ಸಂಸತ್‌ಗೆ ಬಂದ ಪ್ರಧಾನಿಯ ‘ಸ್ಪೆಷಲ್‌ ಫ್ರೆಂಡ್‌’

ಹೊಸದಿಲ್ಲಿ: ಪ್ರಧಾನಿ ನರೇಂದ್ರ ಮೋದಿ ಅವರು ಮಂಗಳವಾರ ಅಧಿಕೃತ ಇನ್‌ಸ್ಟಾ ಗ್ರಾಂನಲ್ಲಿ ಪೋಸ್ಟ್‌ ಮಾಡಿದ ಎರಡು ಚಿತ್ರಗಳು ಎಲ್ಲೆಡೆ ಖುಷಿ ಮತ್ತು ಕುತೂಹಲಕ್ಕೆ ಕಾರಣವಾಯಿತು. ಒಂದರಲ್ಲಿ ಮೋದಿ ಅವರು ಪುಟ್ವ ಮಗುವೊಂದನ್ನು ಮಡಿಲಲ್ಲಿ ಇಟ್ಟುಕೊಂಡು ಅದರ ಕಾಲುಗಳನ್ನು ಹಿಡಿದೆತ್ತಿರುವ ಚಿತ್ರ. ಇನ್ನೊಂದರಲ್ಲಿ ಮೋದಿಯ ಕಾಲಲ್ಲಿ ಕುಳಿತ ಮಗು ಟೇಬಲ್‌ ಮೇಲೆ ಇರುವ ಚಾಕೊಲೇಟನ್ನು ತೆಗೆಯಲು ಪ್ರಯತ್ನಿಸುತ್ತಿರುತ್ತಿದೆ. ಎರಡೂ ಚಿತ್ರಗಳು ಅತ್ಯಂತ ಉಲ್ಲಾಸದ ಕ್ಷಣಗಳಾಗಿದ್ದು, ಖುಷಿ ನೀಡುತ್ತಿವೆ.

''ಇವತ್ತು ಒಬ್ಬ ರು ತುಂಬ ಸ್ಪೆಷಲ್‌ ಫ್ರೆಂಡ್‌ ನನ್ನನ್ನು ಭೇಟಿಯಾಗಲು ಸಂಸತ್‌ಗೆ ಬಂದಿದ್ದರು,'' ಎಂದು ಇನ್‌ಸ್ಟಾಗ್ರಾಂನಲ್ಲಿ ಬರೆಯಲಾಗಿತ್ತು. ಇನ್‌ಸ್ಟಾಗ್ರಾಮ್‌ನಲ್ಲಿ ಈ ಚಿತ್ರ ಪೋಸ್ಟ್‌ ಆಗುತ್ತಿದ್ದಂತೆಯೇ ಜನರ ಕುತೂಹಲ ಮೇರೆ ಮೀರಿತು. ಕೆಲವೇ ಗಂಟೆಗಳಲ್ಲಿ 5 ಲಕ್ಷ ಲೈಕ್ಸ್‌ ಪಡೆಯಿತು. ಇದರ ಜತೆಗೆ ಈ ಮಗು ಯಾರದಿರಬಹುದು ಎಂದು ಊಹಿಸುವ ಆಟವೂ ನಡೆಯಿತು. ಯಾರಿರಬಹುದು ಈ ಮಗು ಎಂಬ ಚರ್ಚೆ ಇನ್‌ಸ್ಟಾಗ್ರಾಂನಿಂದ ಟ್ವಿಟರ್‌ಗೂ ಪಸರಿಸಿ ವೈರಲ್‌ ಆಯಿತು. ಕೆಲವರು ಇದು ಕ್ರಿಕೆಟ್‌ ಆಟಗಾರ ರೋಹಿತ್‌ ಶರ್ಮ ಅವರ ಮಗಳಿರಬಹುದಾ ಎಂದು ಶಂಕಿಸಿದರು. ಕೆಲವರು ಗೃಹ ಮಂತ್ತಿ ಅಮಿತ್‌ ಶಾ ಅವರ ಮೊಮ್ಮಗು ಎಂದರು.


ಅಂತಿಮವಾಗಿ ಗೊತ್ತಾಗಿದ್ದೇನೆಂದರೆ, ಇದು ಬಿಜೆಪಿ ನಾಯಕ ಡಾ. ಸತ್ಯನಾರಾಯಣ ಜತಿಯಾ ಅವರ ಮೊಮ್ಮಗ ಎನ್ನುವುದು. ಡಾ. ಸತ್ಯನಾರಾಯಣ ಜತಿಯಾ ಅವರು ಮಧ್ಯಪ್ರದೇಶದ ಉಜ್ಜಯಿನಿ ಲೋಕಸಭಾ ಕ್ಷೇತ್ರದಿಂದ ಏಳು ಬಾರಿ ಸಂಸತ್ತಿಗೆ ಆಯ್ಕೆಯಾದ ಹಿರಿಯ ನಾಯಕ. ಕೊನೆಯ ಬಾರಿಗೆ ಅವರು 2009ರಿಂದ 14ರವರೆಗೆ ಸಂಸದರಾಗಿದ್ದು. ವಾಜಪೇಯಿ ಸಂಪುಟದಲ್ಲಿ ಮಂತ್ರಿಯೂ ಆಗಿದ್ದರು. 1977ರಲ್ಲಿ ಅವರು ಶಾಸಕರೂ ಆಗಿದ್ದರು. ಅವರಿಗೆ ಇಬ್ಬರು ಗಂಡು ಮತ್ತು ಮೂವರು ಹೆಣ್ಣು ಮಕ್ಕಳು. ಮಂಗಳವಾರ ಅವರು ತಮ್ಮ ಕುಟುಂಬಿಕರ ಜತೆ ಸಂಸತ್ತಿಗೆ ಬಂದಿದ್ದು, ಮೋದಿ ಅವರನ್ನು ಭೇಟಿಯಾಗಿದ್ದರು.