ಸಲ್ಫ್ಯೂರಿಕ್‌ ಆ್ಯಸಿಡ್‌ನಿಂದ ಪನೀರ್‌: ಫ್ಯಾಕ್ಟರಿಗೆ ದಾಳಿ

[This story originally published in times of India on Aug 28, 2018]

ಮೊಹಾಲಿ: ಪನೀರ್ ಕೊಳ್ಳುವವರು ಎಚ್ಚರ. ಮೊಹಾಲಿಯ ಬಲ್ಲೊಮರ್ಜ ಗ್ರಾಮದಲ್ಲಿ ಸಲ್ಫೂರಿಕ್‌ ಆ್ಯಸಿಡ್, ಯುರಿಯಾ ಹಾಗೂ ಹಾಲಿನ ಪುಡಿಯಿಂದ ತಯಾರಿಸಿದ 2060ಕೆ ಜಿ ಪನೀರ್ ಪತ್ತೆಯಾಗಿದೆ.

ಮಂಗಳವಾರ ಬೆಳಗ್ಗೆ ಆರೋಗ್ಯ ಇಲಾಖೆ ಅಧಿಕಾರಿಗಳು ಹಾಗೂ ಹಾಲು ಉತ್ಪಾದಕ ರೈತರ ಅಸೋಸಿಯೇಷನ್‌ ಸದಸ್ಯರ ಜತೆಗೆ ಜಂಟಿಯಾಗಿ ನಡೆಸಿದ ದಾಳಿಯಲ್ಲಿ ಅಪಾಯಕಾರಿ ಪನೀರ್ ತಯಾರಿಸುವ ಕಾರ್ಖಾನೆ ಇರುವುದು ಗೊತ್ತಾಗಿದೆ. ಈ ಸಂಬಂಧ ಅಧಿಕಾರಿಗಳು ಪ್ರಕರಣ ದಾಖಲಿಸಿ, ಸಂಸ್ಥೆಗೆ ಬೀಗ ಜಡಿದಿದ್ದಾರೆ.

ದಾಳಿ ವೇಳೆ 120 ಲೀಟರ್‌ನಷ್ಟು ಸಲ್ಫ್ಯೂರಿಕ್‌ ಆ್ಯಸಿಡ್‌, 25 ಕೆಜಿಯ 135 ಬ್ಯಾಗ್‌ನಲ್ಲಿ ಹಾಲಿನ ಪೌಡರ್‌, 89 ಕೆಜಿ ಬೆಣ್ಣೆ ಹಾಗೂ 25ಕೆಜಿಯಷ್ಟು ಖೊಯಾ ವಶಪಡಿಸಿಕೊಂಡಿದ್ದಾರೆ.

ಫ್ಯಾಕ್ಟರಿಯಲ್ಲಿ ನಕಲಿ ಪನೀರ್ ತಯಾರಿಸಲಾಗುತ್ತಿದೆ ಎಂದು ತಿಳಿದು ಬಂದ ಹಿನ್ನೆಲೆಯಲ್ಲಿ ದಾಳಿ ಮಾಡಲಾಗಿದೆ. ಸಂಸ್ಥೆ ಮಾಲಿಕ ಅಶೋಕ್‌ ಕುಮಾರ್‌ ಅವರನ್ನು ಈಗಾಗಲೇ ಬಂಧಿಸಲಾಗಿದೆ ಎಂದು ಆಹಾರ ಮತ್ತು ಡ್ರಗ್‌ ಅಡ್ಮಿನಿಸ್ಟ್ರೇಷನ್‌ ಆಯುಕ್ತ ಕೆ.ಎಸ್‌ ಪನ್ನು ತಿಳಿಸಿದ್ದಾರೆ.

ಟೈಮ್ಸ್‌ ವ್ಯೂ

ನಕಲಿ ಆಹಾರ ಪದಾರ್ಥಗಳನ್ನು ತಯಾರಿಸುವ ಕಂಪನಿಗಳಿಗೆ ಶೀಘ್ರವಾಗಿ ಶಿಕ್ಷೆಯಾಗಬೇಕು. ಈ ನಿಟ್ಟಿನಲ್ಲಿ ಕಾನೂನು ಇನ್ನಷ್ಟು ಬಿಗಿಯಾಗಬೇಕು. ನಕಲಿ ಖಾದ್ಯಗಳನ್ನು ಸೇವಿಸುವುದರಿಂದ ಆರೋಗ್ಯದ ಮೇಲೆ ಸಾಕಷ್ಟು ಕೆಟ್ಟ ಪರಿಣಾಮ ಉಂಟಾಗಲಿದೆ. ಇಂತಹ ಸಂಸ್ಥೆಗಳನ್ನು ನಡೆಸುವವರಿಗೆ ಕೇವಲ ಲಾಭವಷ್ಟೇ ಕಾಣುತ್ತದೆ. ಅಧಿಕ ದಂಡ ಹಾಗೂ ಕಠಿಣ ಶಿಕ್ಷೆ ವಿಧಿಸುವುದರಿಂದ ಇಂತಹ ಚಟುವಟಿಕೆಗಳಲ್ಲಿ ಭಾಗವಹಿಸುವುದನ್ನು ತಡೆಯಲು ಸಾಧ್ಯ.