಾನಗಳ ಅಭಿವೃದ್ಧಿಗೆ ಯೋಜನೆ ರೂಪಿಸಲಾಗಿದ್ದು, ಆ ಪೈಕಿ 1,159 ಕಾಮಗಾರಿಗಳು ಪೂರ್ಣಗೊಂಡಿವೆ.