ಪಿಎಂ ಕೇರ್ಸ್‌ ನಿಧಿಯಿಂದ ಬಿಹಾರದಲ್ಲಿ 500 ಹಾಸಿಗೆಗೆಳ ಎರಡು ತಾತ್ಕಾಲಿಕ ಆಸ್ಪತ್ರೆ ನಿರ್ಮಾಣ

ಹೊಸದಿಲ್ಲಿ: ಬಿಹಾರದ 500 ಹಾಸಿಗೆ ಸಾಮರ್ಥ್ಯದ ಎರಡು ತಾತ್ಕಾಲಿಕ ಕೋವಿಡ್‌ ಆಸ್ಪತ್ರೆಗಳಿಗೆ ಪಿಎಂ ಕೇರ್ಸ್‌ ಫಂಡ್ ಟ್ರಸ್ಟ್‌ನಿಂದ ಹಣಕಾಸು ನೆರವು ನೀಡಲಾಗುತ್ತಿದೆ ಎಂದು ಪ್ರಧಾನಿ ಮಂತ್ರಿ ಕಚೇರಿ ಸೋಮವಾರ ಹೇಳಿದೆ.

ಡಿಆರ್‌ಡಿಒ ಮೂಲಕ ಬಿಹಾರದ ಪಾಟ್ನಾ ಮತ್ತು ಮುಝಾಫರ್‌ಪುರ್‌ದಲ್ಲಿ ತಾತ್ಕಾಲಿಕ ಆಸ್ಪತ್ರೆಗಳನ್ನು ನಿರ್ಮಾಣ ಮಾಡಲು ನೆರವು ನೀಡುವ ಮೂಲಕ ಕೋವಿಡ್‌-19 ವಿರುದ್ಧ ಹೋರಾಟ ನಡೆಸಲು ಪಿಎಂ ಕೇರ್ಸ್‌ ಫಂಡ್‌ ಟ್ರಸ್ಟ್‌ ನಿರ್ಧರಿಸಿದೆ ಎಂದು ಪ್ರಧಾನ ಮಂತ್ರಿ ಕಚೇರಿ (ಪಿಎಂಒ) ಟ್ಟೀಟ್‌ನಲ್ಲಿ ಹೇಳಿದೆ.

ಈ ಸಂಬಂಧ ಸರಣಿ ಟ್ವೀಟ್‌ ಮಾಡಿರುವ ‘ಪಿಎಂಒ’ ಪಾಟ್ನಾದ ಬಿಹ್ತಾದಲ್ಲಿ ನಿರ್ಮಿಸಲಾಗಿರುವ 500 ಹಾಸಿಗೆಗಳ ಆಸ್ಪತ್ರೆಯನ್ನು ಇಂದು (ಸೋಮವಾರ) ಉದ್ಘಾಟನೆ ಮಾಡಲಾಗುತ್ತಿದೆ. ಮುಝಾಫರ್‌ಪುರ್‌ನ 500 ಹಾಸಿಗೆಗಳ ಇನ್ನೊಂದು ಆಸ್ಪತ್ರೆಯನ್ನು ಸದ್ಯದಲ್ಲೇ ಉದ್ಘಾಟನೆ ಮಾಡಲಾಗುತ್ತದೆ ಎಂದು ಹೇಳಿದೆ.

ಈ ಆಸ್ಪತ್ರೆಗಳು ತಲಾ 125 ವೆಂಟಿಲೇಟರ್‌ ಸಹಿತ ಐಸಿಯು ಬೆಡ್‌ಗಳನ್ನು ಹೊಂದಿದ್ದು, 375 ಸಾಮಾನ್ಯ ಹಾಸಿಗೆಗಳನ್ನು ಹೊಂದಿವೆ. ಎಲ್ಲಾ ಬೆಡ್‌ಗಳಿಗೆ ಆಮ್ಲಜನಕ ಪೂರೈಕೆ ವ್ಯವಸ್ಥೆ ಇರಲಿದೆ. ಆಸ್ಪತ್ರೆಗಳಿಗೆ ವೈದ್ಯರು ಮತ್ತು ಅರೆವೈದ್ಯಕೀಯ ಸಿಬ್ಬಂದಿಯನ್ನು ಸಶಸ್ತ್ರ ಪಡೆಗಳ ವೈದ್ಯಕೀಯ ಸೇವೆಗಳು ಒದಗಿಸಲಿವೆ ಎಂದು ಪಿಎಂಒ ಹೇಳಿದೆ.

ಇನ್ನು ಕೆಲವೇ ತಿಂಗಳುಗಳಲ್ಲಿ ಬಿಹಾರದಲ್ಲಿ ವಿಧಾನಸಭೆ ಚುನಾವಣೆ ನಡೆಯಲಿದ್ದು, ದೇಶದಲ್ಲಿ ಕೊರೊನಾದಿಂದ ತತ್ತರಿಸಿರುವ ರಾಜ್ಯಗಳಲ್ಲಿ ಇದೂ ಕೂಡ ಒಂದಾಗಿದೆ.