ಎಲ್ಲಾ ಭಾರತೀಯರಿಗೂ ಕೊರೊನಾ ಲಸಿಕೆ: ಸಂದರ್ಶನದಲ್ಲಿ ಪ್ರಧಾನಿ ಮೋದಿ ಭರವಸೆ

ಹೊಸದಿಲ್ಲಿ: ಎಲ್ಲಾ ಭಾರತೀಯರಿಗೂ ಕೊರೊನಾ ಲಸಿಕೆ ನೀಡಲಾಗುವುದು ಎಂದು ಪ್ರಧಾನಿ ಮೋದಿ ಭರವಸೆ ನೀಡಿದ್ದಾರೆ. ಎಕಾನಾಮಿಕ್‌ ಟೈಮ್ಸ್‌ ಜೊತೆಗಿನ ಸಂದರ್ಶನದ ವೇಳೆ ಹೇಳಿಕೆ ನೀಡಿದ ಪ್ರಧಾನಿ ಮೋದಿ, ನಾನು ಇಡೀ ಭಾರತೀಯರಿಗೆ ಭರವಸೆ ನೀಡುತ್ತಿದ್ದು, ಯಾವಾಗ ಕೊರೊನಾ ಲಸಿಕೆ ಲಭ್ಯವಾಗುತ್ತದೆ, ಆ ಸಮಯದಲ್ಲಿ ಒಬ್ಬರನ್ನು ಬಿಡದೆ ಎಲ್ಲರಿಗೂ ಕೊರೊನಾ ಲಸಿಕೆ ನೀಡಲಾಗುವುದು ಎಂದರು.

ಇದಕ್ಕಾಗಿ ರಾಷ್ಟ್ರೀಯ ತಜ್ಞರ ತಂಡವನ್ನು ರಚಿಸಲಾಗಿದ್ದು, ಇವರು ಲಸಿಕೆ ನೀಡುವ ಬಗ್ಗೆ ಮಾರ್ಗಸೂಚಿಯನ್ನು ರಚಿಸಲಿದ್ದಾರೆ ಎಂದು ತಿಳಿಸಿದ್ದಾರೆ. ಅದಾಗ್ಯೂ ಸಹಜವಾಗಿ, ಆರಂಭದಲ್ಲಿ ನಾವು ಅತ್ಯಂತ ದುರ್ಬಲ ಮತ್ತು ಮುಂಚೂಣಿ ಕಾರ್ಮಿಕರನ್ನು ರಕ್ಷಿಸುವತ್ತ ಗಮನ ಹರಿಸಬೇಕಾಗಿದೆ. ರಾಷ್ಟ್ರೀಯ ತಜ್ಞರ ತಂಡ ಕೊರೊನಾ ಆಡಳಿತಕ್ಕೆ ಎಲ್ಲಾ ರೀತಿಯ ಸಲಹೆಯನ್ನು ನೀಡಲಿದೆ ಎಂದು ತಿಳಿಸಿದರು.

ಇನ್ನು ಕೊರೊನಾ ಆಡಳಿತ ಮತ್ತು ವಿತರಣೆಯನ್ನು ವ್ಯವಸ್ಥಿತವಾಗಿ ಜಾರಿಗೊಳಿಸಲು ಉದ್ದೇಶಿಸಿದ್ದು, ಇದಕ್ಕಾಗಿ 28,000 ಕ್ಕಿಂತಲೂ ಹೆಚ್ಚು ಕೋಲ್ಡ್ ಚೈನ್ ಪಾಯಿಂಟ್‌ಗಳ ಮೂಲಕ ಸಂಗ್ರಹಿಸಿ ವಿತರಣೆ ಮಾಡಲಾಗುತ್ತದೆ. ಅತ್ಯಂತ ಜವಾಬ್ಧಾರಿಯುತವಾಗಿ ರಾಜ್ಯ, ಜಿಲ್ಲಾ ಮತ್ತು ಸ್ಥಳೀಯ ಮಟ್ಟದಲ್ಲಿ ಸಮರ್ಪಿತ ತಂಡಗಳು ಇದಕ್ಕಾಗಿ ಕಾರ್ನಿರ್ವಹಿಸಲಿವೆ ಎಂದು ಮಾಹಿತಿ ನೀಡಿದರು.

ನವೆಂಬರ್‌ 5ಕ್ಕೆ ಎರಡನೇ ಹಂತದ ರಫೇಲ್‌ ಜೆಟ್‌ಗಳು ಭಾರತಕ್ಕೆ ಆಗಮನ, ಸೇನೆಗೆ ಮತ್ತಷ್ಟು ಭೀಮಬಲ!

ಅದಾಗ್ಯೂ ಸದ್ಯ ಕೊರೊನಾ ಲಸಿಕೆಗಳು ಪ್ರಗತಿಯಲ್ಲಿದ್ದು, ಹಲವಾರು ಪ್ರಯೋಗಗಳು ನಡೆಯುತ್ತಿದೆ ಎಂದಿರುವ ಪ್ರಧಾನಿ ಮೋದಿ ಜನರಿಗೆ ಹೇಗೆ ಕೊರೊನಾ ಲಸಿಕೆ ತಲುಪಿಸಿ ನೀಡಬೇಕು ಎನ್ನುವ ಬಗ್ಗೆ ತಜ್ಞರು ಆಡಳಿತಕ್ಕೆ ಮಾರ್ಗದರ್ಶನ ನೀಡುತ್ತಾರೆ ಎಂದಿದ್ದಾರೆ.

ಜಗತ್ತಿನಾದ್ಯಂತ 150ಕ್ಕೂ ಹೆಚ್ಚು ಕೊರೊನಾ ಲಸಿಕೆಗಳು ವಿವಿಧ ಹಂತದ ಪ್ರಯೋಗಳಲ್ಲಿದೆ. ಭಾರತದಲ್ಲೂ ಎರಡು ಕೊರೊನಾ ಲಸಿಕೆಗಳು ತಯಾರಾಗುತ್ತಿದ್ದು ಪ್ರಯೋಗ ಹಂತದಲ್ಲಿದೆ. ಭಾರತ್‌ ಬಯೋಟೆಕ್‌ನ ಕೊವ್ಯಾಕ್ಸಿನ್‌ ಸದ್ಯ ಭಾರೀ ಭರವಸೆ ಮೂಡಿಸಿದೆ. ಇನ್ನೊಂದು ಜ್ಯಾದುಸ್‌ ಕ್ಯಾಡಿಲ್ಲಾ ಎಂಬ ಹೆಸರಿನಿಂದ ಗುರುತಿಸಲ್ಪಟ್ಟಿದೆ.