ಹೊಸದಿಲ್ಲಿ: ಪ್ಯಾನ್‌ ಕಾರ್ಡ್‌ ಜತೆ ಆಧಾರ್‌ ಕಡ್ಡಾಯ ಜೋಡಣೆಯ ಗಡುವನ್ನು ಮೂರು ತಿಂಗಳ ಕಾಲ ವಿಸ್ತರಿಸಿ ಸರಕಾರ ಆದೇಶ ಹೊರಡಿಸಿದೆ.
ಸರಕಾರದ ವಿವಿಧ ಯೋಜನೆಗಳನ್ನು ಪಡೆಯಲು ಆಧಾರ್‌ ಜೋಡಣೆಯ ಗಡುವೂ ಸಹ ಮೂರು ತಿಂಗಳು ಅಂದರೆ, ಡಿ.31, 2017ರಿಂದ 2018ರ ಮಾ.31ರವರೆಗೂ ವಿಸ್ತರಣೆಯಾಗಿದೆ.
ಪ್ಯಾನ್‌ ಕಾರ್ಡ್‌ ಮತ್ತು ಆಧಾರ್‌ ಲಿಂಕ್‌ಗೆ ಗಡುವನ್ನು ಸರಕಾರ ವಿಸ್ತರಿಸಿರುವುದು ಇದು ಮೂರನೇ ಬಾರಿ.
ವಿವಿಧ ಯೋಜನೆಗಳನ್ನು ಪಡೆಯಲು ಆಧಾರ್‌ ಸಂಖ್ಯೆ ಕಡ್ಡಾಯ ಜೋಡಣೆ ಗಡುವನ್ನು ವಿಸ್ತರಿಸುವುದಾಗಿ ಗುರುವಾರವಷ್ಟೇ ಸುಪ್ರೀಂ ಕೋರ್ಟ್‌ಗೆ ಕೇಂದ್ರ ಸರಕಾರ ತಿಳಿಸಿತ್ತು.
''ಕೆಲ ತೆರಿಗೆದಾರರು ಪ್ಯಾನ್‌ ಕಾರ್ಡ್‌ ಜತೆ ಆಧಾರ್‌ ಲಿಂಕ್‌ ಮಾಡದಿರುವುದು ಗಮನಕ್ಕೆ ಬಂದಿದೆ. ಹೀಗಾಗಿ ಈ ಪ್ರಕ್ರಿಯೆಗೆ ಅನುಕೂಲ ಮಾಡಿಕೊಡಲು ಗಡುವನ್ನು ಮಾ.31ರವರೆಗೂ ವಿಸ್ತರಿಸಲು ತೀರ್ಮಾನಿಸಲಾಗಿದೆ,'' ಎಂದು ಹಣಕಾಸು ಸಚಿವಾಲಯ ಶುಕ್ರವಾರ ಹೇಳಿದೆ.
ಒಟ್ಟು 33 ಕೋಟಿ ಪ್ಯಾನ್‌ಗಳ ಪೈಕಿ ಇದುವರೆಗೂ ಆಧಾರ್‌ಗೆ ಲಿಂಕ್‌ ಆಗಿರುವುದು ಕೇವ. 13.28 ಕೋಟಿ ಮಾತ್ರ.
ಈ ಮುನ್ನ, ಜು.31, 2017ರ ಒಳಗಾಗಿ ಪ್ಯಾನ್‌-ಆಧಾರ್‌ ಲಿಂಕ್‌ ಮಾಡಲು ಆದೇಶಿಸಲಾಗಿತ್ತು. ಈ ಗಡುವನ್ನು 2017ರ ಆಗಸ್ಟ್‌ 31ರವರೆಗೂ ಮತ್ತು ಆ ನಂತರ ಡಿ.31ರವರೆಗೂ ಎರಡು ಬಾರಿ ವಿಸ್ತರಿಸಲಾಗಿತ್ತು.
ಈ ಮಧ್ಯೆ, ಗಡುವು ವಿಸ್ತರಣೆ ಬಗ್ಗೆ ಗುರುವಾರ ಪ್ರಕಟಣೆ ಹೊರಡಿಸಿರುವ ಆಧಾರ್‌ ಪ್ರಾಧಿಕಾರ (ಯುಐಡಿಎಐ), ಬ್ಯಾಂಕ್‌ ಖಾತೆ ಹಾಗೂ ಮೊಬೈಲ್‌ ಸಂಖ್ಯೆ ಜತೆ ಆಧಾರ್‌ ಜೋಡಣೆಯ ಗಡುವು ವಿಸ್ತರಣೆ ಮಾಡುವುದಿಲ್ಲ ಎಂದು ತಿಳಿಸಿದೆ. ಬ್ಯಾಂಕ್‌ ಖಾತೆ ಜತೆ ಆಧಾರ್‌ ಜೋಡಣೆಗೆ ಡಿ.31 ಅಂತಿಮ ಗಡುವಾಗಿದ್ದು, ಮೊಬೈಲ್‌ ಸಂಖ್ಯೆ-ಆಧಾರ್‌ ಲಿಂಕಿಂಗ್‌ಗೆ 2018ರ ಫೆ.06ರವರೆಗೂ ಸಮಯಾವಕಾಶವಿದೆ.