ಫೆ.1ರಿಂದ ಕಡಿಮೆ ಆಗಲಿದೆ ಕೇಬಲ್‌ ದರ; ನಿಮಗೆ ಇಷ್ಟವಾದ ಚಾನೆಲ್‌ಗಳಿಗೆ ಮಾತ್ರ ಪಾವತಿಸಿ

ಹೊಸದಿಲ್ಲಿ: ಕೇಬಲ್‌ ಟಿವಿ ದರ ವ್ಯವಸ್ಥೆ ಜಾರಿಯನ್ನು ಜನವರಿ 31ಕ್ಕೆ ವಿಸ್ತರಿಸಲಾಗಿದೆ ಎಂದು ಭಾರತೀಯ ಟೆಲಿಕಾಂ ನಿಯಂತ್ರಣ ಪ್ರಾಧಿಕಾರ (ಟ್ರಾಯ್‌) ತಿಳಿಸಿದೆ.

ಈ ಹಿಂದೆ ಡಿಸೆಂಬರ್ 29ಕ್ಕೆ ಈ ವ್ಯವಸ್ಥೆ ಜಾರಿಯಾಗಲಿದೆ ಎಂದು ಟ್ರಾಯ್ ಹೇಳಿತ್ತು. ಆದರೆ, ನೂತನ ದರ ಮತ್ತು ಚಾನೆಲ್ ಆಯ್ಕೆ ವ್ಯವಸ್ಥೆ ಪರಿಚಯಿಸಲು ಹೆಚ್ಚುವರಿ ಸಮಯಾವಕಾಶ ಕಲ್ಪಿಸಬೇಕೆಂದು ಸ್ಯಾಟ್‌ಲೈಟ್ ಮತ್ತು ಕೇಬಲ್ ಆಪರೇಟರ್‌ಗಳು ಟ್ರಾಯ್ ಬಳಿ ಮನವಿ ಮಾಡಿದ್ದರು. ಈ ಹಿನ್ನೆಲೆಯಲ್ಲಿ ಟ್ರಾಯ್ ಗಡುವನ್ನು ವಿಸ್ತರಿಸಿದೆ.

ಅನಗತ್ಯ ಚಾನೆಲ್‌ಗಳಿಗೆ ಹಣ ತೆರುವುದರಿಂದ ಮುಕ್ತಿ

ಟ್ರಾಯ್ ಹೊರಡಿಸಿರುವ ಹೊಸ ನಿಯಮದಿಂದ ಅನಗತ್ಯ ಚಾನೆಲ್‌ಗಳ ಚಂದಾ ಕಟ್ಟುವುದು ತಪ್ಪಲಿದ್ದು, ಎಲ್ಲ ಚಾನೆಲ್‌ಗಳು ತನ್ನ ಎ-ಲಾ-ಕಾರ್ಟೆ ದರವನ್ನು ಪರಿಷ್ಕರಿಸಿವೆ. ದೇಶಾದ್ಯಂತ ಕೇಬಲ್ ದರ ಹಾಗೂ ಡಿಟಿಎಚ್ ಎರಡಕ್ಕೂ ಹೊಸ ದರ ನಿಗದಿ ಪಡಿಸಲಾಗಿದೆ.

ಈ ಮೊದಲು ಕೇಬಲ್ ಮತ್ತು ಡಿಟಿಎಚ್ ಮಾಲೀಕರು ದರ ನಿಗದಿ ಮಾಡುತ್ತಿದ್ದರು. ಆದರೆ, ಈಗ ಪ್ರಸಾರ ಸಂಸ್ಥೆಗಳು ಪ್ರತಿಯೊಂದು ಚಾನೆಲ್‌ಗಳನ್ನು ಬಿಡಿಬಿಡಿಯಾಗಿ ವಿತರಕರಿಗೆ ನೀಡುವಂತಹ ಆಯ್ಕೆಯನ್ನು ಜಾರಿಗೆ ತರಲಾಗುತ್ತಿದೆ.

ಇದರಿಂದ ಗ್ರಾಹಕರು ತಮಗೆ ಬೇಕಾದ ಚಾನೆಲ್‌ಗಳನ್ನು ಪಡೆಯಲು ಇಡೀ ಪ್ಯಾಕೇಜ್‌ಗೆ ಅಥವಾ ಪ್ರೀಮಿಯಂ ಚಾನೆಲ್‌ಗಳ ಸಮೂಹಕ್ಕೆ ಹಣ ಸಂದಾಯ ಮಾಡುವ ಹೆಚ್ಚಿನ ಹೊರೆ, ಅನಗತ್ಯವಾಗಿ ಹಣ ತೆರುವುದು ತಪ್ಪುತ್ತದೆ ಮತ್ತು ತಮ್ಮ ಆಯ್ಕೆಯ ಚಾನೆಲ್‌ಗಳಿಗೆ ಮಾತ್ರ ಹಣ ನೀಡಿ ನೋಡಬಹುದಾಗಿದೆ. ಟ್ರಾಯ್ ನೀಡಿರುವ ಮಾಹಿತಿಯ ಪ್ರಕಾರ, ಈ ವ್ಯವಸ್ಥೆ ಫೆಬ್ರವರಿ 1 ರಿಂದ ಜಾರಿಯಾಗಲಿದೆ.