ಮೋದಿಗೆ ಹೆಬ್ಬಾವು ತೋರಿಸಿ ಬೆದರಿಕೆ ಹಾಕಿದ ಪಾಕ್ ಪಾಪ್ ಗಾಯಕಿ !

ಇಸ್ಲಾಮಾಬಾದ್: ಜಮ್ಮು- ಕಾಶ್ಮೀರದ ವಿಶೇಷ ಸ್ಥಾನಮಾನ ರದ್ದುಮಾಡಿದ ಕಾರಣಕ್ಕಾಗಿ ಕೋಪಗೊಂಡ ಪಾಕಿಸ್ತಾನದ ಪಾಪ್ ಗಾಯಕಿಯೊಬ್ಬಳು ಹೆಬ್ಬಾವೊಂದನ್ನು ಕೈಯಲ್ಲಿ ಹಿಡಿದುಕೊಂಡು ಪ್ರಧಾನಿ ನರೇಂದ್ರ ಮೋದಿಗೆ ಬೆದರಿಕೆ ಹಾಕಿದ್ದಾಳೆ.

ಟಿವಿ ನಿರೂಪಕಿ ಹಾಗೂ ಪಾಪ್ ಗಾಯಕಿ ರಬಿ ಫಿರ್ಝಾದಾ ಎಂಬಾಕೆ ಈ ಕೃತ್ಯ ಎಸಗಿದ್ದು ಸಾಮಾಜಿಕ ಜಾಲತಾಣಗಳಲ್ಲಿ ವಿಡಿಯೋ ವೈರಲ್ ಆಗಿದೆ. ಜಮ್ಮು- ಕಾಶ್ಮೀರಕ್ಕೆ ನೀಡಲಾಗಿದ್ದ ವಿಶೇಷ ಸ್ಥಾನಮಾನವನ್ನು ನರೇಂದ್ರ ಮೋದಿ ಸರಕಾರ ರದ್ದು ಮಾಡುವ ಮೂಲಕ ಕಾಶ್ಮೀರಿಗಳಿಗೆ ಕಿರುಕುಳ ನೀಡುತ್ತಿದೆ ಎಂದು ಆರೋಪಿಸಿ ಹೆಬ್ಬಾವು ಹಾಗೂ ವಿಷ ಸರ್ಪಗಳನ್ನು ತೋರಿಸಿ ಪ್ರಧಾನಿ ಮೋದಿಗೆ ಬೆದರಿಕೆ ಹಾಕಿದ್ದಾಳೆ.


ಹಾವುಗಳನ್ನು ತೋರಿಸುತ್ತಾ ಭಾರತದ ಪ್ರಧಾನಿ ನರೇಂದ್ರ ಮೋದಿಗೆ ಇದು ಉಡುಗೊರೆ. ನಿಮಗಾಗಿ ಇದನ್ನು ಸಿದ್ದಪಡಿಸಿದ್ದೇನೆ. ನರಕದಲ್ಲಿ ಸಾಯಲು ತಯಾರಾಗಿ. ನನ್ನ ಸ್ನೇಹಿತರು ಹಬ್ಬ ಆಚರಿಸಲು ಸಿದ್ದವಾಗಿದ್ದಾರೆ ಎಂದು ಸಾಮಾಜಿಕ ಜಾಲತಾಣಗಳಲ್ಲಿ ಪಾಪ್ ಗಾಯಕಿ ವಿಡಿಯೋ ಹಾಕಿದ್ದಳು. ಈಕೆಯ ವಿಡಿಯೋವನ್ನು ಪಾಕಿಸ್ತಾನದ ಟಿವಿ ಚಾನೆಲ್ ಕೂಡಾ ಪ್ರಸಾರಮಾಡಿತ್ತು.


ವನ್ಯಜೀವಿಗಳನ್ನು ಮನೆಯಲ್ಲಿ ಸಾಕುವುದು ಅಪರಾಧವಾಗಿದ್ದು ಸ್ಥಳೀಯ ವನ್ಯಜೀವಿ ಸಂರಕ್ಷಣಾ ಸಂಸ್ಥೆಯೊಂದು ಈಕೆಯ ವಿರುದ್ಧ ದೂರು ದಾಖಲಿಸಿದೆ. ದೂರಿನ ಅನ್ವಯ ಪಂಜಾಬ್ ಪ್ರಾಂತ್ಯದ ವನ್ಯಜೀವಿ ಸಂರಕ್ಷಣಾ ಇಲಾಖೆ ಪ್ರಕರಣ ದಾಖಲಿಸಿಕೊಂಡು ಕ್ರಮಕ್ಕೆ ಮುಂದಾಗಿದೆ.

ಈಕೆಯ ಈ ಕೃತ್ಯಕ್ಕೆ ಸಾಮಾಜಿಕ ತಾಲತಾಣಗಳಲ್ಲಿ ಭಾರತೀಯರು ಕಿಡಿಕಾರುತ್ತಿದ್ದು, ಇದು ಪಾಕಿಸ್ತಾನಿ ಪ್ರಜೆಗಳ ಹತಾಶೆಯ ಪರಮಾವಧಿ ಎನ್ನುತ್ತಿದ್ದಾರೆ.