ಕುಲಭೂಷಣ್‌ ಜಾಧವ್‌ ಭೇಟಿ ಮುನ್ನ ಪತ್ನಿಗೆ ಮಂಗಳಸೂತ್ರ, ಸಿಂಧೂರ ತೆಗೆಯುವಂತೆ ಸೂಚಿಸಿದ್ದ ಪಾಕಿಸ್ತಾನ

ಹೊಸದಿಲ್ಲಿ: ಗೂಢಚರ ಆಪಾದನೆ ಮೇಲೆ ಪಾಕಿಸ್ತಾನದಲ್ಲಿ ಬಂಧನಕ್ಕೆ ಒಳಪಟ್ಟಿರುವ ಭಾರತೀಯ ಪ್ರಜೆ ಕುಲಭೂಷಣ್‌ ಜಾಧವ್‌ ಅವರನ್ನು ಬಂಧಿಸಿದ 21 ತಿಂಗಳ ನಂತರ ತಾಯಿ ಮತ್ತು ಪತ್ನಿಗೆ ಭೇಟಿ ಮಾಡಲು ಅವಕಾಶ ನೀಡುವ ಮೂಲಕ ವಿಶ್ವ ಮಟ್ಟದಲ್ಲಿ ತನ್ನ ಔದಾರ್ಯದ ಮುಖ ತೋರಿಸಲು ಯತ್ನಿಸಿದ್ದ ಪಾಕಿಸ್ತಾನದ ಮುಖವಾಡ ಬಯಲಾಗಿದೆ.

ಭೇಟಿ ಸಂದರ್ಭ ಕುಲಭೂಷಣ್ ಅವರ ತಾಯಿ ಮತ್ತು ಪತ್ನಿಗೆ ಬಲವಂತವಾಗಿ ಸಿಂಧೂರ, ಮಂಗಳಸೂತ್ರ ಮತ್ತು ಕೈಬಳೆಗಳನ್ನು ತೆಗಿಸಿದ್ದರು ಎಂದು ವಿದೇಶಾಂಗ ವ್ಯವಹಾರಗಳ ಸಚಿವಾಲಯ ಮಂಗಳವಾರ ತಿಳಿಸಿದೆ.

ಜಾಧವ್‌ ಅವರನ್ನು ಭೇಟಿ ಮಾಡುವ ಸಂದರ್ಭ ತಾಯಿ ಮತ್ತು ಪತ್ನಿಗೆ ಉಟ್ಟ ಬಟ್ಟೆಯಲ್ಲಿ ಹೋಗಲು ಅವಕಾಶ ನೀಡದೆ, ಬದಲಿ ವಸ್ತ್ರಗಳನ್ನು ನೀಡಿದ್ದರು. ಹಿಂದಿರುಗುವಾಗ ಜಾಧವ್‌ ಅವರ ಪತ್ನಿಯ ಚಪ್ಪಲಿಯನ್ನು ಹಿಂತಿರುಗಿಸಲಿಲ್ಲ ಎಂದು ಸಚಿವಾಲಯ ತಿಳಿಸಿದೆ.

ಬಹಳ ಆಯಾಸಗೊಂಡಿದ್ದರು, ದೌರ್ಜನ್ಯಕ್ಕೆ ಒಳಗಾದವರಂತೆ ಕಂಡುಬರುತ್ತಿದ್ದರು ಎಂದು ಎಂಇಎ ಅಧಿಕಾರಿಗಳು ತಿಳಿಸಿದ್ದಾರೆ. ಭೇಟಿ ಮೋದಲು ಜಾಧವ್‌ರ ವಿಡಿಯೋ ಎಂದು ಪಾಕ್‌ ಬಿಡುಗಡೆ ಮಾಡಿದ ವಿಡಿಯೋ ಬಗ್ಗೆಯೂ ಅನುಮಾನ ವ್ಯಕ್ತವಾಗುತ್ತಿದೆ.