ಸೇನಾ ಬತ್ತಳಿಗೆ ಸೇರಿದ ಪಿನಾಕಾ ಮಿಸೈಲ್‌: ಎಲ್ಲ ಪರೀಕ್ಷೆಗಳಲ್ಲಿ ಪಾಸ್‌ ಈ ಕ್ಷಿಪಣಿ

ಬಾಲಸೋರ್‌: ದೇಶೀಯ ನಿರ್ಮಿತ ಮಧ್ಯಮ ಅಂತರದ ದಾಳಿ ಸಾಮರ್ಥ್ಯ ಹೊಂದಿರುವ ಪಿನಾಕ ಕ್ಷಿಪಣಿ ವ್ಯವಸ್ಥೆಯನ್ನು ಸತತ ಎರಡು ದಿನ ಪರೀಕ್ಷೆಗೆ ಒಳಪಡಿಸಲಾಗಿದ್ದು, ಎಲ್ಲ ಪರೀಕ್ಷೆಗಳು ಯಶಸ್ವಿಯಾಗಿದೆ ಎಂದು ಸೇನಾ ಮೂಲಗಳು ತಿಳಿಸಿವೆ.

75 ಕಿ.ಮೀ. ದೂರದ ಶತ್ರುಪಾಳಯದ ಮೇಲೆ ದಾಳಿ ನಡೆಸಬಲ್ಲ ಪಿನಾಕವನ್ನು ಒಡಿಶಾದ ಚಂಡೀಪುರ ಸಮೀಪದ ಇಂಟಿಗ್ರೇಟೆಡ್‌ ಟೆಸ್ಟಿಂಗ್‌ ರೇಂಜ್‌ನಲ್ಲಿ(ಐಟಿಆರ್‌) ಪರೀಕ್ಷೆ ನಡೆಸಲಾಗಿದೆ. ಭಾರತೀಯ ಸಂಚ­ರಣೆ ಉಪಗ್ರಹ ವ್ಯವಸ್ಥೆ ಹೊಂದಿರುವುದು ಪಿನಾಕದ ವಿಶೇಷವಾಗಿದೆ. ಇದರಿಂದಾಗಿ ಶತ್ರುಪಾಳಯದ ಮೇಲೆ ನಿಖರವಾಗಿ ದಾಳಿ ನಡೆಸಲು ಅನುಕೂಲವಾಗಲಿದೆ. ವಿಫಲತೆ ಸಾಧ್ಯತೆ ತೀರ ಕಡಿಮೆ ಎಂದು ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ಕಳೆದ ಮಾರ್ಚ್‌ನಲ್ಲಿ ಪಿನಾಕ ಗುರಿ ನಿರ್ದೇಶಿತ ರಾಕೆಟ್‌ ವ್ಯವಸ್ಥೆಯ ಪರೀಕ್ಷೆಯನ್ನು ಸೇನೆ ನಡೆಸಿತ್ತು. ರಾಜಸ್ಥಾನದ ಪೋಖ್ರಾನ್‌ನಲ್ಲಿ ಮೂರೂ ಬಾರಿ ನಡೆಸಲಾದ ಪರೀಕ್ಷೆ ಯಶಸ್ವಿಯಾಗಿತ್ತು.

ಶಬ್ದಕ್ಕಿಂತಲೂ ಹೆಚ್ಚು ವೇಗವಾಗಿ ಅಪ್ಪಳಿಸುವ ಬ್ರಹ್ಮೋಸ್‌ ಕ್ಷಿಪಣಿ ಉಡಾವಣೆ ಯಶಸ್ವಿ

ಪಿನಾಕ ಎಂಕೆ-2 ರಾಕೆಟ್‌ಗೆ ಆಧುನಿಕ ಸಂಚರಣೆ ವ್ಯವಸ್ಥೆಯನ್ನು ಅಳವಡಿಸುವ ಮೂಲಕ ರಕ್ಷಣಾ ಸಂಶೋಧನೆ ಮತ್ತು ಅಭಿವೃದ್ಧಿ ಸಂಸ್ಥೆ (ಡಿಆರ್‌ಡಿಒ) ಹೆಚ್ಚು ಶಕ್ತಿಶಾಲಿಯಾಗಿಸಿದೆ.