ಗಜ ಚಂಡಮಾರುತದಿಂದ ಇದ್ದ ಮನೆಯೂ ನಾಶ; 12 ವರ್ಷದ ಮಗನ ಮಾರಾಟ

ನಾಗಪಟ್ಟಣಂ: ತಮಿಳುನಾಡಿನ ನಾಗಪಟ್ಟಣಂ ಜಿಲ್ಲೆಯ ಪಣಂಗುಡಿಯಲ್ಲಿ ಜಮೀನಿನಲ್ಲಿ ಕೆಲಸ ಮಾಡುತ್ತಿದ್ದ 12 ವರ್ಷದ ಹುಡುಗನನ್ನು ಅಧಿಕಾರಿಗಳು ರಕ್ಷಿಸಿದ್ದಾರೆ.

ತಂಜಾಪೂರ್ ಜಿಲ್ಲೆಯ ಪಟ್ಟುಕೊಟ್ಟೈನಲ್ಲಿ ದಿನಗೂಲಿ ಮಾಡಿಕೊಂಡಿರುವ ಈತನ ತಂದೆತಾಯಿ 10ಸಾವಿರಕ್ಕೆ ಈತನನ್ನು ಮಾರಿದ್ದಾಗಿ ತಿಳಿದುಬಂದಿದೆ.

ನಾವು ಕಡು ಬಡವರಾಗಿದ್ದು, ಗಜ ಚಂಡಮಾರುತದಿಂದ ಇದ್ದ ಸೂರು, ಆಸ್ತಿಪಾಸ್ತಿಯನ್ನು ಕಳೆದುಕೊಂಡೆವು. ಹೀಗಾಗಿ ಮಗನನ್ನು 10ಸಾವಿರ ರೂಪಾಯಿಗೆ ಚಂದ್ರು ಎಂಬಾತನಿಗೆ ಮಾರಿದೆವು. ಅವರ ಜಾನುವಾರುಗಳನ್ನು ನೋಡಿಕೊಳ್ಳುವ ಕೆಲಸವನ್ನು ನಮ್ಮ ಮಗನಿಗೆ ನೀಡಲಾಗಿತ್ತು ಎಂದು ದಂಪತಿ ಅಧಿಕಾರಿಗಳಿಗೆ ತಿಳಿಸಿದ್ದಾರೆ.

ಮಕ್ಕಳ ಸಹಾಯವಾಣಿ ಅಧಿಕಾರಿಗಳು ಡಿಸೆಂಬರ್ 22ರಂದು ಬಾಲಕನನ್ನು ರಕ್ಷಿಸಿದ್ದಾರೆ.

ಸದ್ಯ ಬಾಲಕನಿಗೆ ಮಕ್ಕಳ ರಕ್ಷಣಾ ಕೇಂದ್ರದಲ್ಲಿ ಆಶ್ರಯ ಕಲ್ಪಿಸಲಾಗಿದೆ.

ಬಾಲಕನನ್ನು ಕೊಂಡುಕೊಂಡಿದ್ದ ಚಂದ್ರು ವಿರುದ್ಧ ನಾಗೋರ್ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ.