ವಿಲಿಯಂ ದಂಪತಿಗೆ ಪ್ರಧಾನಿ ಔತಣಕೂಟ

ಹೊಸದಿಲ್ಲಿ: ಭಾರತ ಪ್ರವಾಸದಲ್ಲಿರುವ ಬ್ರಿಟನ್‌ ಅರಸೊತ್ತಿಗೆಯ ಯುವರಾಜ ವಿಲಿಯಂ ಹಾಗೂ ಪತ್ನಿ ಕೇಟ್‌ ಮಿಡ್ಲ್‌ಟನ್‌ ಅವರಿಗೆ ಪ್ರಧಾನಿ ನರೇಂದ್ರ ಮೋದಿ ಮಂಗಳವಾರ ಮಧ್ಯಾಹ್ನ ಔತಣಕೂಟ ಏರ್ಪಡಿಸಿದ್ದರು.

'ಎ ರಾಯಲ್ ಸಮ್ಮರ್‌ ಇನ್‌ ಡೆಲ್ಲಿ! ಬ್ರಿಟನ್‌ ಯುವರಾಜ, ಯುವರಾಣಿಯನ್ನು ಪ್ರಧಾನಿ ನರೇಂದ್ರ ಮೋದಿ ಹೈದರಾಬಾದ್‌ ಹೌಸ್‌ಗೆ ಬರಮಾಡಿಕೊಂಡರು,'ಎಂದು ವಿದೇಶ ವ್ಯವಹಾರಗಳ ಸಚಿವಾಲಯದ ವಕ್ತಾರ ವಿಕಾಸ್‌ ಸ್ವರೂಪ್‌ ಟ್ವೀಟ್‌ ಮಾಡಿದ್ದಾರೆ.

ಜತೆಗೆ, ಪ್ರಧಾನಿ ಜತೆ ಯುವರಾಜ ವಿಲಿಯಂ ಹಾಗೂ ಕೇಟ್‌ ಇರುವ ಚಿತ್ರವನ್ನೂ ಅವರು ಪೋಸ್ಟ್‌ ಮಾಡಿದ್ದಾರೆ.

ಔತಣಕೂಟದಲ್ಲಿ ಪಾಲ್ಗೊಂಡ ನಂತರ ಅಸ್ಸಾಂಗೆ ತೆರಳುವ ವಿಲಿಯಂ, ಕೇಟ್‌ ಖ್ಯಾತ ಕಾಜಿರಂಗ ರಾಷ್ಟ್ರೀಯ ಉದ್ಯಾನಕ್ಕೆ ಭೇಟಿ ನೀಡಲಿದ್ದಾರೆ.

ಕಳೆದ ವರ್ಷ ನವೆಂಬರ್‌ನಲ್ಲಿ ಪ್ರಧಾನಿ ಮೋದಿ ಬ್ರಿಟನ್‌ಗೆ ಭೇಟಿ ನೀಡಿದ್ದಾಗ, ಮಹಾರಾಣಿ ಎಲಿಜಬೆತ್‌ II ಔತಣಕೂಟ ಆಯೋಜಿಸಿದ್ದರು.

ಮುಂದಿನ ವಾರ ಮಹಾರಾಣಿ ಎಲಿಜಬೆತ್‌ II ಅವರ 90ನೇ ವರ್ಷದ ಹುಟ್ಟುಹಬ್ಬವಿದ್ದು, ಅದರ ಪ್ರಯುಕ್ತ ಇಲ್ಲಿನ ಬ್ರಿಟಿಷ್‌ ಹೈ ಕಮೀಷನರ್‌ ಭಾನುವಾರ ಏರ್ಪಡಿಸಿದ್ದ ಔತಣಕೂಟದಲ್ಲಿ ಸೋಮವಾರ ವಿಲಿಯಂ ಹಾಗೂ ಕೇಟ್‌ ಭಾಗವಹಿಸಿದ್ದರು.

ಮುಂಬಯಿನಲ್ಲಿ ಭಾನುವಾರ ಬಂದಿಳಿದ ವಿಲಿಯಂ ದಂಪತಿ 2008ರಲ್ಲಿ ಉಗ್ರರ ದಾಳಿಗೆ ಒಳಗಾದ ಹೋಟೆಲ್‌ ತಾಜ್‌ಗೆ ಭೇಟಿ ನೀಡಿ ದಾಳಿಯಲ್ಲಿ ಸಾವಿಗೀಡಾದವರ ಆತ್ಮಕ್ಕೆ ಶಾಂತಿ ಕೋರಿದ್ದರು. ಸ್ಮಾರಕಕ್ಕೆ ಹೂಗುಚ್ಚ ಅರ್ಪಿಸಿದ್ದರು. ಮುಂಬಯಿನ ಓವೆಲ್‌ ಗ್ರೌಂಡ್‌ನಲ್ಲಿ ಸಚಿನ್‌ ತೆಂಡೂಲ್ಕರ್‌ ಜತೆ ರಾಜ ದಂಪತಿ ಕ್ರಿಕೆಟ್‌ ಆಡಿ ಸಂಭ್ರಮಿಸಿದ್ದರು.