ಮೋದಿ-ಶಾ ಮತ್ತೆ ನಂ.1 ಜೋಡಿ!

ಹೊಸದಿಲ್ಲಿ: ಪ್ರಧಾನಿ ನರೇಂದ್ರ ಮೋದಿ ಮತ್ತು ಬಿಜೆಪಿ ಅಧ್ಯಕ್ಷ ಅಮಿತ್‌ ಶಾ ಪಕ್ಷದ ನಂ.1 ಜೋಡಿಯಾಗಿ ಮತ್ತೆ ಹೊರಹೊಮ್ಮಿದ್ದಾರೆ. ಲೋಕಸಭೆ ಚುನಾವಣೆ ಮಾದರಿಯಲ್ಲೇ ಮುಂದಿನ ತಿಂಗಳ ವಿಧಾನಸಭೆ ಚುನಾವಣೆಗೂ ಉಭಯ ನಾಯಕರೂ ಚುನಾವಣಾ ಪ್ರಚಾರ ಅಖಾಡದ ಬಿಸಿ ಏರಿಸಲಿದ್ದಾರೆ.

ಇತ್ತೀಚೆಗೆ ನಾಸಿಕ್‌ನಲ್ಲಿನಡೆದ ಮಹಾರಾಷ್ಟ್ರ ಸಿಎಂ ಫಡ್ನವಿಸ್‌ ಅವರ 4000 ಕಿ.ಮೀ. ದೂರದ 'ಜನ ಸಂದೇಶ ಯಾತ್ರೆ'ಯ ಸಮಾರೋಪ ಸಮಾವೇಶದಲ್ಲಿಪ್ರಧಾನಿ ಮೋದಿ ಭಾಗವಹಿಸಿದ್ದರು. ಇದನ್ನೇ ಮಹಾರಾಷ್ಟ್ರದಲ್ಲಿಮೋದಿ ಪ್ರಚಾರಾಂದೋಲನದ ಆರಂಭ ಎಂದು ಪರಿಗಣಿಸಲಾಗಿದೆ. ಇತ್ತ ಬಿಜೆಪಿ ಅಧ್ಯಕ್ಷ ಅಮಿತ್‌ ಶಾ ಅವರು ಭಾನುವಾರ ಮುಂಬಯಿನಲ್ಲಿ ಬಿಜೆಪಿ ರ‍್ಯಾಲಿ ನಡೆಸುವ ಮೂಲಕ ರಾಜ್ಯದಲ್ಲಿ ತಮ್ಮ ಅಧಿಕೃತ ಪ್ರಚಾರಾಂದೋಲನಕ್ಕೆ ಚಾಲನೆ ನೀಡಿದ್ದಾರೆ.

370ನೇ ವಿಧಿ ರದ್ದು, ತ್ರಿವಳಿ ತಲಾಕ್‌ ನಿಷೇಧ, ಇತ್ತೀಚೆಗೆ ಆರ್ಥಿಕ ಪ್ರಗತಿಗೆ ವೇಗ ನೀಡಲು ಘೋಷಿಸಿದ ಯೋಜನೆಗಳು, ಕಾರ್ಪೊರೇಟ್‌ ಟ್ಯಾಕ್ಸ್‌ ಇಳಿಕೆ ಮುಂತಾದ ಕ್ರಮಗಳನ್ನು ಮೋದಿ ಮತ್ತು ಶಾ ಅವರು ತಮ್ಮ ಪ್ರಚಾರದ ವೇಳೆ ಮತದಾರರ ಮನಗೆಲಲ್ಲು ಬಳಸಿಕೊಳ್ಳಲಿದ್ದಾರೆ. ಕೇಂದ್ರ ಮತ್ತು ರಾಜ್ಯದಲ್ಲಿಒಂದೇ ಪಕ್ಷದ ಅಧಿಕಾರದಲ್ಲಿದ್ದರೆ ದೊರೆಯಲಿರುವ 'ಡಬಲ್‌ ಎಂಜಿನ್‌' ಪ್ರಗತಿ ಪ್ರಯೋಜನದ ಬಗ್ಗೆಯೂ ಉಭಯ ನಾಯಕರು ಪ್ರತಿಪಾದಿಸಲಿದ್ದಾರೆ.