ಆಧಾರ್‌ ಕೇಳಿದರೆ ಖಾಸಗಿತನ ಉಲ್ಲಂಘನೆ ಎನ್ನುತ್ತಾರೆ, ವೀಸಾಗೆ ಬೆತ್ತಲಾಗುತ್ತಾರೆ: ಆಲ್ಫೋನ್ಸ್‌

ತಿರುವನಂತಪುರಂ: ದೇಶದ ನಾಗರಿಕರು ಆಧಾರ್ ಕಾರ್ಡ್‌ ಅನ್ನು ಪ್ರಶ್ನಿಸುತ್ತಾರೆ. ಆದರೆ ಅವರೇ ವೀಸಾಕ್ಕಾಗಿ ತಮ್ಮ ಬಟ್ಟೆಯನ್ನು ಬಿಚ್ಚಲು ಹಿಂಜರಿಯುವುದಿಲ್ಲ ಎಂದು ಕೇಂದ್ರ ಪ್ರವಾಸೋದ್ಯಮ ಖಾತೆ ರಾಜ್ಯ ಸಚಿವ ಕೆ.ಜೆ. ಆಲ್ಫೋನ್ಸ್‌ ವಿವಾದಾತ್ಮಕ ಹೇಳಿಕೆ ನೀಡಿದ್ದಾರೆ.

ವೀಸಾ ಪಡೆಯಲು ಬೆತ್ತಲೆಯಾದರೂ ಜನರಿಗೆ ಯಾವುದೇ ಸಮಸ್ಯೆ ಇಲ್ಲ. ಆದರೆ ಕೇಂದ್ರ ಸರಕಾರ ಮಾಹಿತಿ ಪಡೆದರೆ ಮಾತ್ರ ಮುಜುಗರ ಉಂಟಾಗುತ್ತದೆ ಎಂದು ಸಚಿವರು ತಿಳಿಸಿದರು.

ಜನರಿಗೆ ತಮ್ಮ ಮಾಹಿತಿ ಕೇಳಿದರೆ ಮಾತ್ರ ಖಾಸಗಿತನ ಹಕ್ಕಿನ ಉಲ್ಲಂಘನೆ ಆಗುತ್ತದೆ ಎಂದು ದೂರುತ್ತಾರೆ. ಖಾಸಗಿ ಮಾಹಿತಿಗಳನ್ನು ಖಾಸಗಿ ಕಂಪನಿ ನೀಡುತ್ತಾರೆ ಎಂದು ಜನ ಭಾವಿಸಿದ್ದಾರೆ. ಇದು ಕಪೋಲ ಕಲ್ಪಿತ ವಿಷಯ ಎಂದು ಅವರು ಹೇಳಿದರು.

ಅಮೆರಿಕ ವೀಸಾ ಪಡೆಯಲು ಸಾಕಷ್ಟು ಪುಟಗಳ ಮಾಹಿತಿ ನೀಡಿದ್ದೇನೆ. ಆಧಾರ್ ಮಾಹಿತಿಯನ್ನು ಕೆಲವು ಸರಕಾರಿ ಸಂಸ್ಥೆಗಳಿಗೆ ಮಾತ್ರ ಕೊಟ್ಟಿರುವುದು ಎಂದು ಆಲ್ಫೋನ್ಸ್‌ ಸ್ಪಷ್ಟಪಡಿಸಿದರು.