ಮುಫ್ತಿ ಕುಟುಂಬ ರಾಜಕಾರಣ: ರಾಜಕೀಯ ಭವಿಷ್ಯ ಅತಂತ್ರ

ಶ್ರೀನಗರ: ಕುಟುಂಬ ರಾಜಕಾರಣ ಮತ್ತು ರಾಜಕೀಯ ಅಸ್ಥಿರತೆಯಿಂದಾಗಿ ಜಮ್ಮು ಕಾಶ್ಮೀರದ ಪಿಡಿಪಿ ನಾಯಕಿ ಮೆಹಬೂಬ ಮುಫ್ತಿ ರಾಜಕೀಯ ಭವಿಷ್ಯ ಅತಂತ್ರ ಸ್ಥಿತಿಗೆ ತಲುಪಿದೆ.

ಮೆಹಬೂಬ ವಿರುದ್ಧ ಪಿಡಿಪಿ ನಾಯಕರು ಬಹಿರಂಗ ಹೇಳಿಕೆ ನೀಡುವ ಮೂಲಕ ತಮ್ಮ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಜಮ್ಮು-ಕಾಶ್ಮೀರದಲ್ಲಿ ಪಿಡಿಪಿ ಮತ್ತು ಬಿಜೆಪಿ ಮೈತ್ರಿ ಸರಕಾರ ಪತನಗೊಂಡ ಬಳಿಕ ಅಲ್ಲಿ ರಾಜ್ಯಪಾಲರ ಆಳ್ವಿಕೆ ಜಾರಿಯಲ್ಲಿದೆ.

ಮೆಹಬೂಬ ಆಡಳಿತ ಮತ್ತು ಕಾರ್ಯವೈಖರಿಯೇ ಸರಕಾರ ಪತನಕ್ಕೆ ಪರೋಕ್ಷ ಕಾರಣ ಎಂದಿರುವ ಪಿಡಿಪಿ ನಾಯಕರು, ಪಕ್ಷ ತೊರೆಯುತ್ತಿದ್ದಾರೆ. ಮುಫ್ತಿ ನಾಯಕತ್ವದಲ್ಲಿ ಅಸಮಾಧಾನಗೊಂಡಿರುವ 14 ಶಾಸಕರು ಪಿಡಿಪಿ ತೊರೆಯಲಿದ್ದು, ಕಳೆದ ವಾರವೇ ಈ ಬಗ್ಗೆ ನಿರ್ಧಾರ ಪ್ರಕಟಿಸಿದ್ದರು.

ಮೆಹಬೂಬ ಮುಫ್ತಿ ಆಕೆಯ ಸಹೋದರ ತಸಾದುಕ್ ಮುಫ್ತಿಗೆ ಪ್ರವಾಸೋದ್ಯಮ ಸಚಿವ ಖಾತೆ ನೀಡಿದ್ದು, ಸೋದರಮಾವ ಸರ್ತಾಜ್ ಮದನಿಗೆ ಕೆಲವೊಂದು ಅನುಕೂಲ ಮಾಡಿಕೊಟ್ಟಿದ್ದು ಸಹಿತ ಹಲವು ವಿಚಾರಗಳ ಬಗ್ಗೆ ಪಿಡಿಪಿ ನಾಯಕರು ಅಸಮಾಧಾನ ಹೊಂದಿದ್ದಾರೆ. ಹೀಗಾಗಿ ಪಕ್ಷ ತೊರೆಯಲಿದ್ದು, ಇದರಿಂದ ಪಿಡಿಪಿ ರಾಜಕೀಯ ಭವಿಷ್ಯ ಮತ್ತು ಮೆಹಬೂಬ ಮುಫ್ತಿ ಮುಂದಿನ ನಡೆ ಕೂಡ ತೊಂದರೆಗೆ ಸಿಲುಕಿದೆ.