ಹೊಸದಿಲ್ಲಿ: ಗೋಮೂತ್ರವೂ ಸೇರಿದಂತೆ ಗೋವಿನ ಉತ್ಪನ್ನಗಳು ಹಾಗೂ ಅವುಗಳ ಬಳಕೆ ಬಗ್ಗೆ ವೈಜ್ಞಾನಿಕ ಅಧ್ಯಯನ ನಡೆಸಲು ನಿಯೋಜಿಸಲಾದ ಸರಕಾರಿ ಸಮಿತಿಗೆ 54 ಪ್ರಸ್ತಾವನೆಗಳು ಬಂದಿವೆ ಎಂದು ಸಮಿತಿಯ ಸಹ-ಅಧ್ಯಕ್ಷ ವಿಜಯ ಭಾಟ್ಕರ್‌ ಹೇಳಿದ್ದಾರೆ.
54 ಪ್ರಸ್ತಾವನೆಗಳಲ್ಲಿ 27ನ್ನು ಆಯ್ಕೆ ಮಾಡಿಕೊಂಡು 17 ಸಮಗ್ರ ಪ್ರಸ್ತಾವನೆಗಳಾಗಿ ವಿಭಾಗಿಸಿ ಅವುಗಳನ್ನು ಐದು ವಿಶಿಷ್ಟ ಸಂಶೋಧನಾ ವಿಭಾಗಗಳಿಗೆ ಸೇರಿಸಲಾಗಿದೆ. ದೇಶೀಯ ಗೋವುಗಳ ವಿಶೇಷತೆ, ಔಷಧ ಮತ್ತು ಆರೋಗ್ಯ, ಕೃಷಿ ಬಳಕೆ, ಆಹಾರ ಮತ್ತು ಪೋಷಕಾಂಶ ಹಾಗೂ ಪಂಚಗವ್ಯ ಆಧರಿತ ಉತ್ಪನ್ನಗಳ ವೈಜ್ಞಾನಿಕ ಅರ್ಹತಾ ಅಧ್ಯಯನಗಳೇ ಈ ಐದು ಸಂಶೋಧನಾ ವಿಭಾಗಗಳು.
ಕೇಂದ್ರ ಸರಕಾರದ ನಾನಾ ಸಚಿವಾಲಯಗಳಡಿ ಕೆಲಸ ಮಾಡುವ ಪ್ರಯೋಗಾಲಯಗಳು ಹಲವಾರು ಪ್ರಸ್ತಾವನೆಗಳನ್ನು ಕಳುಹಿಸಿಕೊಟ್ಟಿವೆ. ಗೋ ಉತ್ಪನ್ನಗಳ ಬಗ್ಗೆ ಅಧ್ಯಯನ ನಡೆಸುತ್ತಿರುವ ಇನ್ನಷ್ಟು ಸಂಸ್ಥೆಗಳಿಂದ ಹೆಚ್ಚೆಚ್ಚು ಪ್ರಾಜೆಕ್ಟ್ಗಳನ್ನು ತರಿಸಿಕೊಂಡು ಅಧ್ಯಯನಕ್ಕೆ ಒಳಪಡಿಸಲು ನಿರ್ಧರಿಸಲಾಗಿದೆ ಎಂದು ಭಾಟ್ಕರ್‌ ತಿಳಿಸಿದ್ದಾರೆ.
ಸಮಿತಿಯಲ್ಲಿ ಭಾಟ್ಕರ್‌ ಅವರಲ್ಲದೆ ಆರ್‌ಎಸ್‌ಎಸ್‌ ಮತ್ತು ವಿಶ್ವ ಹಿಂದೂ ಪರಿಷತ್‌ಗೆ ಸೇರಿದ ಇಬ್ಬರು ಸದಸ್ಯರಿದ್ದಾರೆ.
ಪಂಚಗವ್ಯ ಅಧ್ಯಯನಕ್ಕೆ ಯೋಜನೆ:
ಪಂಚಗವ್ಯ ಶಕ್ತಿಯ ವೈಜ್ಞಾನಿಕ ದೃಢೀಕರಣ ಮತ್ತು ಸಂಶೋಧನೆ-ಸ್ವರೋಪ್‌ ಇದೊಂದು ರಾಷ್ಟ್ರೀಯ ಯೋಜನೆಯಾಗಿದೆ. ವಿಜ್ಞಾನ ಮತ್ತು ತಂತ್ರಜ್ಞಾನ, ಜೈವಿಕ ತಂತ್ರಜ್ಞಾನ ಸಚಿವಾಲಯ, ವೈಜ್ಞಾನಿಕ ಮತ್ತು ಕೈಗಾರಿಕಾ ಸಂಶೋಧನಾ ಮಂಡಳಿ(ಸಿಎಸ್‌ಐಆರ್‌), ಐಐಟಿ-ದಿಲ್ಲಿಗಳ ಸಹಭಾಗಿತ್ವದಲ್ಲಿ ಪಂಚಗವ್ಯ ಸಂಶೋಧನೆ ನಡೆಯುತ್ತಿದೆ.
ವಿಜ್ಞಾನ ಮತ್ತು ತಂತ್ರಜ್ಞಾನ ಸಚಿವ ಹರ್ಷವರ್ಧನ್‌ ಅವರ ನೇತೃತ್ವದ 19 ಸದಸ್ಯರ ರಾಷ್ಟ್ರೀಯ ಸಂಚಾಲನಾ ಸಮಿತಿ ಸ್ವರೂಪ್‌ ಅಧ್ಯಯನದ ದಾರಿಯನ್ನು ನಿಗದಿಪಡಿಸುತ್ತದೆ.
Panel recievd 54 proposal for scintific study on cow products