ಹುಷಾರ್! ಚಪ್ಪಲಿ ಹಾಕಿಕೊಂಡು ಬೈಕ್ ಓಡಿಸಿದರೂ ಬೀಳುತ್ತೆ ದಂಡ!

ಹೊಸದಿಲ್ಲಿ: ದೇಶದಲ್ಲಿ ನೂತನ ಮೋಟಾರು ವಾಹನ ಕಾಯಿದೆ ಜಾರಿಗೆ ಬಂದ ಬಳಿಕ ಸಂಚಾರ ನಿಯಮ ಉಲ್ಲಂಘಿಸುವವರಿಗೆ ವಿಧಿಸುವ ದಂಡದ ಪ್ರಮಾಣ ಭಾರಿ ಏರಿಕೆಯಾಗಿದ್ದು, ಇದಕ್ಕೆ ಭಾರಿ ವಿರೋಧ ಕೂಡ ವ್ಯಕ್ತವಾಗುತ್ತಿದೆ. ಮತ್ತೀಗ ಹೊಸ ಸುದ್ದಿಯೊಂದು ಹರಿದಾಡುತ್ತಿದ್ದು, ದೇಶಾದ್ಯಂತ ಸೆಪ್ಟೆಂಬರ್ 1ರಿಂದ ಜಾರಿಗೆ ಬಂದಿರುವ ಮೋಟಾರು ವಾಹನ ತಿದ್ದುಪಡಿ ಕಾಯಿದೆ ಪ್ರಕಾರ ದ್ವಿಚಕ್ರ ವಾಹನ ಸವಾರರು ಚಪ್ಪಲಿ ಅಥವಾ ಸ್ಯಾಂಡಲ್ಸ್ ಹಾಕಿ ಗಾಡಿ ಓಡಿಸಿದರೂ 1,000ರೂ ದಂಡ ವಿಧಿಸಲು ಅವಕಾಶವಿದೆ ಎನ್ನಲಾಗುತ್ತಿದೆ.

ಶೂ ಹಾಕಿ ಬೈಕ್ ಓಡಿಸಬೇಕು. ಚಪ್ಪಲಿ ಅಥವಾ ಸ್ಯಾಂಡಲ್ಸ್ ಹಾಕಿದರೆ, ಸುಲಭವಾಗಿ ಗೇರ್ ಬದಲಾಯಿಸಲು ಸಾಧ್ಯವಾಗದೆ ಅಪಘಾತಕ್ಕೆ ಈಡಾಗುವ ಸಾಧ್ಯತೆಗಳಿರುತ್ತವೆ. ಹೀಗಾಗಿ ಈ ನಿಮಯವನ್ನು ಕಾಯಿದೆಗೆ ಸೇರಿಸಲಾಗಿದೆ ಎಂದು ಮೂಲಗಳು ತಿಳಿಸಿವೆ.

ದಂಡದ ಮೊತ್ತ 1,000 ರೂ. ಆಗಿದ್ದು, ಈ ತಪ್ಪು ಮರುಕಳಿಸಿದರೆ ದಂಡದ ಜೊತೆಗೆ 15 ದಿನಗಳ ಕಾಲ ಜೈಲು ಶಿಕ್ಷೆಗೆ ಗುರಿಯಾಗಬೇಕಾಗುತ್ತದೆ, ಎಂದು ಸಹ ಹೇಳಲಾಗುತ್ತಿದೆ.

ನಿಯಮ ಉಲ್ಲಂಘಿಸುವ ಚಾಲಕರಿಗೆ ದುಬಾರಿ ದಂಡ ವಿಧಿಸುತ್ತಿರುವ ಬಗ್ಗೆ ಸಾರ್ವಜನಿಕ ವಲಯದಿಂದ ತೀವ್ರ ಆಕ್ಷೇಪ ಕೇಳಿ ಬರುತ್ತಿದೆ. ಚಪ್ಪಲಿ ಬದಲು ಶೂವನ್ನೇ ಹಾಕಬೇಕೆಂಬ ನಿಯಮ ನಿಜವೆಂದಾದರೆ ಈ ಬಗ್ಗೆ ಆಕ್ಷೇಪ ಕೇಳಿಬರದೇ ಇರಲಂತೂ ಸಾಧ್ಯವಿಲ್ಲ.

ಪರಿಷ್ಕೃತ ದಂಡ ಪ್ರಮಾಣ

ಪರಿಷ್ಕೃತಗೊಂಡ ದಂಡ ಪ್ರಕಾರ ಅಪ್ರಾಪ್ತ ಮಕ್ಕಳು ವಾಹನ ಚಾಲನೆಗೆ 5 ಸಾವಿರ ಹಾಗೂ ಪೋಷಕರಿಗೆ 5 ಸಾವಿರ, ಚಾಲನಾ ಲೈಸೆನ್ಸ್‌ ಇಲ್ಲದೆ ವಾಹನ ಚಾಲನೆಗೆ 5 ಸಾವಿರ, ಹೆಲ್ಮೆಟ್‌ ಇಲ್ಲದೆ ವಾಹನ ಚಾಲನೆಗೆ 1 ಸಾವಿರ, ಸೀಟ್‌ ಬೆಲ್ಟ್‌ ಧರಿಸದೆ ಲಘು ವಾಹನ ಚಾಲನೆಗೆ 1 ಸಾವಿರ, ವಿಮೆ ಇಲ್ಲದೆ ವಾಹನ ಚಾಲನೆಗೆ 2 ಸಾವಿರ, ನೋಂದಣಿ ಇಲ್ಲದೆ ವಾಹನ ಚಾಲನೆಗೆ 5 ಸಾವಿರ, ನಿಗದಿತ ಆಸನಗಳಿಗಿಂತ ಹೆಚ್ಚು ಪ್ರಯಾಣಿಕರ ಸಾಗಾಣಿಕೆಗೆ ಪ್ರತಿ ಪ್ರಯಾಣಿಕರಿಗೆ 200, ಅಪಾಯಕಾರಿ ಚಾಲನೆಗೆ 5 ಸಾವಿರ, ವಾಹನದ ಕರ್ಕಶ ಶಬ್ದ ಮಾಲಿನ್ಯಕ್ಕೆ 2 ಸಾವಿರ ಹಾಗೂ ರಹದಾರಿ ಇಲ್ಲದೆ ವಾಹನ ಚಾಲನೆಗೆ 10 ಸಾವಿರ ರೂ.ಗಳ ದಂಡ ವಿಧಿಸಲಾಗುವುದು.