ವಿದ್ಯುತ್‌ ಕದ್ದಿದ್ದ ಅಪರಾಧಕ್ಕಾಗಿ 50 ಸಸಿ ನೆಡುವ ಶಿಕ್ಷೆ ವಿಧಿಸಿದ ದಿಲ್ಲಿ ಕೋರ್ಟ್‌

ಹೊಸದಿಲ್ಲಿ: ವಿದ್ಯುತ್‌ ಕಳ್ಳತನ ಪ್ರಕರಣದಲ್ಲಿ ಕ್ರಿಮಿನಲ್‌ ವಿಚಾರಣೆ ಎದುರಿಸುತ್ತಿದ್ದ ಆರೋಪಿಗೆ ಸಮುದಾಯದ ಸೇವೆಯಾಗಿ 50 ಸಸಿ ನೆಡುವಂತೆ ದಿಲ್ಲಿ ಹೈಕೋರ್ಟ್‌ ನಿರ್ದೇಶಿಸಿದೆ.

ವಿಚಾರಣೆ ಮುಕ್ತಾಯಗೊಳಿಸಲು ಒಪ್ಪಿರುವ ಕೋರ್ಟ್‌ ದಿಲ್ಲಿಯ ಬುದ್ಧ ಜಯಂತಿ ಪಾರ್ಕ್‌ನಲ್ಲಿ ಸಸಿಗಳನ್ನು ಒಂದು ತಿಂಗಳಲ್ಲಿ ನೆಡುವಂತೆ ಆದೇಶಿಸಿದ್ದಲ್ಲದೇ ಈ ಸಂಬಂಧ ಉಪ ಅರಣ್ಯ ಸಂರಕ್ಷಣಾಧಿಕಾರಿಯ (ಪಶ್ಚಿಮ) ನೆರವು ಪಡೆಯುವಂತೆ ಸೂಚಿಸಿದೆ. ಉಪ ಅರಣ್ಯ ಸಂರಕ್ಷಣಾಧಿಕಾರಿಯ (ಡಿಸಿಎಫ್‌) ನೆರವಿನ ಮೇರೆಗೆ ಆರೋಪಿ ಮಾವು, ಬೇವು, ನೇರಳೆ, ಆಲದ ಮರ ಹೀಗೆ ವಿವಿಧ ಪ್ರಭೇದದ ಸಸಿಗಳನ್ನು ನೆಡಬೇಕು.

ಆದೇಶ ಪರಿಪಾಲನೆ ಪೂರ್ಣಗೊಂಡಿದ್ದರ ಕುರಿತು ಆರೋಪಿ ಹಾಗೂ ಡಿಸಿಎಫ್‌ ನ್ಯಾಯಾಲಯಕ್ಕೆ ಭಾವಚಿತ್ರ ಸಮೇತ ಅಫಿಡವಿಟ್‌ ಸಲ್ಲಿಸಬೇಕು. ಒಂದೊಮ್ಮೆ ವಿಫಲವಾದಲ್ಲಿ ಮುಂದಿನ ಕ್ರಮ ಕೈಗೊಳ್ಳಲಾಗುವುದು,'' ಎಂದು ಕೋರ್ಟ್‌ ಎಚ್ಚರಿಸಿದೆ. ಆರೋಪಿಯು ಅಂಗಡಿಯನ್ನು ಬಾಡಿಗೆ ನೀಡಿದ್ದ. ಈ ಅಂಗಡಿಗೆ ರಸ್ತೆಯಲ್ಲಿರುವ ವಿದ್ಯುತ್‌ ಕಂಬದಿಂದ ಅಕ್ರಮವಾಗಿ ತಂತಿ ಎಳೆದು ವಿದ್ಯುತ್‌ ಸಂಪರ್ಕ ಪಡೆಯಲಾಗಿತ್ತು. ಇದರಿಂದ 18,267 ರೂ.ನಷ್ಟು ಮೊತ್ತದ ವಿದ್ಯುತ್‌ ಕಳುವಾಗಿತ್ತು.