2.10 ಕೋಟಿ ಕ್ರಿಮಿನಲ್‌ ಕೇಸ್‌ಗಳು ವಿಚಾರಣೆಗೆ ಬಾಕಿ

ಗುವಾಹಟಿ: ದೇಶದ ನ್ಯಾಯಾಲಯಗಳ ಮುಂದೆ 2.10 ಕೋಟಿ ಕ್ರಿಮಿನಲ್‌ ಪ್ರಕರಣಗಳು ವಿಚಾರಣೆಗೆ ಬಾಕಿ ಇದ್ದು, ಪ್ರಕರಣಗಳ ಇತ್ಯರ್ಥ ಪ್ರಕ್ರಿಯೆಯಲ್ಲಿ ಕಾರ್ಯಾಂಗದ ಪಾಲೂ ದೊಡ್ಡದಿದೆ ಎಂದು ಸುಪ್ರೀಂ ಕೋರ್ಟ್‌ ಮುಖ್ಯ ನ್ಯಾಯಮೂರ್ತಿ ರಂಜನ್‌ ಗೊಗೋಯ್‌ ಹೇಳಿದ್ದಾರೆ.

ಅಸ್ಸಾಂನ ಗುವಾಹಟಿಯಲ್ಲಿ ಸಾರ್ವಜನಿಕ ಕಾರ‍್ಯಕ್ರಮವನ್ನು ಉದ್ದೇಶಿಸಿ ಮಾತನಾಡಿದ ಅವರು, ''ವಿಳಂಬಗತಿಯ ವಿಚಾರಣೆಗೆ ನ್ಯಾಯಾಲಯಗಳ ಮೇಲೆ ಬೊಟ್ಟು ಮಾಡಲಾಗುತ್ತಿದೆ. ಆದರೆ ನ್ಯಾಯ ತೀರ್ಮಾನ ತ್ವರಿತಗೊಳಿಸುವಲ್ಲಿ ಕಾರ್ಯಾಂಗದ ಪಾತ್ರವೂ ದೊಡ್ಡದಿದೆ. ದೇಶದಲ್ಲಿ 2.10 ಕೋಟಿ ಕ್ರಿಮಿನಲ್‌ ಪ್ರಕರಣಗಳು ವಿಚಾರಣೆಗೆ ಬಾಕಿ ಇವೆ. ಆದರೆ ಇದರಲ್ಲಿ 1 ಕೋಟಿಗೂ ಹೆಚ್ಚಿನ ಪ್ರಕರಣಗಳಲ್ಲಿ ಪೊಲೀಸ್‌ ಹಾಗೂ ತನಿಖಾ ಸಂಸ್ಥೆಗಳಿಂದ ಸಮನ್ಸ್‌ ಜಾರಿಯೇ ಆಗಿಲ್ಲ. ಸಮನ್ಸ್‌ ಜಾರಿಗೊಳಿಸದೇ ಇರುವಾಗ ನ್ಯಾಯಾಲಯಗಳು ವಿಚಾರಣೆಯನ್ನು ಹೇಗೆ ನಡೆಸಲು ಸಾಧ್ಯ. ಪ್ರಕರಣಗಳ ವಿಚಾರಣೆ ತ್ವರಿತಗೊಳಿಸುವಲ್ಲಿ ಕಾರ್ಯಾಂಗದ ಜವಾಬ್ದಾರಿಯೂ ದೊಡ್ಡದಿರುತ್ತದೆ,'' ಎಂದು ಹೇಳಿದರು.

''ದೇಶದ ನ್ಯಾಯಾಲಯಗಳಲ್ಲಿ 90 ಲಕ್ಷ ಸಿವಿಲ್‌ ವ್ಯಾಜ್ಯಗಳು ವಿಚಾರಣೆಗೆ ಬಾಕಿ ಇವೆ. ಇದರಲ್ಲಿ 20 ಪ್ರಕರಣಗಳಲ್ಲಿ ಸಮನ್ಸ್‌ ಜಾರಿಯಾಗಿಲ್ಲ. ಇನ್ನು ಇದೇ ರೀತಿ ಕೋರ್ಟ್‌ಗಳ ಮುಂದೆ 25 ವರ್ಷಕ್ಕೂ ಹಳೆಯದಾದ 2 ಲಕ್ಷ ವ್ಯಾಜ್ಯಗಳು ಬಾಕಿ ಇವೆ,'' ಎಂದು ಸಿಜೆಐ ಮಾಹಿತಿ ನೀಡಿದರು.

ನಿವೃತ್ತಿ ವಯಸ್ಸು 65ಕ್ಕೆ: ಪ್ರಕರಣಗಳ ಸುಲಭ ಇತ್ಯರ್ಥಕ್ಕಾಗಿ ಹೈಕೋರ್ಟ್‌ ನ್ಯಾಯಮೂರ್ತಿಗಳ ನಿವೃತ್ತಿ ವಯಸ್ಸನ್ನು 62ರಿಂದ 65ಕ್ಕೆ ಏರಿಸುವ ಪ್ರಸ್ತಾವನೆಯನ್ನು ಸರಕಾರಕ್ಕೆ ಸಲ್ಲಿಸಲಾಗಿದೆ. ಇದನ್ನು ಸರಕಾರ ಮನ್ನಿಸುವ ವಿಶ್ವಾಸ ತಮಗಿದೆ ಎಂದ ಗೊಗೋಯ್‌ ಅವರು, 50 ಹಾಗೂ 25 ವರ್ಷಗಳಿಂದ ಬಾಕಿ ಇರುವ ಪ್ರಕರಣಗಳನ್ನು ಆದ್ಯತೆ ಮೇರೆಗೆ ವಿಚಾರಣೆ ನಡೆಸಿ ಇತ್ಯರ್ಥಪಡಿಸುವಂತೆ ಹೈಕೋರ್ಟ್‌ ಮುಖ್ಯ ನ್ಯಾಯಮೂರ್ತಿಗಳಿಗೆ ಸೂಚಿಸಿರುವುದಾಗಿಯೂ ಹೇಳಿದರು.

ದೇಶದ ಕೋರ್ಟ್‌ಗಳ ಮುಂದೆ ವಿಚಾರಣೆಗೆ ಬಾಕಿ ಇರುವ ಕೇಸ್‌ಗಳು
2.10 ಕೋಟಿ -ಕ್ರಿಮಿನಲ್‌ ವ್ಯಾಜ್ಯ
90 ಲಕ್ಷ - ಸಿವಿಲ್‌ ಪ್ರಕರಣಗಳು
2 ಲಕ್ಷ - 25 ವರ್ಷದಿಂದ ಬಾಕಿ ಇರುವ ಕೇಸ್‌ಗಳು
1 ಸಾವಿರ - 50 ವರ್ಷದಿಂದ ಬಾಕಿ ಇರುವ ಕೇಸ್‌ಗಳು