ಸಿಎಎ ಜಾರಿಗಾಗಿ ಮಧ್ಯಪ್ರದೇಶ ಹೈಕೋರ್ಟ್‌ಗೆ ಸಾರ್ವಜನಿಕ ಹಿತಾಸಕ್ತಿ ಅರ್ಜಿ ಸಲ್ಲಿಕೆ

ಜಬಲ್ಪುರ: ಕಾಂಗ್ರೆಸ್‌ ಆಡಳಿತವಿರುವ ಮಧ್ಯಪ್ರದೇಶದಲ್ಲಿ ಪೌರತ್ವ ನೋಂದಣಿ ಕಾಯಿದೆ (ಸಿಎಎ) ಜಾರಿಗಾಗಿ ಆಗ್ರಹಿಸಿ ಹೈಕೋರ್ಟ್‌ಗೆ ಸಾರ್ವಜನಿಕ ಹಿತಾಸಕ್ತಿ ಅರ್ಜಿ (ಪಿಐಎಲ್‌) ಸಲ್ಲಿಕೆಯಾಗಿದೆ. ನಾಲ್ವರು ಪಿಐಎಲ್‌ ಸಲ್ಲಿಸಿದ್ದು , ಆ ಪೈಕಿ ಹಿರಿಯ ವಕೀಲ ರಾಮ್‌ ಕಿಶೋರ್‌ ಕಟಿಯಾರ್‌ ಕೂಡ ಅರ್ಜಿದಾರರಾಗಿದ್ದಾರೆ.

ಇತ್ತೀಚೆಗೆ ಮಧ್ಯಪ್ರದೇಶ ಸಿಎಂ ಕಮಲ್‌ನಾಥ್‌ ಅವರು ರಾಜ್ಯದಲ್ಲಿ ಸಿಎಎ ಜಾರಿ ಸಾಧ್ಯವಿಲ್ಲ ಎಂದಿದ್ದರು. ''ಮುಖ್ಯಮಂತ್ರಿ ಕೇಂದ್ರ ಸರಕಾರ ಮಹತ್ವಾಕಾಂಕ್ಷಿ ಕಾಯಿದೆಗೆ ಸಡ್ಡು ಹೊಡೆಯಲು ಮುಂದಾಗಿದ್ದಾರೆ. ಸಿಎಎ ಜಾರಿಯಿಂದ ಜನಸಾಮಾನ್ಯರಿಗೆ ತೊಂದರೆ ಆಗುವುದಿಲ್ಲ. ಹಾಗಾಗಿ ಪಿಐಎಲ್‌ ಸಲ್ಲಿಸಲಾಗಿದೆ, ''ಎಂದು ಕಟಿಯಾರ್‌ ಅವರು ಸುದ್ದಿಸಂಸ್ಥೆಗೆ ಪ್ರತಿಕ್ರಿಯಿಸಿದ್ದಾರೆ.

ಪಿಐಎಲ್‌ನಲ್ಲಿ ಸಿಎಂ ಕಮಲ್‌ನಾಥ್‌ ಮತ್ತು ಸರಕಾರದ ಮುಖ್ಯ ಕಾರ್ಯದರ್ಶಿ ಅವರನ್ನು ಪ್ರತಿದಾವೆದಾರರಾಗಿಸಿದ್ದೇವೆ ಎಂದು ಮಾಹಿತಿ ನೀಡಿದ್ದಾರೆ. ಕಟಿಯಾರ್‌ ಹೊರತಾಗಿ ಅಖಿಲ ಭಾರತ ಮಲಯಾಳಿ ಸಂಘದ ಅಧ್ಯಕ್ಷ ಎಸ್‌.ಕೆ. ಮೆನನ್‌, ವೀರ ವೀರಾಂಗನ ಸಂಸ್ಥೆ ಅಧ್ಯಕ್ಷೆ ಚಂದ್ರಪ್ರಭಾ ಹಾಗೂ ಅಕ್ಷರ್‌ ಜ್ಯೋತಿ ಸಂಸ್ಥೆಯ ಆಶಿಶ್‌ ಶರ್ಮಾ ಕೂಡ ಪಿಐಎಲ್‌ನಲ್ಲಿಅರ್ಜಿದಾರರಾಗಿದ್ದಾರೆ.