ಕಾಂಗ್ರೆಸ್‌ನಿಂದ ಪಂಜಾಬ್‌ ಯುವಜನರ ಹೆಸರಿಗೆ ಮಸಿ: ಪಿಎಂ

ಹೊಸದಿಲ್ಲಿ: ಒಂದು ವಾರದ ನಂತರ ಮೌನ ಮುರಿದಿರುವ ಪ್ರಧಾನಿ ನರೇಂದ್ರ ಮೋದಿ, ಆಮ್‌ ಆದ್ಮಿ ಪಕ್ಷದ ನಾಯಕ ಅರವಿಂದ್‌ ಕೇಜ್ರಿವಾಲ್‌ ವಿರುದ್ಧ ಹರಿಹಾಯ್ದಿದ್ದಾರೆ.

ಮುಂಬರುವ ವಿಧಾನಸಭೆ ಚುನಾವಣೆಯಲ್ಲಿ ಕೇಜ್ರಿವಾಲ್‌ ಪಕ್ಷವನ್ನು ಪಂಜಾಬ್‌ ಜನತೆ ಹೊರಗಟ್ಟುವರು ಎಂದಿದ್ದಾರೆ.

'ದಿಲ್ಲಿಯಿಂದ ಪಂಜಾಬ್‌ ಕಡೆಗೆ ಪಯಣ ಬೆಳೆಸಿರುವ ಜನರನ್ನುಇಲ್ಲಿಂದ ವಾಪಸ್ ಕಳುಹಿಸುವ ಮುನ್ನ, ಮೊದಲು ದಿಲ್ಲಿ ಜನರಿಗೆ ನೀಡಿರುವ ಭರವಸೆಯನ್ನು ಪೂರೈಸಿ ಎಂದು ಹೇಳಿ ಕಳುಹಿಸಿ,'ಎಂದು ಫರೀದ್ ಕೋಟ್‌ ರ‍್ಯಾಲಿಯಲ್ಲಿ ಪ್ರಧಾನಿ ಹೇಳಿದ್ದಾರೆ.

ಎಸ್‌ಎಡಿ-ಬಿಜೆಪಿ ಮೈತ್ರಿಕೂಟದ ಮುಖ್ಯಮಂತ್ರಿ ಅಭ್ಯರ್ಥಿ ಪ್ರಕಾಶ್‌ ಸಿಂಗ್‌ ಬಾದಲ್‌ ಪರ ಪ್ರಚಾರ ಮಾಡಿದ ಪ್ರಧಾನಿ, 'ಹೊರಗಿನವರು ಇವರ ವಿರುದ್ಧ ದನಿ ಎತ್ತಬಾರದು. ಅಣ್ಣಾ ಹಜಾರೆ ಅವರಂಥ ವ್ಯಕ್ತಿಗೆ ನ್ಯಾಯ ಸಲ್ಲಿಸಲಾಗದವರು, ಬಾದಲ್‌ ಜೀ ಬಗ್ಗೆ ಒಳ್ಳೆಯ ಮಾತುಗಳನ್ನು ಆಡಲಿ ಎಂದು ನಿರೀಕ್ಷಿಸುವುದು ಸರಿ ಇಲ್ಲ,' ಎಂದಿದ್ದಾರೆ.

'ರಾಜ್ಯ ಯುವಜನರನ್ನು ಕೆಟ್ಟದಾಗಿ ಬಿಂಬಿಸಲು ಕಾಂಗ್ರೆಸ್‌ ಅಭಿಯಾನವನ್ನು ಆರಂಭಿಸಿದೆ. ಪಂಜಾಬ್‌ ಯುವಜನರನ್ನು ಉಗ್ರರು, ದುಶ್ಚಟಗಳ ದಾಸರು ಎಂದು ಬಿಂಬಿಸುವ ಮೂಲಕ ದೊಡ್ಡ ತಪ್ಪು ಮಾಡಿದೆ. ರಾಜ್ಯಕ್ಕಾಗಿ ಕೆಲಸ ಮಾಡುವ ಪಕ್ಷಕ್ಕೆ ಮತ ನೀಡಿ, ಪ್ರಬಲ ಸರಕಾರ ಅಸ್ತಿತ್ವಕ್ಕೆ ಬರಲಿ,' ಎಂದು ಪ್ರಧಾನಿ ಆಗ್ರಹಿಸಿದ್ದಾರೆ.

ಫೆಬ್ರವರಿ 4ರಂದು ಪಂಜಾಬ್‌ನ 117 ವಿಧಾನಸಭಾ ಕ್ಷೇತ್ರಗಳಿಗೆ ಮತನಾದ ನಡೆಯಲಿದೆ.