ಬ್ಲೂವೇಲ್‌ಗೆ ಗುಜರಾತ್ ಯುವಕ ಬಲಿ

ಅಹಮದಾಬಾದ್: ರಷ್ಯಾ ಮೂಲದ ಡೆಡ್ಲಿ ಆನ್‌ಲೈನ್ ಗೇಮ್ ಬ್ಲೂವೇಲ್ ಭೂತಕ್ಕೆ ಗುಜರಾತಿನ ಯುವಕ ಬಲಿಯಾಗಿದ್ದಾನೆ.

ಅಶೋಕ್ ಠಾಕೋರೆ (20) ಮೃತ ದುರ್ದೈವಿ. ಯುವಕ ತನ್ನ ಮೊಬೈಲ್ ಫೋನ್‌ನಲ್ಲಿ ವೀಡಿಯೋ ಸಂದೇಶವನ್ನು ರೆಕಾರ್ಡ್ ಮಾಡಿಟ್ಟು, ಅಹಮದಾಬಾದ್‌ನ ಸಾಬರಮತಿ ನದಿಗೆ ಹಾರಿ ಆತ್ಮಹತ್ಯೆಗೆ ಶರಣಾಗಿದ್ದಾನೆ.

'ನಾನು ಸಾಯುವ ಮೊದಲು ಈ ವೀಡಿಯೊವನ್ನು ರೆಕಾರ್ಡ್ ಮಾಡುತ್ತಿದ್ದು, ಎಲ್ಲರೂ ನನ್ನನ್ನು ಕ್ಷಮಿಸಿ. ನಾನು ನನ್ನ ತಾಯಿ ಹಾಗೂ ಸಹೋದರಿಯರನ್ನು ಅತಿಯಾಗಿ ಪ್ರೀತಿಸುತ್ತೇನೆ. ಆದರೆ, ನೀರಸ ಜೀವನ ಶೈಲಿಯಿಂದ ಅತೃಪ್ತನಾಗಿದ್ದೇನೆ. ಹೀಗಾಗಿ ಈ ವೀಡಿಯೋ ಮಾಡುತ್ತಿದ್ದೇನೆ. ನನ್ನ ಪ್ರೀತಿಯನ್ನು ಕುಟುಂಬ ಸದಸ್ಯರ ಮುಂದೆ ಹೇಗೆ ವ್ಯಕ್ತಪಡಿಸಲಿ?. ನಾನು ಬದುಕಲು ಇಚ್ಚಿಸುವುದಿಲ್ಲ. ಆತ್ಮಹತ್ಯೆಗೆ ಶರಣಾಗುತ್ತಿದ್ದೇನೆ' ಎಂಬ ಮಾತು ವೀಡಿಯೋದಲ್ಲಿ ರೆಕಾರ್ಡ್ ಆಗಿದೆ.

'ನಾನು ಮನೆಯಿಂದ 46 ಸಾವಿರ ರೂಪಾಯಿ ಕದ್ದು ಮುಂಬಯಿಗೆ ಬಂದಿದ್ದೆ. ಆದರೆ, ಇಲ್ಲಿ ವಿಪರೀತ ಮಳೆಯಿರುವ ಕಾರಣ ಅಹಮದಾಬಾದ್ ಮರಳಿದೆ. ಇದೀಗ ಇಲ್ಲಿಯೇ ಆತ್ಮಹತ್ಯೆಗೆ ಶರಣಾಗುತ್ತಿದ್ದೇನೆ. ನನ್ನ ಜತೆ ಸ್ನೇಹಿತನೊಬ್ಬನ್ನು ಸಹ ಮುಂಬಯಿಗೆ ಬಂದಿದ್ದ. ಆತನ ಬಳಿ ಇರುವ ಬ್ಯಾಗ್‌ನಲ್ಲಿ ಮನೆಯಿಂದ ಕದ್ದ ಹಣ ಹಾಗೂ ಮೊಬೈಲ್ ಫೋನ್‌ ಇದೆ. ದಯವಿಟ್ಟು ಆ ಹಣವನ್ನು ನನ್ನ ಕುಟುಂಬ ಸದಸ್ಯರಿಗೆ ತಲುಪಿಸಿ. ಆತ್ಮಹತ್ಯೆಗೆ ಶರಣಾಗಬೇಕೆಂದೇ ನಾನು ಡೆಡ್ಲಿ ಬ್ಲೂವೇಲ್ ಗೇಮ್ ಡೌನ್‌ಲೋಡ್ ಮಾಡಿಕೊಂಡಿದ್ದೆ ಎಂದು ಮೃತ ಅಶೋಕ್ ಹೇಳಿಕೊಂಡಿದ್ದಾನೆ.


ಅಶೋಕ್ ತಂದೆ ಕೆಲವು ವರ್ಷಗಳ ಹಿಂದೆ ನಿಧನರಾಗಿದ್ದು, ಇತ್ತ ತಾಯಿ ಹಾಗೂ ಇಬ್ಬರು ಸಹೋದರಿಯರ ಜತೆ ವಾಸವಾಗಿದ್ದ. ಅಶೋಕ ಆತ್ಮಹತ್ಯೆಗೆ ಶರಣಾದ ವೀಡಿಯೋ ನೋಡಿ ಆತನ ಕುಟುಂಬಕ್ಕೆ ಸಿಡಿಲು ಬಂಡೆದಂತಾಗಿದೆ.

ಘಟನೆ ಸಂಬಂಧ ಅಹಮದಾಬಾದ್ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.