ವಿಡಿಯೋ ಕಾನ್ಫರೆನ್ಸ್ ಮೂಲಕ ಮಾರಿಷಸ್ ಸುಪ್ರೀಂಕೋರ್ಟ್ ನೂತನ ಕಟ್ಟಡ ಉದ್ಘಾಟಿಸಿದ ಮೋದಿ!

ನವದೆಹಲಿ: ಪ್ರಧಾನಿ ಮೋದಿ ಹಾಗೂ ಮಾರಿಷನ್ ಪ್ರಧಾನಿ ಪ್ರವೀಂದ್ ಜುಗ್ನಾಥ್ ಒಟ್ಟಾಗಿ, ಮಾರಿಷಸ್‌ನ ಸುಪ್ರೀಂಕೋರ್ಟ್ ನೂತನ ಕಟ್ಟಡವನ್ನು ಉದ್ಘಾಟಿಸಿದ್ದಾರೆ.

ವಿಡಿಯೋ ಕಾನ್ಫರೆನ್ಸ್ ಮೂಲಕ ಸುಪ್ರೀಂಕೋರ್ಟ್ ಕಟ್ಟಡ ಉದ್ಘಾಟಿಸಿ ಮಾತನಾಡಿದ ಪ್ರಧಾನಿ ಮೋದಿ, ಮಾರಿಷಸ್ ಜನತೆಗೆ ಶುಭಾಶಯ ತಿಳಿಸಿದರು.

ಕೊರೊನಾ ವೈರಸ್ ಹಾವಳಿಯನ್ನು ತಡೆಗಟ್ಟುವಲ್ಲಿ ಮಾರಿಷಸ್‌ಗೆ ವೈದ್ಯಕೀಯ ನೆರವು ನೀಡಿದ ತೃಪ್ತಿ ಭಾರತಕ್ಕಿದೆ ಎಂದು ಹೇಳಿದ ಪ್ರಧಾನಿ, ಭಾರತ-ಮಾರಿಷಸ್ ನಡುವಿನ ಸಂಬಂಧ ಅತ್ಯಂತ ಗಾಢವಾಗಿದೆ ಎಂದು ಹೇಳಿದರು.

ಮಾತ್ರೆ ಹೊತ್ತ ವಿಮಾನ ಬಂದಿಳಿದಿದೆ: ಥ್ಯಾಂಕ್ಯೂ ಮೋದಿ ಎಂದ ಮಾರಿಷಸ್ ಪ್ರಧಾನಿ

ಭಾರತ ಮತ್ತು ಮಾರಿಷಸ್ ಸ್ವತಂತ್ರ್ಯ ನ್ಯಾಯಾಂಗದ ಬೆಂಬಲಿಗ ರಾಷ್ಟ್ರಗಳಾಗಿದ್ದು, ಪ್ರಜಾಪ್ರಭುತ್ವದ ಗೆಲುವಿಗಾಗಿ ಇದು ಅತ್ಯವಶ್ಯಕ ಎಂಬುದನ್ನು ಮನಗಂಡಿವೆ ಎಂದು ಈ ವೇಳೆ ಪ್ರಧಾನಿ ನುಡಿದರು.

ಅಫ್ಘಾನಿಸ್ತಾನ ಸಂಸತ್ತಿನ ಕಟ್ಟಡ ನಿರ್ಮಾಣಕ್ಕೆ ಭಾರತ ನೆರವು ನೀಡಿದ್ದು, ಇದೀಗ ಮಾರಿಷಸ್ ಸುಪ್ರೀಂಕೋರ್ಟ್ ಕಟ್ಟಡ ನಿರ್ಮಾಣದಲ್ಲೂ ಭಾಗೀಧಾರಿ ಎಂಬುದು ಹೆಮ್ಮೆಯ ವಿಷಯ ಎಂದು ಪ್ರಧಾನಿ ಮೋದಿ ಸಂಸಸ ವ್ಯಕ್ತಪಡಿಸಿದರು.

ಇದೇ ವೇಳೆ ಮಾತನಾಡಿದ ಮಾರಿಷನ್ ಪ್ರಧಾನಿ ಪ್ರವೀಂದ್ ಜುಗ್ನಾಥ್, ಸುಪ್ರೀಂಕೋರ್ಟ್ ಕಟ್ಟಡಕ್ಕೆ ಆರ್ಥಿಕ ನೆರವು ನೀಡಿದ ಭಾರತಕ್ಕೆ ಧನ್ಯವಾದ ಅರ್ಪಿಸುವುದಾಗಿ ಹೇಳಿದರು. ಭಾರತ-ಮಾರಿಷಸ್ ನಡುವಿನ ಐತಿಹಾಸಿಕ ಸಂಬಂಧ ಪ್ರಧಾನಿ ಮೋದಿ ಅವರ ಆಡಳಿತಾವಧಿಯಲ್ಲಿ ಮತ್ತಷ್ಟು ವೃದ್ಧಿಯಾಗಿದೆ ಎಂದು ಜುಗ್ನಾಥ್ ಹೇಳಿದರು.