ದೆಹಲಿ ದಂಗೆ: ಪಾಪ್ಯೂಲರ್ ಫ್ರಂಟ್ ಮುಖ್ಯಸ್ಥ ಪರ್ವೇಜ್ ಬಂಧನ!

ನವದೆಹಲಿ: ಶಾಹೀನ್ ಬಾಗ್ ಸಿಎಎ ವಿರೋಧಿ ಪ್ರತಿಭಟನೆ ಹಾಗೂ ದೆಹಲಿ ದಂಗೆಗೆ ಪ್ರಚೋದನೆ ನೀಡಿದ ಆರೋಪದ ಮೇಲೆ ಪಾಪ್ಯೂಲರ್ ಫ್ರಂಟ್ ಆಫ್ ಇಂಡಿಯಾ(ಪಿಎಫ್‌ಐ) ಮುಖ್ಯಸ್ಥ ಪರ್ವೇಜ್ ಹಾಗೂ ಕಾರ್ಯದರ್ಶಿ ಇಲಿಯಾಸ್ ನನ್ನು ಪೊಲೀಸರು ಬಂಧಿಸಿದ್ದಾರೆ.


ಪರ್ವೇಜ್ ಹಾಗೂ ಇಲಿಯಾಸ್ ವಿರುದ್ಧ ಸಿಎಎ ಜಾರಿ ವಿರೋಧಿಸಿ ದೆಹಲಿಯ ಶಾಹೀನ್ ಬಾಗ್‌ನಲ್ಲಿ ನಡೆಯುತ್ತಿದ್ದ ಪ್ರತಿಭಟನೆ ಗೆ ಹಣಕಾಸು ನೆರವು ಹಾಗೂ ನಂತರ ನಡೆದ ದಂಗೆಗೆ ಪ್ರಚೋದನೆ ನೀಡಿದ ಆರೋಪ ಕೇಳಿ ಬಂದಿದೆ.

ದೆಹಲಿ ದಂಗೆ ಹಾಗೂ ಐಬಿ ಅಧಿಕಾರಿ ಅಂಕಿತ್ ಶರ್ಮಾ ಹತ್ಯೆಗೆ ಪ್ರಚೋದನೆ ನೀಡಿದ ಆರೋಪದ ಮೇಲೆ ಬಂಧಿತವಾಗಿರುವ ಆಪ್ ಮಾಜಿ ನಾಯಕ ತಾಹೀರ್ ಹುಸೇನ್ ಅವರೊಂದಿಗೂ ಪರ್ವೇಜ್ ಸಂಬಂಧ ಹೊಂದಿದ್ದು, ದಂಗೆಗೆ ಪ್ರಚೋದನೆ ನೀಡಲು ಅಕ್ರಮವಾಗಿ ಹಣ ಒದಗಿಸಿದ ಗಂಭೀರ ಆರೋಪ ಮಾಡಲಾಗಿದೆ.

ಪಿಎಫ್‌ಐ ವಿರುದ್ಧ ಪ್ರಕರಣ ದಾಖಲಿಸಿದ ಇ.ಡಿ

ಶಾಹೀನ್ ಬಾಗ್ ಪ್ರತಿಭಟನೆ ಶುರುವಾದಾಗಿನಿಂದ ಪ್ರತಿಭಟನಾಕಾರರ ಮಧ್ಯೆ ಮೂಲಭುತವಾದ ಬಿತ್ತಲು ಹಣವಿಸುತ್ತಿದ್ದ ಪಿಎಫ್‌ಐ ಇದಕ್ಕಾಗಿ ಹೇರಳ ಹಣ ಖರ್ಚು ಮಾಡಿದೆ ಎನ್ನಲಾಗಿದೆ.

ಪ್ರತಿಭಟನೆಯನ್ನು ದಂಗೆಯನ್ನಾಗಿ ಪರಿವರ್ತಿಸುವಲ್ಲಿ ಪರ್ವೇಜ್ ಹಾಗೂ ಇಲಿಯಾಸ್ ಮಹತ್ವದ ಪಾತ್ರ ನಿರ್ವಹಿಸಿದ್ದು, ಗಲಭೆಕೋರರಿಗೆ ಪ್ರಚೋದನೆ ನೀಡಿ ಭಾರೀ ಹಿಂಸಾಚಾರಕ್ಕೆ ಕಾರಣರಾಗಿದ್ದಾರೆ ಎಂದು ಪೊಲೀಸರು ಹೇಳಿದ್ದಾರೆ.

ಈ ಎಲ್ಲ ಆರೋಪಗಳ ಹಿನ್ನೆಲೆಯಲ್ಲಿ ದೆಹಲಿ ಕ್ರೈಂ ಬ್ರ್ಯಾಂಚ್ ವಿಭಾಗದ ದೂರು ಆಧರಿಸಿ ಪಿಎಫ್‌ಐ ಮುಖ್ಯಸ್ಥ ಪರ್ವೇಜ್ ಹಾಗೂ ಕಾರ್ಯದರ್ಶಿ ಇಲಿಯಾಸ್‌ನನ್ನು ಬಂಧಿಸಿ ವಿಚಾರಣೆ ನಡೆಸಲಾಗುತ್ತಿದೆ ಎಂದು ದೆಹಲಿ ಪೊಲೀಸರು ಸ್ಪಷ್ಟಪಡಿಸಿದ್ದಾರೆ.