ಜಪಾನ್‌ ತಲುಪಿದ ಪ್ರಧಾನಿ ಮೋದಿ

ಹೊಸದಿಲ್ಲಿ: ಜಪಾನ್‌ ಪ್ರಧಾನಿ ಶಿನ್ಜೊ ಅಬೆ ಅವರೊಂದಿಗೆ ವಾರ್ಷಿಕ ಶೃಂಗಸಭೆಯಲ್ಲಿ ಪಾಲ್ಗೊಳ್ಳಲು ಪ್ರಧಾನಿ ನರೇಂದ್ರ ಮೋದಿ ಶನಿವಾರ ಜಪಾನ್‌ಗೆ ತೆರಳಿದ್ದಾರೆ.

ಅಕ್ಟೋಬರ್‌ 28 ಮತ್ತು 29ರಂದು ಶೃಂಗಸಭೆ ನಡೆಯಲಿದೆ. ಪ್ರವಾಸಕ್ಕೂ ಮುನ್ನ ಮಾತನಾಡಿದ ಪ್ರಧಾನಿ ಮೋದಿ, ಭಾರತ-ಜಪಾನ್‌ ಸಂಬಂಧವು ಗೆಲುವಿನ ಬಾಂಧವ್ಯವಾಗಿದೆ. ಆರ್ಥಿಕ ಹಾಗೂ ತಾಂತ್ರಿಕ ಕ್ಷೇತ್ರದಲ್ಲಿ ಜಪಾನ್‌, ಭಾರತದ ಅತ್ಯಂತ ನಂಬಿಕಸ್ಥ ಪಾಲುದಾರ ದೇಶವಾಗಿದೆ. ಮುಂಬಯಿ-ಅಹಮದಾಬಾದ್‌ ಬುಲೆಟ್‌ ರೈಲು, ನಿರ್ದಿಷ್ಟ ಸರಕು ಕಾರಿಡಾರ್‌ನಂತಹ ಯೋಜನೆಗಳಿಂದ ಇದು ಸಾಬೀತಾಗಿದೆ ಎಂದು ಹೇಳಿದರು.

ಭಾರತ ಮತ್ತು ಜಪಾನ್‌ ನಡುವೆ ವಿಶೇಷ ವ್ಯೂಹಾತ್ಮಕ ಮತ್ತು ಜಾಗತಿಕ ಮಟ್ಟದ ಪಲುದಾರಿಕೆ ಇದೆ. ಇತ್ತೀಚಿನ ದಿನಗಳಲ್ಲಿ ಜಪಾನ್‌ನೊಂದಿಗೆ ನಮ್ಮ ಬಾಂಧವ್ಯ ನೂತನ ಎತ್ತರಕ್ಕೇರಿದೆ. ಇದು ಭಾರತದ 'ಆಕ್ಟ್ ಈಸ್ವ್‌' ನೀತಿಯ ಮೇಲೆ ನಿಂತಿದೆ. ಅಲ್ಲದೇ ಇಂಡೋ-ಪೆಸಿಫಿಕ್‌ ಪ್ರದೇಶದಲ್ಲಿ ಮುಕ್ತ ಹಾಗೂ ಸರ್ವಾಂಗೀಣ ವಾತಾವರಣ ನಿರ್ಮಿಸುವ ನಮ್ಮ ದೃಷ್ಟಿಕೋನ ಮತ್ತು ಬದ್ಧತೆ ಮುಂದುವರಿಯಲಿದೆ ಎಂದು ಮೋದಿ ತಿಳಿಸಿದರು.

ಮೇಕ್‌ ಇನ್‌ ಇಂಡಿಯಾ, ಸ್ಕಿಲ್‌ ಇಂಡಿಯಾ, ಡಿಜಿಟಲ್‌ ಇಂಡಿಯಾ, ಸ್ಟಾರ್ಟ್‌ ಅಪ್‌ ಇಂಡಿಯಾದಂತಹ ಯೋಜನೆಗಳಲ್ಲಿ ಜಪಾನ್‌ ನಮ್ಮೊಂದಿಗೆ ಕೆಲಸ ಮಾಡುತ್ತಿದೆ. ಭಾರತದ ಆರ್ಥಿಕ ಭವಿಷ್ಯದ ಮೇಲೆ ಜಪಾನೀ ಹೂಡಿಕೆದಾರರು ನಂಬಿಕೆ ಇಟ್ಟಿದ್ದು, ದೇಶದ ಆರ್ಥಿಕ ಭವಿಷ್ಯವು ಸಾಕಷ್ಟು ಅವಕಾಶಗಳಿಂದ ತುಂಬಿದೆ ಎಂದು ಹೇಳಿದರು.

ಪ್ರಧಾನಿಯಾದ ನಂತರ ಮೋದಿ ಅವರು ಅಬೆ ಅವರನ್ನು 2014ರ ಸೆಪ್ಟೆಂಬರ್‌ನಲ್ಲಿ ಮೊದಲ ಬಾರಿಗೆ ಭೇಟಿಯಾಗಿದ್ದು, ಇದು ಅವರ 12ನೇ ಭೇಟಿಯಾಗಿದೆ.