ಕರ್ತಾರ್‌ಪುರ ಗಡಿಯಲ್ಲಿ ವಲಸೆ ಕೇಂದ್ರ ತೆರೆಯಲು ಪಾಕ್‌ ಸರ್ಕಾರ ನಿರ್ಧಾರ

ಲಾಹೋರ್‌: ಕರ್ತಾರಪುರ ಗಡಿಯಲ್ಲಿ ವಲಸೆ ಕೇಂದ್ರ ತೆರೆಯಲು ಪಾಕಿಸ್ತಾನ ಮುಂದಾಗಿದೆ. ಭಾರತದ ಪಂಜಾಬ್‌ನಲ್ಲಿರುವ ಗುರುದಾಸ್‌ಪುರದಿಂದ ಪಾಕಿಸ್ತಾನದ ಪಂಜಾಬ್‌ ಪ್ರಾಂತ್ಯದಲ್ಲಿರುವ ಡೇರಾ ಬಾಬಾ ನಾನಕ್‌ ಗುರುದ್ವಾರದವರೆಗೆ ಕಾರಿಡಾರ್‌ ನಿರ್ಮಿಸಲು ಉಭಯ ದೇಶಗಳೂ ಮುಂದಾಗಿವೆ.

ಈ ಗುರುದ್ವಾರದಲ್ಲಿ ಗುರುನಾನಕ್‌ ಅವರ ಸಮಾಧಿ ಇದೆ ಎಂದು ಭಾವಿಸಲಾಗಿದೆ. ಕಾರಿಡಾರ್‌ನಿಂದಾಗಿ ಉಗ್ರರು ಸುಲಭವಾಗಿ ದೇಶ ಪ್ರವೇಶಿಸಲು ಅನುಕೂಲವಾಗಲಿದೆ ಎಂಬ ಆತಂಕ ಎರಡೂ ದೇಶಗಳಿಂದ ವ್ಯಕ್ತವಾಗಿತ್ತು. ಈ ಹಿನ್ನೆಲೆಯಲ್ಲಿ ವಲಸೆ ಕೇಂದ್ರ ತೆರೆಯಲು ಪಾಕ್‌ ಮುಂದಾಗಿದೆ.

ಫೆಡರಲ್‌ ಇನ್‌ವೆಸ್ಟಿಗೇಶನ್‌ ಏಜೆನ್ಸಿ (ಎಫ್‌ಐಎ)ಯು ವಲಸೆ ಕೇಂದ್ರವನ್ನು ನಿರ್ವಹಿಸಲಿದೆ. ಎಫ್‌ಐಎ ಅಧಿಕಾರಿಗಳೇ ಸಿಖ್‌ ಯಾತ್ರಾರ್ಥಿಗಳ ದಾಖಲೆಗಳ ಪರಿಶೀಲನೆ ನಡೆಸಲಿದ್ದಾರೆ ಎಂದು ಹಿರಿಯ ಪೊಲೀಸ್‌ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಪಾಕ್‌ ಪ್ರದೇಶದಲ್ಲಿ ಕಾರಿಡಾರ್‌ ಆರಂಭವಾಗುವ ನರೋವಾಲ್‌ನಲ್ಲಿ ವಲಸೆ ಕೇಂದ್ರ ತಲೆ ಎತ್ತಲಿದೆ.