ಪಿಒಕೆಯಿಂದಲೂ ಪಾಕ್‌ ಉಗ್ರರು ಪರಾರಿ

ಹೊಸದಿಲ್ಲಿ: ಕಳೆದ 30 ವರ್ಷಗಳಲ್ಲಿ ಇದೇ ಮೊದಲ ಬಾರಿಗೆ ಪಾಕಿಸ್ತಾನವು ಪಿಒಕೆಯಲ್ಲಿನ ತನ್ನ ಉಗ್ರರ ತರಬೇತಿ ಶಿಬಿರಗಳನ್ನು ಮುಚ್ಚಿ, ಗಡಿ ನಿಯಂತ್ರಣ ರೇಖೆಯಲ್ಲಿನ ಅಕ್ರಮ ನುಸುಳುವಿಕೆಯನ್ನು ನಿಲ್ಲಿಸಿದೆ.

ಪಾಕ್‌ ಆಕ್ರಮಿತ ಕಾಶ್ಮೀರ (ಪಿಒಕೆ) ಪ್ರದೇಶದಲ್ಲಿನ 20ಕ್ಕೂ ಹೆಚ್ಚು ಉಗ್ರರ ತರಬೇತಿ ಶಿಬಿರಗಳನ್ನು ಪಾಕಿಸ್ತಾನ ಸಂಪೂರ್ಣವಾಗಿ ಮುಚ್ಚಿದೆ. ಕೆಲದಿನಗಳ ಹಿಂದಷ್ಟೇ ಈ ಪ್ರದೇಶದಲ್ಲಿರುವ 500ಕ್ಕೂ ಅಧಿಕ ಜೈಷೆ ಮೊಹಮ್ಮದ್‌, ಲಷ್ಕರೆ ತಯ್ಬಾ ಉಗ್ರ ಸಂಘಟನೆಗಳ ಶಿಬಿರಗಳನ್ನು ಅಫ್ಘಾನಿಸ್ತಾನದ ಗಡಿ ಭಾಗಕ್ಕೆ ಸ್ಥಳಾಂತರಿಸಿದೆ. ಭಾರತದ ದಾಳಿ ಭೀತಿ ಹಾಗೂ ಅಂತಾರಾಷ್ಟ್ರೀಯ ಹಣಕಾಸು ಕಾರ್ಯಪಡೆ (ಎಫ್‌ಎಟಿಎಫ್‌) ಕಪ್ಪು ಪಟ್ಟಿಗೆ ಸೇರುವ ಭಯದಿಂದ ಈಗ ಎಲ್ಲ ಶಿಬಿರಗಳನ್ನೂ ತೆರವುಗೊಳಿಸಿದೆ.

ಅಕ್ಟೋಬರ್‌ ಒಳಗಾಗಿ ಉಗ್ರರಿಗೆ ಹಣದ ನೆರವು , ಶಸ್ತ್ರಾಸ್ತ್ರ ಪೂರೈಕೆಯಂಥ ಕುಮ್ಮಕ್ಕುಗಳನ್ನು ಸಂಪೂರ್ಣವಾಗಿ ಹತ್ತಿಕ್ಕಬೇಕೆಂದು ಎಫ್‌ಎಟಿಎಫ್‌ ಖಡಕ್‌ ಸೂಚನೆ ನೀಡಿದೆ. ಹೀಗಾಗಿ ಉಗ್ರ ದಮನಕ್ಕೆ ಮುಂದಾಗಲೇಬೇಕಾದ ಅನಿವಾರ್ಯತೆಗೆ ಪಾಕ್‌ ಸಿಲುಕಿದೆ.

ಭಾರಿ ಶಸ್ತ್ರಾಸ್ತ್ರ ಬಳಕೆ ಬಂದ್‌: ಈ ಹಿಂದೆ ಗಡಿಯಲ್ಲಿ ಅಪ್ರಚೋದಿತ ಗುಂಡಿನ ದಾಳಿಗೆ ಮುಂದಾಗುತ್ತಿದ್ದ ಪಾಕಿಸ್ತಾನ, ಆ ವೇಳೆ ಆರ್ಟಿಲರಿ ಗನ್‌, ಮಾರ್ಟರ ಶೆಲ್‌ ಸೇರಿದಂತೆ ಭಾರಿ ಶಸ್ತ್ರಾಸ್ತ್ರಗಳನ್ನು ಬಳಸುತ್ತಿತ್ತು. ಸದ್ಯ ಅಂತಹ ಶಸ್ತ್ರಾಸ್ತ್ರಗಳ ಬಳಕೆಯನ್ನು ಸಂಪೂರ್ಣವಾಗಿ ನಿಲ್ಲಿಸುವಂತೆ ಗಡಿಯಲ್ಲಿನ ಸೈನಿಕರಿಗೆ ಪಾಕ್‌ ಸೇನಾಧಿಕಾರಿಗಳು ನಿರ್ದೇಶನ ನೀಡಿದ್ದಾರೆ ಎನ್ನಲಾಗಿದೆ. ಉಗ್ರರು ಹಾಗೂ ಅಕ್ರಮ ವಲಸಿಗರು ಭಾರತದೊಳಗೆ ನುಸುಳಲು ಅನುಕೂಲವಾಗಲೆಂದು ಪಾಕ್‌ ಸೇನೆ ಅನುಸರಿಸುತ್ತಿದ್ದ ಕದನ ವಿರಾಮ ಉಲ್ಲಂಘನೆ ತಂತ್ರದ ಪ್ರಕರಣಗಳು ಕೂಡ ಗಣನೀಯವಾಗಿ ಇಳಿಕೆಯಾಗಿರುವುದು ಗಮನಾರ್ಹ.

ಮತ್ತೊಂದೆಡೆ, ಫೆ.26ರಂದು ಭಾರತೀಯ ವಾಯುಪಡೆ(ಐಎಎಫ್‌) ಬಾಲಾಕೋಟ್‌ನಲ್ಲಿನ ಉಗ್ರರ ಶಿಬಿರಗಳ ಮೇಲೆ 1000 ಕಿಲೋ ಬಾಂಬ್‌ ಉದುರಿಸಿ ನಡೆಸಿದ ವಾಯುದಾಳಿಯಿಂದ ಪಾಕ್‌ ಸೇನಾ ಪಡೆ ನಲುಗಿ ಹೋಗಿದೆ. ಈಗ ಗಡಿಯಲ್ಲಿನ ಪಾಕಿಸ್ತಾನ ಸೈನಿಕರು ಸದಾಕಾಲ ಭಾರತದಿಂದ ದಾಳಿ ನಡೆಯುವ ಭೀತಿಯಲ್ಲಿಯೇ ಕಾರ್ಯನಿರ್ವಹಿಸುತ್ತಿದ್ದಾರೆ ಎಂದು ಮೂಲಗಳು ತಿಳಿಸಿವೆ.

ಚೀನಾ ಜತೆ ಮದುವೆ, ಅಮೆರಿಕದೊಂದಿಗೆ ಮಧುಚಂದ್ರ?

ಚೀನಾದ ಪರಮಾಪ್ತ ರಾಷ್ಟ್ರ ಎನಿಸಿರುವ ಪಾಕಿಸ್ತಾನ ಸದ್ಯ ಆರ್ಥಿಕ ದಿವಾಳಿತನ ಎದುರಿಸುತ್ತಿದೆ. ಚೀನಾದಿಂದ ಮಿತಿಮೀರಿ ಸಾಲ ಪಡೆದಾಗಿದೆ. ಆರ್ಥಿಕ ಕಾರಿಡಾರ್‌ಗಾಗಿ ತನ್ನ ನೆಲವನ್ನು ಚೀನಾಕ್ಕೆ ಅಡವಿಟ್ಟಾಗಿದೆ. ಹಾಗಾಗಿ ಸದ್ಯ ಪಾಕ್‌ಗೆ ಬೇಕಿರುವ ಹಣ ಹಾಗೂ ಆಧುನಿಕ ಶಸ್ತ್ರಾಸ್ತ್ರ ನೆರವನ್ನು ಶೀಘ್ರ ಕೊಡಬಲ್ಲ ರಾಷ್ಟ್ರ ಎಂದರೆ ಅದು ಅಮೆರಿಕ ಮಾತ್ರ. ಏಕೆಂದರೆ ಭವಿಷ್ಯದಲ್ಲಿ ಇರಾನ್‌ನನ್ನು ಹತ್ತಿಕ್ಕಲು ಹಾಗೂ ಅಫ್ಘಾನಿಸ್ತಾನದಲ್ಲಿ ತಾಲಿಬಾನಿಗಳನ್ನು ತನ್ನ ಸೇನಾಪಡೆಯ ಕಾಲಿಗೆ ಎರಗುವಂತೆ ಮಾಡಿಸಿಕೊಳ್ಳಲು ಅಮೆರಿಕಕ್ಕೆ ತನ್ನ ನೆರವು ಬೇಕೇಬೇಕು ಎಂದು ಪಾಕ್‌ ಚೆನ್ನಾಗಿ ಅರಿತಿದೆ. ಇರಾನ್‌, ತಾಲಿಬಾನ್‌ ಮೇಲೆ ಯುದ್ಧ ಸಾರಿದರೆ ಪಾಕ್‌ ನೆಲದಲ್ಲಿಯೇ ಅಮೆರಿಕದ ಸೇನಾಪಡೆಗಳು ತಮ್ಮ ನೆಲೆಗಳನ್ನು ಸ್ಥಾಪಿಸಿಕೊಳ್ಳಬೇಕು. ಹಾಗಾಗಿ ಚೀನಾ ಜತೆ ಮದುವೆ, ಅಮೆರಿಕ ಜತೆ ಮಧುಚಂದ್ರ ಎಂಬ ನೀತಿಯನ್ನು ಪಾಕಿಸ್ತಾನ ಅನುಸರಿಸುತ್ತಿದೆ.