ಐಸಿಸ್‌ ಮಾದರಿಯಲ್ಲಿ ಕಾಶ್ಮೀರದಲ್ಲಿ ಡ್ರೋನ್‌ ಬಾಂಬ್‌ ದಾಳಿಗೆ ಪಾಕ್‌ ಸಂಚು - ಗುಪ್ತಚರ ಸಂಸ್ಥೆ ಎಚ್ಚರಿಕೆ

ಹೊಸದಿಲ್ಲಿ: ಜಮ್ಮು-ಕಾಶ್ಮೀರದಲ್ಲಿ ವಿಧ್ವಂಸಕ ಕೃತ್ಯಗಳನ್ನು ಎಸಗಲು ಪಾಕಿಸ್ತಾನ ಸೇನೆ ಭಾರೀ ಸಂಚು ರೂಪಿಸಿದೆ. ಸ್ಫೋಟಕ ತುಂಬಿದ ಡ್ರೋನ್‌ಗಳನ್ನು ನುಗ್ಗಿಸಿ ಸೇನಾ ನೆಲೆಗಳನ್ನು ಛಿದ್ರಗೊಳಿಸುವ ಕುರಿತು ಉಗ್ರರಿಗೆ ತರಬೇತಿ ನೀಡಲಾಗುತ್ತಿದೆ ಎಂದು ಗುಪ್ತಚರ ಸಂಸ್ಥೆ ಎಚ್ಚರಿಕೆ ನೀಡಿದೆ.

ಇರಾಕ್‌ ಮತ್ತು ಸಿರಿಯಾದಲ್ಲಿ ಉಗ್ರರು ಹಲವು ವರ್ಷಗಳಿಂದ ಇಂತಹದ್ದೇ ದಾಳಿ ಮಾದರಿ ಅನುಸರಿಸುತ್ತಿದ್ದಾರೆ. ಹೇರಳವಾಗಿ ದೊರಕುವ ವಾಣಿಜ್ಯೋದ್ದೇಶಿತ ಡ್ರೋನ್‌ಗಳನ್ನು ಖರೀದಿಸಿ ಬಾಂಬ್‌ ದಾಳಿಗೆ ಬಳಸುವ ಕೇಡಿ ಕೃತ್ಯಗಳನ್ನು ಐಸಿಸ್‌ ಉಗ್ರರು ಮಾಡುತ್ತಿದ್ದು, ಇದನ್ನೇ ಪಾಕ್‌ ಸೇನೆ ಕಾಪಿ ಮಾಡಿದೆ. ಡ್ರೋನ್‌ ಬಳಸಿ ಕಾಶ್ಮೀರದಲ್ಲಿರುವ ಸೇನೆ ನೆಲೆಗಳ ಮೇಲೆ ದಾಳಿ ನಡೆಸುವ ಸುಲಭ ವಿಧಾನ ಕುರಿತು ಉಗ್ರರನ್ನು ಸಜ್ಜುಗೊಳಿಸಲಾಗುತ್ತಿದೆ ಎಂದು ಮೂಲಗಳು ತಿಳಿಸಿವೆ.

ಕಳೆದ ಹಲವು ತಿಂಗಳಿಂದ ಭಾರತದ ಗಡಿ ಭಾಗಗಳು ಶತ್ರು ಪಡೆಯ ಸಣ್ಣ ಚಲನವಲನಕ್ಕೂ ಆಸ್ಪದ ನೀಡದಷ್ಟು ಭದ್ರಗೊಂಡಿವೆ. ಪಾಕ್‌ ಉಗ್ರರ ನುಸುಳಿಕೆಗೆ ಸಂಪೂರ್ಣ ತಡೆಬಿದ್ದಿದೆ. ಇದರಿಂದ ಧೃತಿಗೆಟ್ಟಿರುವ ಪಾಕ್‌ ಬೇಹುಗಾರಿಕಾ ಸಂಸ್ಥೆ ಐಎಸ್‌ಐ, ಪರ್ಯಾಯ ದಾಳಿ ಮಾರ್ಗಗಳ ಶೋಧ ನಡೆಸಿದೆ. ಅದರಲ್ಲಿ ಸಿರಿಯಾ ಐಸಿಸ್‌ ಡ್ರೋನ್‌ ಬಾಂಬ್‌ ದಾಳಿಯನ್ನು ಕಾಪಿ ಮಾಡಲಾಗುತ್ತಿದೆ.

ಜಮ್ಮು-ಕಾಶ್ಮೀರ: ಯೋಧರ ಗುಂಡೇಟಿಗೆ ಇಬ್ಬರು ಉಗ್ರರು ಉಡೀಸ್‌, ಇನ್ಸ್‌ಪೆಕ್ಟರನ್ನು ಹತ್ಯೆಗೈದ ರಾಕ್ಷಸರು!
ಈ ವರ್ಷದ ಏಪ್ರಿಲ್‌ನಲ್ಲಿ ಪಂಜಾಬ್‌ ಪ್ರಾಂತ್ಯದ ಟೆಕ್ಸಿಲಾದಲ್ಲಿ ಲಷ್ಕರೆ ತಯ್ಯಬಾದ ಹಿರಿಯ ಮುಖಂಡರು ಮತ್ತು ಜೈಷೆ ಮೊಹಮ್ಮದ್‌ನ ಕಮಾಂಡರ್‌ಗಳ ಜೊತೆ ಸಭೆ ನಡೆಸಿದ್ದ ಐಎಸ್‌ಐ, ಡ್ರೋನ್‌ ಬಾಂಬ್‌ ದಾಳಿ ಯೋಜನೆಯ ರೂಪುರೇಷೆ ಕುರಿತು ಪ್ರಥಮ ಪ್ರಸ್ತಾಪ ಮಾಡಿತ್ತು. ಆ ನಂತರ ಪಾಕ್‌ ಆಕ್ರಮಿತ ಕಾಶ್ಮೀರದ ಕೋಟ್ಲಿ ಬ್ರಿಗೇಡ್‌ ಪ್ರಧಾನ ಕಚೇರಿಯಲ್ಲಿ ನಡೆದ ಎರಡನೇ ಸುತ್ತಿನ ಸಭೆಯಲ್ಲಿ ದಾಳಿ ಜಾರಿಗೆ ಮೊದಲು ನಡೆಸಬೇಕಾದ ಸಿದ್ಧತೆ ಕುರಿತು ಚರ್ಚಿಸಲಾಗಿತ್ತು.

ಕ್ವಾಡ್‌ಕಾಪ್ಟರ್‌ ದಾಳಿ ಸಾಮರ್ಥ್ಯ‌ಗಡಿ ದಾಟಿ ಬಂದು ಭಾರತೀಯ ನೆಲೆಗಳ ಮೇಲೆ ದಾಳಿ ನಡೆಸುವ ಸಾಮರ್ಥ್ಯ‌ ಪಾಕ್‌ ಸೇನೆಗೆ ಇಲ್ಲ. ತನ್ನ ಈ ಅಸಾಮರ್ಥ್ಯ‌ದ ಅರಿವು ಹೊಂದಿರುವ ಐಎಸ್‌ಐ, ವಿಕೃತಿ ಸಾಧನೆಗೆ ಉಗ್ರರನ್ನು ದಾಳವಾಗಿ ಬಳಸುತ್ತ ಬಂದಿದೆ. ಇದಕ್ಕೂ ಈಗ ಬ್ರೇಕ್‌ ಬಿದ್ದಿರುವುದರಿಂದ ಕ್ವಾಡ್‌ಕಾಪ್ಟರ್‌ ಅಥವಾ ಡ್ರೋನ್‌ಗಳ ಮೊರೆ ಹೋಗಲು ನಿರ್ಧರಿಸಿದೆ.