#AprilFoolಗಿಂತ ಹೆಚ್ಚು ಟ್ರೆಂಡ್ ಆಯ್ತು #PappuDiwas

ಹೊಸದಿಲ್ಲಿ: ಕಾಂಗ್ರೆಸ್ ಅಧ್ಯಕ್ಷ ರಾಹುಲ್ ಗಾಂಧಿ ವಿರೋಧಿಗಳು ಅವರ ಕಾಲೆಳೆಯಲು ಸಿಕ್ಕ ಯಾವುದೇ ಅವಕಾಶವನ್ನು ಬಿಡುವುದಿಲ್ಲ. ಅವರ ಫೋಟೋ, ವೀಡಿಯೋಗಳನ್ನಿಟ್ಟುಕೊಂಡು ಸಾಮಾಜಿಕ ಜಾಲತಾಣದಲ್ಲಿ ಟ್ರೋಲ್ ಮಾಡುತ್ತಲೇ ಇರುತ್ತಾರೆ.


ಇಂದು ಏಪ್ರಿಲ್ 1. ಎಲ್ಲರಿಗೂ ಗೊತ್ತಿರುವ ಹಾಗೆ ಇದನ್ನು ಮೂರ್ಖರ ದಿನವಾಗಿ ಆಚರಿಸಲಾಗುತ್ತದೆ. ಆದರೆ ರಾಹುಲ್ ವಿರೋಧಿಗಳ ಪಾಲಿಗೆ ಇದು ಪಪ್ಪು ದಿವಸ್.



ಹೌದು ಟ್ವಿಟರ್‌ನಲ್ಲಿಂದು #ಏಪ್ರಿಲ್ ಫೂಲ್‌ಗಿಂತ ಹೆಚ್ಚಾಗಿ ಪಪ್ಪು ದಿನ ( ರಾಹುಲ್ ಗಾಂಧಿ ದಿನ) ಟ್ರೆಂಡ್ ಆಗಿದೆ.


ಫೋಟೋ ಶಾಪ್ ಮೂಲಕ ರಾಹುಲ್ ಅವರ ಭಾವಚಿತ್ರವನ್ನು ವಿವಿಧ ರೀತಿಯಲ್ಲಿ ಚಿತ್ರಿಸುವ ಮೂಲಕ ಅವರ ವಿರೋಧಿಗಳು ಏಪ್ರಿಲ್ ಫೂಲ್‌ನ್ನು #pappudiwas ಎಂದು ಆಚರಿಸಿದ್ದಾರೆ. ಅವರ ಮಾತುಗಳನ್ನು ವ್ಯಂಗ್ಯ ಮಾಡಿ ಪಪ್ಪು ದಿನಕ್ಕೆ ಶುಭಾಶಯ ಎಂದು ಟ್ವೀಟ್ ಮಾಡಿದ್ದಾರೆ. ಇದರಲ್ಲಿ ಮೋದಿ ಬೆಂಬಲಿಗರೇ ಹೆಚ್ಚಿದ್ದಾರೆ.



ಮೂರ್ಖರ ದಿನದ ಪೋಸ್ಟ್‌ಗಿಂತ ಪಪ್ಪು ದಿನ ಎಂದು ಮಾಡಿರುವ ಪೋಸ್ಟ್‌ಗಳೇ ಹೆಚ್ಚಾಗಿದ್ದು , ಬೆಳಗಿನಿಂದಲೇ ಟಾಪ್ ಟ್ರೆಂಡಿಂಗ್‌ನಲ್ಲಿದೆ.




ರಾಹುಲ್ ವಯನಾಡಿಂದ ಕಣಕ್ಕಿಳಿಯುತ್ತಾರೆಂದು ಘೋಷಣೆಯಾದ ಬಳಿಕ ಸಿಪಿಎಂ ಕೂಡ ಅವರ ವಿರುದ್ಧ ಮುಖ ಕೆಂಪಗಾಗಿಸಿಕೊಂಡಿದ್ದು ತನ್ನ ಮುಖವಾಣಿಯಲ್ಲಿ ರಾಹುಲ್ ಅವರನ್ನು ಪಪ್ಪು ಎಂದು ಸಂಬೋಧಿಸಿದೆ. ರಾಹುಲ್ ವಯನಾಡಿಂದ ಕಣಕ್ಕಿಳಿಯುತ್ತಿರುವುದು ಪಪ್ಪುಸ್ಟ್ರೈಕ್ ಎಂದು ಅವರು ಹೀಗಳೆದಿದ್ದಾರೆ.

ರಾಹುಲ್ ಗಾಂಧಿ ದಿನವನ್ನಾಗಿ ಆಚರಿಸಿದ ಕಮಲ ಕಾರ್ಯಕರ್ತರು

ಇಂದೋರ್ ನಗರದ ಭಾರತೀಯ ಜನತಾ ಪಕ್ಷದ ಕಾರ್ಯಕರ್ತರು ಮೂರ್ಖರ ದಿನವನ್ನು ರಾಹುಲ್ ಗಾಂಧಿ ದಿನವನ್ನಾಗಿ ಆಚರಿಸಿದ್ದಾರೆ.

ರಾಜವಾಡದಲ್ಲಿ ನೆರೆದ ಬಿಜೆಪಿ ಕಾರ್ಯಕರ್ತರು ಒಂದು ಯಂತ್ರವನ್ನು ಇಟ್ಟುಕೊಂಡು ರಾಹುಲ್ ಅವರನ್ನು ಟೀಕಿಸಿದರು. ಆ ಯಂತ್ರದ ಒಂದು ಕಡೆ ಆಲೂಗಡ್ಡೆ ಹಾಕಿ ಇನ್ನೊಂದು ಕಡೆಯಿಂದ ಚಿನ್ನದ ಆಲೂಗಡ್ಡೆ ಬರುವಂತ ದೃಶ್ಯ ಸೃಷ್ಟಿಸಿದರು. ಈ ಡೆಮೋ ಮಾಡುವ ವ್ಯಕ್ತಿ ರಾಹುಲ್ ಮಾಸ್ಕ್ ಧರಿಸಿದ್ದ. ಇತರ ಕಾರ್ಯಕರ್ತರು ಕಮಲ್ ನಾಥ್, ದಿಗ್ವಿಜಯ್ ಸಿಂಗ್ ಮತ್ತು ಜ್ಯೋತಿರಾದಿತ್ಯ ಸಿಂಧಿಯಾ ಅವರ ಮಾಸ್ಕ್ ಧರಿಸಿದ್ದರು.

ಬಿಜೆಪಿ ಕಾರ್ಯಕರ್ತರ ಪ್ರಕಾರ ರಾಹುಲ್ ಗಾಂಧಿ ತಮ್ಮ ಹೇಳಿಕೆಗಳಿಂದ ಜನರನ್ನು ರಂಜಿಸುತ್ತಾರೆ.